លោក សេង ហួរ ជាពលករខ្មែរម្នាក់នៅប្រទេសកូរ៉េខាងត្បូង បានស្ដាប់ធម្មទេសនារបស់លោក ខឹម វាសនា អស់រយៈពេល៣ឆ្នាំមកហើយ ដូច្នេះ កាលពីខែមុន នៅពេលដែលលោក ខឹម វាសនា ទស្សន៍ទាយថានឹងមានទឹកជំនន់ជន់លិចពិភពលោក លោកបានត្រលប់មកប្រទេសកម្ពុជាវិញ ដើម្បីគេចពីគ្រោះមហន្តរាយ និងទៅចម្ការម្រេចរបស់លោក ខឹម វាសនា នៅខេត្តសៀមរាប។
បច្ចុប្បន្ន លោកបានត្រលប់ទៅផ្ទះវិញនៅក្រុងប៉ោយប៉ែត ខេត្តបន្ទាយមានជ័យ ដោយសង្ឃឹមថានឹងអាចចូលធ្វើការវិញបន្ទាប់ពីបុណ្យភ្ជុំបិណ្ឌ ដោយសារលោកត្រូវដោះបំណុលគេ។
កាលពីថ្ងៃទី៩ ខែកញ្ញា ឆ្នាំ២០២២ លោក សេង ហួរ បាននិយាយថា មិនមានអ្វីខុសប្រក្រតីនៅចម្ការរបស់គាត់ [ខឹម វាសនា] នោះទេ។
លោកថា លោកនៅតែជឿលើការទស្សន៍ទាយរបស់លោក ខឹម វាសនា ថានឹងមានទឹកជន់លិចពិភពលោក។ លោកបន្តថា លោកគ្មានជម្រើសឡើយក្រៅពីចាកចេញពីចម្ការ ដោយសារតែជំពាក់បំណុលគេ។
លោក សេង ហួរ បាននិយាយថា៖ «ខ្ញុំនៅតែជឿ ប៉ុន្តែបើខ្ញុំបន្តជឿ គ្មាននរណាជួយដោះបំណុលខ្ញុំឡើយ។ យើងមិនដឹងថាវា [ទឹកជំនន់] កើតឡើងនៅពេលណាពិតប្រាកដនោះទេ។ ម្យ៉ាងវិញទៀត ធនាគារទារប្រាក់ជារៀងរាល់ថ្ងៃ»។
លោកថា លោកជំពាក់បំណុលគេច្រើនណាស់។
លោក សេង ហួរ បាននិយាយថា នៅចម្ការមានបន្ទប់ទឹកចំនួន៥០ អាហារ៣ពេលក្នុងមួយថ្ងៃ និងធម្មទេសនាប្រចាំថ្ងៃដោយលោក ខឹម វាសនា។
លោក សេង ហួរ បានថ្លែងថា អ្នកដែលមិនយល់ ក៏ខ្លាចទឹកជំនន់ដែរ ហើយបាននាំគ្រួសារពួកគេទៅទីនោះ [ចម្ការ]។ លោកបន្តថា មានមនុស្សលើសចំនួន ដោយសារតែមានអ្នកពីខាងក្រៅ [អ្នកមិនយល់] ដែលធ្វើឱ្យពលករមកពីកូរ៉េខាងត្បូង ដូចជារូបគាត់ ត្រូវសង់ជម្រកដោយខ្លួនឯង។
លោកបន្ថែមថា៖ «តាមពិត ពូ[ខឹម វាសនា]បានរៀបចំកន្លែងរស់នៅ និងសម្ភារប្រើប្រាស់រួចហើយ ប៉ុន្តែពេលអ្នកខាងក្រៅ[អ្នកមិនយល់]មក យើងដែលមកពីកូរ៉េគ្មានកន្លែងស្នាក់នៅឡើយ»។
លោកបន្ថែមថា៖ «ពូ[ខឹម វាសនា] ប្រកាសឱ្យតែអ្នកយល់មកប៉ុណ្ណោះ»។
លោក សេង ហួរ បាននិយាយទៀតថា មានមនុស្សដែលយល់ពិតប្រាកដតែ១ ០០០ ទៅ២ ០០០នាក់ប៉ុណ្ណោះ។ លោកបន្តថា ពលករដែលបានត្រលប់មកប្រទេសកម្ពុជាវិញ នឹងមិនទៅប្រទេសកូរ៉េខាងត្បូងវិញទាំងអស់ឡើយ ដោយសារអ្នកខ្លះមានទិដ្ឋាការផុតកំណត់ ហើយពួកគេប្រកបរបរ ឬលក់ដីរបស់ពួកគេ។
លោកបន្ថែមថា៖ «សម្រាប់ខ្ញុំ ខ្ញុំបានប្រាប់ថៅកែថា ខ្ញុំមកលេងទីនេះពីរបីសប្ដាហ៍»។
ដោយប្រាប់ដូច្នេះ លោកសង្ឈឹមថាអាចត្រលប់ទៅធ្វើការវិញបាន។
