តុលាការខេត្តកោះកុង បានចោទប្រកាន់និងឃុំខ្លួនបុរស២នាក់ជាបណ្ដោះអាសន្នក្នុងពន្ធនាគារ ក្រោយពួកគេប្រើកាំភ្លើងបាញ់សម្លាប់សត្វព្រៃដោយខុសច្បាប់ ក្នុងតំបន់ការពារធម្មជាតិ នៅស្រុកថ្មបាំង ខេត្តកោះកុង។
ស្នងការដ្ឋាននគរបាលខេត្តកោះកុង បានចុះផ្សាយលើទំព័រហ្វេសប៊ុករបស់ខ្លួនថា កាលពីយប់រំលងអធ្រាត្រថ្ងៃទី៦ ខែកញ្ញា កម្លាំងកងរាជអាវុធហត្ថ សហការជាមួយមន្ត្រីបរិស្ថាន និងកម្លាំងអង្គការសម្ព័ន្ធមិត្តសត្វព្រៃ បានឃាត់ខ្លួនបុរសជាជនសង្ស័យ២នាក់ នៅចំនុចភូមិទឹកល្អក់ ឃុំជីផាត ស្រុកថ្មបាំង ខណៈ២នាក់ទៀតរត់គេចខ្លួនបាត់ ក្រោយប្រើប្រាស់កាំភ្លើងបាញ់សម្លាប់សត្វព្រៃ។
ស្នងការដ្ឋាននគរបាលខេត្តកោះកុង បញ្ជាក់ថា អ្នកដែលបាញ់សត្វព្រៃនោះ ម្នាក់ឈ្មោះ ស្រី វាសនា អាយុ៣៥ឆ្នាំ មានទីលំនៅភូមិអូរដឹម សង្កាក់ចោមចៅ ខណ្ឌសែនសុខ រាជធានីភ្នំពេញ និងម្នាក់ទៀតឈ្មោះ ហុង រត្នមុនី អាយុ២៩ឆ្នាំ មានទីលំនៅសង្កាត់ទឹកល្អក់១ ខណ្ឌទួលគោក រាជធានីភ្នំពេញ ។
ប្រភពដដែលបន្តថា វត្ថុតាងដែលសមត្ថកិច្ចរឹបអូសបានក្នុងករណីបង្ក្រាបបទល្មើសធនធានធម្មជាតិនោះ រួមមាន រថយន្តម៉ាកហ្វត ពណ៌ត្រេអ៊ី ពាក់ស្លាកលេខ ២-៤៧៩៣ ខេមរៈភូមិន្ទ០២ ចំនួន១គ្រឿង, សត្វប្រើស១ក្បាល, សំពោច១ក្បាល, សាច់សត្វមួយស្បោង និងអាវុធចំនួន៥ដើម ក្នុងនោះមានកាំភ្លើងបាញ់សត្វប្រភេទទំនើប២ដើម កាំភ្លើងខ្លី៣ដើម និងគ្រាប់ចំនួន៥៩គ្រាប់។
បើតាមស្នងការដ្ឋាននគរបាលខេត្តកោះកុង ជនសង្ស័យទាំង២នាក់នោះត្រូវបានសមត្ថកិច្ចបញ្ជូនទៅមន្ទីរបរិស្ថានខេត្តកោះកុងភ្លាមៗ ដើម្បីសាកសួរ និងកសាងសំណុំរឿងបញ្ជូនទៅតុលាការតាមនីតិវិធីច្បាប់។
ប្រធានមន្ទីរបរិស្ថានខេត្តកោះកុង លោក ហ៊ុន ម៉ារ៉ាឌី ប្រាប់វីអូឌីនៅថ្ងៃទី៨ ខែកញ្ញានេះថា ជនសង្ស័យទាំង២នាក់នោះត្រូវបានមន្ទីរបរិស្ថានខេត្តបញ្ជូនទៅតុលាការហើយកាលពីល្ងាចថ្ងៃម្សិលមិញ ក្រោយសាកសួរជាច្រើនម៉ោង។
ប៉ុន្តែនៅពេលសួរថា តើអ្នកដែលប្រើកាំភ្លើងបាញ់សត្វព្រៃនោះជាពលរដ្ឋធម្មតា ឬជាមន្ត្រីរាជការ ហើយកាំភ្លើងដែលពួកគេប្រើប្រាស់នោះជាអាវុធស្របច្បាប់ឬខុសច្បាប់? លោក ហ៊ុន ម៉ារ៉ាឌី បដិសេធឆ្លើយតប ដោយលោកបង្វែរឱ្យទៅសួរខាងតុលាការវិញ។
លោកបន្ថែមថា៖ «[ជនសង្ស័យ] ២នាក់ហ្នឹង គឺមន្ទីរបានបញ្ជូនទៅអយ្យការអមសាលាដំបូងខេត្តចាត់ការតាមនីតិវិធីបន្តកាលពីថ្ងៃម្សិលមិញហើយ។ ទុកនីតិវិធីហ្នឹងឱ្យខាងតុលាការលោកស៊ើបអង្កេតបន្តទៀត ព្រោះពេលយើងសួរនៅនេះ គាត់ថាជាប្រជាពលរដ្ឋ អ៊ីចឹងរឿងផ្សេងៗទៀតទុកជានាទីរបស់អយ្យការទៅ»។
