ស្របពេលដែលអាជ្ញាធរខេត្តប្រកាស និងបើកប្រតិបត្តិការចុះត្រួតពិនិត្យទីតាំងដែលជាប់ពាក់ព័ន្ធនឹងការបង្ខាំងមនុស្សដោយខុសច្បាប់ ការធ្វើទារុណកម្ម និងការជួញដូរមនុស្ស នៅទូទាំងក្រុងព្រះសីហនុ ប្រជាពលរដ្ឋក្នុងតំបន់លើកឡើងថា ក្រុមហ៊ុននានាហាក់កំពុងតែចាកចេញដោយទុកអគារទាំងឡាយចោល។
យោងតាមសេចក្ដីប្រកាសព័ត៌មានចេញកាលពីថ្ងៃទី១៨ ខែកញ្ញា ដោយរដ្ឋបាលខេត្តព្រះសីហនុ សមត្ថកិច្ចបានចុះត្រួតពិនិត្យទីតាំងមួយកន្លែងក្នុងសង្កាត់លេខ៣ ក្រុងព្រះសីហនុ រយៈពេល៥ថ្ងៃ ចាប់ពីថ្ងៃទី១៣ ដល់ថ្ងៃទី១៧ ខែកញ្ញា ដែលក្នុងនោះ ជនសង្ស័យចំនួន១២នាក់ត្រូវបានបញ្ជូនទៅសាកសួរនៅស្នងការដ្ឋាននគរបាលខេត្ត ខណៈសមត្ថកិច្ចក៏បានរកឃើញករណីជនបរទេសធ្វើការងារដោយគ្មានបណ្ណការងារផងដែរ។
អាគារដែលអាជ្ញាធរចុះត្រួតពិនិត្យនិងបង្រ្កាបនេះមានឈ្មោះថា ស៊ីង សាន ទីង (Xinshan Great Wall Park) ដែលក្នុងនោះ សមត្ថកិច្ចក៏បានរកឃើញករណីបង្ខាំងមនុស្ស ទារុណកម្មដោយខុសច្បាប់ បទល្មើសសញ្ចារកម្ម ការជួញដូរមនុស្ស កើតឡើងនៅក្នុងទីតាំងមួយនេះផងដែរ។
សេចក្ដីប្រកាសព័ត៌មានដដែលបន្តថា ក្រោយពីស្រាវជ្រាវបានចំនួន៥ថ្ងៃកន្លងមកនេះ សមត្ថកិច្ចចម្រុះបានរកឃើញជនបរទេសខុសច្បាប់អន្តោប្រវេសន៍ចំនួន១៤១នាក់ ក្នុងនោះមានជនជាតិចិនចំនួន១៣០នាក់ និងជនជាតិវៀតណាមចំនួន១១នាក់ ដោយបានបញ្ជូនទៅនាយកដ្ឋានស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្តោប្រវេសន៍ ដើម្បីបណ្តេញចេញពីកម្ពុជា។
ក្រៅពីនោះ សមត្ថកិច្ចក៏បានរកឃើញជនបរទេសចំនួន២៦២នាក់ធ្វើការងារដោយគ្មានបណ្ណការងារ ហើយអាជ្ញាធរក៏បានផាកពិន័យតាមផ្លូវច្បាប់ផងដែរ។
ប្រភពខាងលើបន្ថែមថា កម្លាំងចម្រុះបានឃាត់ខ្លួនជនបរទេសចំនួន២៧នាក់ (ជនសង្ស័យ១២នាក់ ជនរងគ្រោះ៥នាក់ និងនារីបម្រើសេវាផ្លូវភេទ ១០នាក់) និងដកហូតនូវវត្ថុតាងមួយចំនួន ដូចជា ទូរសព្ទដៃសរុប៨ ៧៧៦គ្រឿង កុំព្យូទ័រលើតុ៨០៤គ្រឿង កុំព្យូទ័រយួរដៃ១៦គ្រឿង លិខិតឆ្លងដែន៣៦ក្បាល ឧបករណ៍ផ្ទុកទិន្នន័យ១២គ្រឿង ខ្នោះដៃ៤គូ ដំបងឆក់៨ដើម ពិលឆក់២ដើម រួមទាំងសម្ភារ ឯកសារ និងប្រាក់មួយចំនួន។
ពាក់ព័ន្ធនឹងករណីនេះ ទីតាំងអគារពាណិជ្ជកម្មខាងលើនេះ បច្ចុប្បន្ន ក៏ត្រូវបានអាជ្ញាធរសម្រេចឱ្យបិទអាជីវកម្ម និងបិទអគារទាំងមូល ដើម្បីបន្តស៊ើបអង្កេតផងដែរ ខណៈសមត្ថកិច្ចក៏នឹងបន្តស៊ើបអង្កេតបទល្មើសសម្អាតប្រាក់ ល្បែងស៊ីសងខុសច្បាប់ និងរក្សាទុកអាវុធខុសច្បាប់ និងបន្តស្រាវជ្រាវ តាមចាប់ខ្លួនមេខ្លោងម្នាក់ដែលបានរត់គេចខ្លួនផងដែរ។
យោងតាមការឱ្យដឹងពីអ្នកយកព័ត៌មានមួយរូប បរិវេណទីតាំងមួយដែលកាលពីពេលកន្លងទៅត្រូវបានស្គាល់ថាជា Bing Cheng នេះ ហាក់ត្រូវបានទុកចោល គិតត្រឹមយប់ថ្ងៃអាទិត្យ។