កាលពីថ្ងៃទី៣១ ខែសីហា ឆ្នាំ២០២២ លោក សេង ហួរ បានចាកចេញពីចម្ការរបស់លោក ខឹម វាសនា ដោយសារលោកនៅជាប់បំណុល។
លោកបាននិយាយថា៖ «ខ្ញុំបានចេញមកដោយមិនប្រាប់អ្នកណាម្នាក់នោះទេ»។
ទោះយ៉ាងណា លោកថា បញ្ហាអ៊ីនធឺណិត និងអគ្គិសនី ធ្វើឱ្យគាត់ពិបាកស្នាក់នៅបន្ត។
ភរិយារបស់លោក សេង ហួរ គឺអ្នកស្រី ម៉ី មិនជឿដូចស្វាមីរបស់អ្នកស្រីឡើយ។ អ្នកស្រីមិនបានទៅចម្ការរបស់លោក ខឹម វាសនា ជាមួយនឹងស្វាមីនោះទេ។ អ្នកស្រីសុំមិនប្រាប់ឈ្មោះពេញឡើយ ដោយបារម្ភថា ម្ចាស់បំណុលនឹងទៅរកអ្នកស្រី ខណៈអ្នកស្រីកំពុងតែស្នាក់នៅក្នុងប្រទេសកម្ពុជា។
អ្នកស្រី ម៉ី បាននិយាយថា អ្នកស្រីបានទៅយកស្វាមីនៅចម្ការក្បែរភ្នំគូលែន កាលពីថ្ងៃទី៣១ ខែសីហា ឆ្នាំ២០២២ ហើយគាត់ហាក់មិនស្រួលខ្លួន។
អ្នកស្រីបន្ថែមថា៖ «គាត់ [ស្វាមីអ្នកស្រី] បានចាកចេញពីចម្ការ ដោយមានរោគសញ្ញាមិនស្រួលខ្លួន និងមានភាពរវើរវាយ»។
អ្នកស្រីបន្ថែមថា៖ «គាត់យល់សប្តិថាមានទឹកជំនន់ និងធ្លាក់យន្តហោះ»។
អ្នកស្រីបាននិយាយថា ស្វាមីរបស់គាត់បានទៅធ្វើការនៅប្រទេសកូរ៉េខាងត្បូង បានតែ៥ខែប៉ុណ្ណោះ ហើយគាត់គិតថា គាត់អាចចូលធ្វើការវិញបាន។
អ្នកស្រីបន្ថែមថា៖ «សំណាងហើយដែលគាត់នៅស្តាប់ខ្ញុំ។ គាត់នៅខ្លាចប្រពន្ធគាត់។ ខ្ញុំបានប្រាប់គាត់ឱ្យសុំការអនុញ្ញាតមកលេងទីនេះ[ផ្ទះ]រយៈពេលពីរសប្តាហ៍»។
នៅចម្ការលោក ខឹម វាសនា លោក សេង ហួរ ត្រូវឈរយាមតាំងពីម៉ោង២ទៀបភ្លឺរហូតដល់ថ្ងៃរះ។ នេះបើយោងតាមសម្តីភរិយារបស់គាត់។
អ្នកស្រីចង់ជួយស្វាមីរបស់គាត់ឱ្យកាត់ផ្តាច់ទំនាក់ទំនងជាមួយគណបក្សសម្ព័ន្ធដើម្បីប្រជាធិបតេយ្យរបស់លោក ខឹម វាសនា ហើយស្វាមីរបស់គាត់ប្រាប់វិញថា បើគ្មានអ្វីកើតឡើងនោះទេ លោកនឹងចាកចេញពីបក្ស។
ទោះយ៉ាងណា កាលពីថ្ងៃទី៩ ខែកញ្ញា ឆ្នាំ២០២២ លោក សេង ហួរ បាននិយាយថា៖ «មិនទាន់ដល់ពេលក្នុងការនិយាយថា លោក ខឹម វាសនា ជាអ្នកខុសឬអត់នោះទេ។ ឥលូវនេះ មិនទាន់មានអ្វីកើតឡើងទេ។ អ៊ីចឹងខ្ញុំទៅរកលុយសិន»។
នៅពេលបញ្ចប់កិច្ចសម្ភាសន៍ លោក សេង ហួរ បាននិយាយថា លោកមានមន្ទិលចំពោះអ្នករាយការណ៍ព័ត៌មានជាស្រ្តី។
លោកថា៖ «ប្រសិនបើអ្នកសរសេរ សូមសរសេរឱ្យបានត្រឹមត្រូវ។ អ្នកកាសែតជាស្រ្តីភាគច្រើនសរសេរខុសពីការពិត។ យើងនិយាយដូច្នេះ ទៅសរសេរដូច្នោះ»៕
បកប្រែនិងសម្រួលចេញពីអត្ថបទដើមភាសាអង់គ្លេស៖ A Husband’s Week Inside Veasna’s Doomsday Farm, and a Wife’s Efforts to Get Him to Leave