អ្នកនាំពាក្យសាលាដំបូងខេត្តកោះកុង លោក វ៉ៃ ភីរម្យ មានប្រសាសន៍ថា បុរស២នាក់នោះត្រូវបានចៅក្រមស៊ើបសួរសម្រេចចោទប្រកាន់ជាផ្លូវការ និងបញ្ជូនទៅឃុំខ្លួននៅពន្ធនាគារបណ្ដោះអាសន្នហើយកាលពីថ្ងៃម្សិលមិញ។
លោកបន្ថែមថា៖ «ចំពោះបទចោទមានការប្រើប្រាស់អាវុធដោយខុសច្បាប់ និងមួយទៀតពាក់ព័ន្ធនឹងការបំផ្លិចបំផ្លាញធនធានធម្មជាតិតាមរយៈការបរបាញ់នោះ»។
ប្រធានកម្មវិធីផ្នែកស្រាវជ្រាវ និងតស៊ូមតិ នៃសមាគមបណ្ដាញយុវជនកម្ពុជា លោក ហេង គឹមហុង បានសាទរចំពោះវិធានការនានារបស់សមត្ថកិច្ចពាក់ព័ន្ធទៅលើជនសម្លាប់សត្វព្រៃ។ ប៉ុន្តែលោកបានជំរុញឱ្យមានវិធានការច្បាប់តឹងរ៉ឹងជាងនេះ ខណៈការចាប់សត្វព្រៃ និងផ្សព្វផ្សាយលក់សាច់សត្វព្រៃនៅតែបន្តកើតមានជាហូរហែ។
លោកបន្ថែមថា៖ «អាជ្ញាធរមានសមត្ថកិច្ចត្រូវមានវិធានការតឹងរ៉ឹង ឬឃាត់ខ្លួនចំពោះជនទាំងឡាយណាដែលបរិភោគសត្វព្រៃ និងបរបាញ់សត្វព្រៃដោយខុសច្បាប់ ឱ្យពួកគេទទួលខុសត្រូវចំពោះមុខច្បាប់។ បើសិនជាលក្ខណៈវិនិច្ឆយនៃទោសត្រូវកំណត់ឱ្យជាប់ពន្ធនាគារ គួរតែមានភាពតឹងរ៉ឹងក្នុងការដាក់ទណ្ឌកម្មបែបនេះដែរ ដើម្បីព្រមានដល់ប្រជាពលរដ្ឋផ្សេងទៀត[ដែល]ហ៊ានទៅបរបាញ់ និងទិញសត្វព្រៃមកហូប»។
ក្រសួងបរិស្ថាន សង្គមស៊ីវិល និងអាជ្ញាធរពាក់ព័ន្ធ បាននិងកំពុងធ្វើយុទ្ធនាការ «អន្ទាក់សូន្យ» ដោយបានដាក់ចេញនូវវិធានការបន្ទាន់នានា ដើម្បីបង្កើនការពង្រឹងការអនុវត្តច្បាប់ និងពិនិត្យមើលបទប្បញ្ញត្តិពាក់ព័ន្ធ ក្នុងគោលបំណងទប់ស្កាត់ការបរបាញ់សត្វព្រៃខុសច្បាប់ និងបញ្ចប់វិបត្តិអន្ទាក់ ដែលកំពុងគំរាមកំហែងដល់ជីវិតសត្វព្រៃនៅកម្ពុជា។
ក្នុងឆ្នាំ២០២១ ក្រសួងបរិស្ថាន និងស្ថាប័នអង្គការដៃគូរបស់ខ្លួន បានដកអន្ទាក់សរុបជាង៦ម៉ឺនអន្ទាក់ (៦១ ៦១១) ចេញពីតំបន់ការពារធម្មជាតិ ចំនួន៧២ និងច្រករបៀងជីវចម្រុះផ្សេងៗទៀតក្នុងប្រទេសកម្ពុជា។ ជាមធ្យម ក្នុងមួយឆ្នាំ មានអន្ទាក់សរុបចំនួនប្រមាណ៤០ ០០០អន្ទាក់ ត្រូវបានដកចេញពីតំបន់ការពារធម្មជាតិទាំងនោះ។
បើតាមលោក នេត្រ ភក្ត្រា ក្នុងឆ្នាំ២០២១ ក្រុមសង្គ្រោះសត្វព្រៃបន្ទាន់មកពីអង្គភាពចម្រុះ បានចុះប្រតិបត្តិការបង្ក្រាបការជួញដូរសត្វព្រៃចំនួន៦២៥ករណី សង្គ្រោះសត្វព្រៃបាន១ ២៧១ក្បាល រឹបអូសសាច់សត្វព្រៃចំនួន៣ ៦០៩ក្បាល និងរឹបអូសសាច់សត្វព្រៃគ្រប់ប្រភេទបានចំនួន៣៥៤គីឡូក្រាម បញ្ជូនសំណុំរឿងចំនួន១១ទៅតុលាការ និងបានដោះលែងសត្វព្រៃចូលទៅព្រៃធម្មជាតិវិញចំនួន៨៦៤ក្បាល៕