ប្រជាពលរដ្ឋរស់នៅភូមិតាដោក ប្រមាណជិត៤០គ្រួសារ ស្នើទៅរដ្ឋាភិបាលជួយអភិវឌ្ឍតបណ្ដាញទឹកស្អាតសម្រាប់ប្រើប្រាស់ និងរៀបចំហេដ្ឋារចនាសម្ពន្ធបន្ថែម ខណៈនៅក្នុងភូមិនោះមានតែអណ្ដូងទឹកចំនួន៣ប៉ុណ្ណោះ។
ប្រជាពលរដ្ឋនៅភូមិតាដោក ឃុំជាំក្រវៀន ស្រុកមេមត់ ខេត្តត្បូងឃ្មុំ លោក សុះ យ៉ានី បានអះអាងថា នៅក្នុងភូមិដែលជាប់ព្រំដែនវៀតណាមមួយនេះ ទើបនឹងមានការសាងសង់ផ្លូវលំតូចមួយខ្សែប៉ុណ្ណោះ ខណៈពីមុន ពលរដ្ឋដែលចេញចូលភូមិ ត្រូវធ្វើដំណើរតាមផ្លូវទឹក។ ចំពោះទឹកប្រើប្រាស់វិញ លោកថា បច្ចុប្បន្ន ភូមិនេះក៏មិនទាន់មានបណ្ដាញទឹកស្អាតទៅដល់នោះដែរ ដោយប្រជាពលរដ្ឋត្រូវទិញទឹកសម្រាប់ទទួលទាន ប្រើប្រាស់ទឹកភ្លៀងដែលត្រងទុក និងដងទឹកពីអណ្ដូងចំនួន៣ដែលជាជំនួយរបស់ជប៉ុន។
បុរសដែលមានពិការភាពជើងម្ខាង វ័យ៤៥ឆ្នាំរូបនេះ បន្តថា កង្វះទឹកស្អាត និងហេដ្ឋារចនាសម្ពន្ធនៅក្នុងភូមិ បានធ្វើឱ្យប្រជាពលរដ្ឋដែលមានជីវភាពក្រីក្រមួយចំនួនធ្លាក់ខ្លួនឈឺ និងមួយចំនួនទៀតបានទៅធ្វើការនៅក្រៅប្រទេស។
លោកថា៖ «ចង់បានតែផ្លូវល្អ និងអណ្ដូងទឹកប្រើស្អាតហ្នឹងហើយ [បច្ចុប្បន្នយើងមាន]អណ្ដូងសាលារៀន២។ ទឹកអណ្ដូង យើងហូបអត់កើតទេ! ទឹកហូប យើងដូរគេ គេយកដល់ផ្ទះ»។
ពាក់ព័ន្ធនឹងករណីនេះ លោកអំពាវនាវដល់អាជ្ញាធរពាក់ព័ន្ធជួយតបណ្ដាញទឹកស្អាតសម្រាប់ប្រជាពលរដ្ឋប្រើប្រាស់ និងកសាងហេដ្ឋារចនាសម្ពន្ធបន្ថែម ដើម្បីបង្កភាពងាយស្រួល និងលើកកម្ពស់ជីវភាព និងសុខុមាលភាពប្រជាពលរដ្ឋ។
គ្រូបង្រៀននៅសាលាបឋមសិក្សាថ្មតាដោក លោក ម៉ុល សុផល បានឱ្យដឹងថា ប្រជាពលរដ្ឋរស់នៅក្នុងភូមិតាដោកនេះ ជួបបញ្ហាកង្វះទឹកស្អាតប្រើប្រាស់ខ្លាំង តួយ៉ាងដូចនៅសាលារៀននេះក៏មិនមានទឹកស្អាតសម្រាប់ឱ្យសិស្សទទួលទាននិងប្រើប្រាស់ផងដែរ ខណៈសាលារៀននេះមានតែអណ្ដូងទឹកមួយ ហើយទឹកនោះមានសារធាតុកំបោរខ្ពស់។
លោកបានបង្ហាញក្ដីបារម្ភពីផលប៉ះពាល់ទៅដល់សុខភាពកុមារ នៅពេលដែលពួកគេមិនមានទឹកស្អាតប្រើប្រាស់។
ប្រធានភូមិតាដោក លោក ឆាន់ វីរៈ មានប្រសាសន៍ថា នៅក្នុងភូមិនេះ មានប្រជាពលរដ្ឋរស់នៅសរុបចំនួន៤៥គ្រួសារ។ លោកទទួលស្គាល់ថា ក្នុងភូមិពិតជាមិនមានបណ្តាញទឹកស្អាតសម្រាប់ប្រជាពលរដ្ឋប្រើប្រាស់នៅឡើយ គឺមានតែអណ្តូងទឹកចំនួន៣ប៉ុណ្ណោះ ហើយការប្រើប្រាស់ទឹកអណ្តូងនោះទៀតសោត ក៏មានសារធាតុកំបោរខ្ពស់ដែលធ្វើឱ្យពលរដ្ឋមានជំងឺញឹកញាប់ផងដែរ។
លោកថា៖ «បើនិយាយពីប្រភពទឹកប្រើ ពលរដ្ឋខ្លះប្រើទឹកអណ្ដូង តែអណ្ដូងទឹកអត់សូវស្អាតទេ ទឹកកំបោរច្រើន អ៊ីចឹងច្រើនប្រើទឹកភ្លៀង ភាគច្រើនប្រើទឹកភ្លៀង»។
ប្រធានភូមិរូបនេះបន្តថា ក្រៅពីមិនទាន់មានទឹកស្អាតប្រើប្រាស់ ក្នុងភូមិក៏នៅមានកង្វះហេដ្ឋារចនាសម្ពន្ធមួយចំនួនផងដែរ ដូចជា ផ្លូវ មន្ទីរពេទ្យ និងសាលារៀន ជាដើម ដោយបច្ចុប្បន្នមានសាលារៀនតែមួយខ្នងដែលសភាពចាស់ទ្រុឌទ្រោម និងខ្វះបន្ទប់រៀន។
តែយ៉ាងណា លោកថា អាជ្ញាធរមូលដ្ឋានបានដាក់សំណើទៅកាន់ថ្នាក់លើរួចហើយ ដើម្បីស្នើសុំអភិវឌ្ឍន៍ហេដ្ឋារចនាសម្ពន្ធផ្សេងៗនៅក្នុងភូមិ រួមទាំងបញ្ហាទឹកស្អាតផងដែរ។
សមាជិកក្រុមប្រឹក្សាឃ្លាំមើលកម្ពុជា និងជាប្រធានសហភាពសហជីពកម្ពុជា លោក រ៉ុង ឈុន មានប្រសាសន៍ថា នៅពេលដែលលោកចុះទៅតាមខេត្តនៅជាប់ព្រំដែន ជាពិសេសព្រំដែនកម្ពុជា-វៀតណាម លោកសង្កេតឃើញមានការអភិវឌ្ឍជាបណ្ដើរៗហើយនៅតំបន់ជាប់មាត់ច្រកព្រំដែន ប៉ុន្តែសម្រាប់ប្រជាពលរដ្ឋដែលរស់នៅខ្សែបន្ទាត់ព្រំដែន នៅជួបបញ្ហាកង្វះទឹកស្អាតប្រើប្រាស់ អគ្គិសនី សាលារៀន និងមន្ទីរពេទ្យនៅឡើយ។
ករណីនេះ លោកបានជំរុញទៅរដ្ឋាភិបាលគួរតែអភិវឌ្ឍហេដ្ឋារចនាសម្ពន្ធឱ្យបានគ្រប់គ្រាន់ ជាពិសេសរឿងទឹកស្អាត នៅតាមតំបន់ជាប់ព្រំដែន ដើម្បីបង្កភាពងាយស្រួល និងការពារសុខុមាលភាពរបស់ប្រជាពលរដ្ឋ។
លោកថា៖ «ខ្ញុំលើកទឹកចិត្តរដ្ឋាភិបាលត្រូវតែធ្វើការអភិវឌ្ឍចាប់ពីព្រំដែនឱ្យមានការអភិវឌ្ឍខ្លាំង វាប្រសើរជាងទុកឱ្យគ្មានការអភិវឌ្ឍ។ បើយើងធ្វើការអភិវឌ្ឍតាមបណ្ដោយព្រំដែនទៅ នេះក៏ខែលមួយសម្រាប់ការពារព្រំដែន បូរណភាពទឹកដីកម្ពុជាយើងផងដែរ»។
ពាក់ព័ន្ធនឹងការគ្រប់គ្រង ការអភិវឌ្ឍវិស័យទឹកស្អាត និងអនាម័យនៅកម្ពុជា រដ្ឋាភិបាលបានដាក់ចេញនូវគោលនយោបាយ ដោយកំណត់ថា៖ «ពង្រីកវិសាលភាពនៃការផ្គត់ផ្គង់ទឹកស្អាតនៅទីក្រុង ទីប្រជុំជន ឱ្យបាន ៩០% នៅឆ្នាំ២០២៣ និង ១០០% ត្រឹមឆ្នាំ២០២៥ ដោយឈរលើលក្ខខណ្ឌ៤យ៉ាង គឺទឹកត្រូវមានគុណភាព សុវត្ថិភាព និរន្តរភាព និងថ្លៃសមរម្យ»។
ក្នុងសន្និសីទសារព័ត៌មានកាលពីថ្ងៃទី១ ខែសីហា ឆ្នាំ២០២២ នៅទីស្ដីការគណៈរដ្ឋមន្ដ្រី លោក ជ្រុន ថេរ៉ាវ៉ាត អ្នកនាំពាក្យក្រសួងអភិវឌ្ឍន៍ជនបទ បានឱ្យដឹងថា ការអនុវត្តផែនការសកម្មភាពជាតិស្តីពីការផ្គត់ផ្គង់ទឹក និងអនាម័យជនបទ ជំហានទី២ (ឆ្នាំ២០១៩-២០២៣) គិតត្រឹមត្រីមាសទី២ ឆ្នាំ២០២២នេះ សម្រេចបានជាង ៨០ភាគរយ ហើយនឹងគ្រោងសម្រេចទិសដៅឱ្យបានគ្របដណ្តប់ ៩០ភាគរយ នៅឆ្នាំ២០២៣។
លោក ជ្រុន ថេរ៉ាវ៉ាត បន្តថា រដ្ឋាភិបាលបានរៀបចំផែនការយុទ្ធសាស្ត្រជាតិ ស្តីពី ការផ្គត់ផ្គង់ទឹកស្អាត និងការលើកកម្ពស់អនាម័យនៅជនបទ ឆ្នាំ២០១៤-២០២៥ ក្នុងគោលបំណងធ្វើឱ្យសេវាទឹកស្អាត សុខភាព និងអនាម័យនៅជនបទ មានភាពប្រសើរឡើង និងប្រកបដោយនិរន្តរភាព ដើម្បីរួមចំណែកគាំទ្រដល់រាជរដ្ឋាភិបាលក្នុងការលើកកម្ពស់សុខភាព និងអាហារូបត្ថម្ភសម្រាប់ប្រជាពលរដ្ឋ៕