ក្រុមហ៊ុនដែលមានឈ្មោះថា Bing Cheng International Entertainment ត្រូវបានចុះក្នុងបញ្ជីក្រសួងពាណិជ្ជកម្ម ដោយដាក់ឈ្មោះ អ៊ឹង វណ្ណរិទ្ធ ជាជនជាតិខ្មែរមួយរូបដែលកាលពីពេលកន្លងទៅធ្លាប់ជានាយកក្រុមហ៊ុនមួយឈ្មោះថា Xi Gang Hong Da Properties។
យោងតាមសេចក្តីប្រកាសព័ត៌មានមួយទៀតរបស់រដ្ឋបាលខេត្តព្រះសីហនុ ចេញថ្ងៃទី១៩ ខែកញ្ញា ក្នុងនោះសមត្ថកិច្ចក៏បានបើកការចុះត្រួតពិនិត្យរដ្ឋបាលនៅទីតាំងចំនួន៣កន្លែងបន្ថែមទៀត ក្នុងភូមិសាស្ត្រក្រុងព្រះសីហនុផងដែរ។
ទីតាំងចំនួន៣ខាងលើនេះ រួមមាន ហ្កាឡាក់ស៊ីវើល (Galaxy World) ស្ថិតនៅក្នុងសង្កាត់លេខ៤, ជីងឆាយ ៥ (Jincai 5) ក្នុងសង្កាត់លេខ៥ និង ប៉ាវយ៉ុងតិចណូឡូជី (Pao Yong Technology) ក្នុងសង្កាត់លេខ៤។
អ្នកយកព័ត៌មានមួយរូប នៅថ្ងៃចន្ទម្សិលមិញនេះ ក៏បានទៅកាន់ទីតាំងអាគារ ជីងឆាយ៥ ផងដែរ ប៉ុន្តែត្រូវបានរារាំងដោយមន្រ្តីយោធាម្នាក់ ដោយលើកឡើងថា មិនអនុញ្ញាតឱ្យមនុស្សចូលឬចេញពីបរិវេណនោះទេ លុះត្រាតែពួកគេបង្ហាញអត្តសញ្ញាណ ខណៈសម្រាប់ទីតាំង ហ្កាឡាក់ស៊ីវើល វិញ គឺហាក់មានសភាពស្ងប់ស្ងាត់។
ក្រុមហ៊ុនមួយដែលមានឈ្មោះថា ហ្កាឡាក់ស៊ីវើល គឺកាន់កាប់ដោយបុគ្គលបីរូបដែលរួមមានឈ្មោះ ហ៊ុន ឆរ័ត្ន, សុខ ដារ៉ា និង ស ណារិន ខណៈក្រុមហ៊ុនមួយទៀតឈ្មោះថា Galaxy World (Cambodia) Trading Center Platform Online គឺដឹកនាំដោយនាយកជាជនជាតិខ្មែរម្នាក់ឈ្មោះថា មាស វណ្ណៈ។
សហគ្រិនម្នាក់ខាងលើដែលមានឈ្មោះថា សុខ ដារ៉ា ក៏ត្រូវបានស្គាល់ថាជាអតីតនាយកក្រុមហ៊ុន Fairplay Entertainment ក៏ដូចជានាយកកាស៊ីណូ White Sand Palace ដែលជាទីតាំងមានករណីឆបោកផងដែរ។
ស្របពេលមានប្រតិបត្តិការចុះត្រួតពិនិត្យទីតាំងនានាក្នុងក្រុងព្រះសីហនុនេះ តំបន់ឆៃណាថោន ក្នុងសង្កាត់លេខ៤ ដែលស្គាល់ថាជាទីតាំងសម្បូរទៅដោយពលកម្មដោយបង្ខំនៅក្នុងក្រុមហ៊ុនអនឡាញ ក៏ត្រូវបានសង្កេតឃើញថាមានសភាពស្ងប់ស្ងាត់ផងដែរ។
អ្នកយកព័ត៌មានមួយរូបបានឱ្យដឹងថា រូបគេបានឃើញប៉ូលិសនៅក្នុងបរិវេណនោះ ខណៈខ្លួនអាចចូលតាមច្រកទ្វាររវាងអគារការិយាល័យដែលជាធម្មតាត្រូវបានយាមកាមយ៉ាងតឹងរ៉ឹង។
ថ្លែងប្រាប់អ្នកយកព័ត៌មានសន្តិសុខយាមនៅអគារ Kaibo (KB) មួយរូប បានអះអាងថា មនុស្សជាង១ពាន់នាក់បានចាកចេញពីបរិវេណនេះកាលពីថ្ងៃអាទិត្យ ដោយមានមួយចំនួនបានធ្វើដំណើរទៅកាន់តំបន់អូរស្មាច់ ខេត្តឧត្តរមានជ័យ។
ទាក់ទិននឹងករណីនេះ អ្នកបើករ៉ឺម៉កកង់បីម្នាក់ក៏បានឱ្យដឹងផងដែរថា មិត្តរបស់គាត់ម្នាក់បានបើកដឹកជនជាតិចិនចេញពីសង្កាត់លេខ៤នេះតាំងពីខែមុនមកម្ល៉េះ ដោយក្នុងមួយពេល គឺមានឡានក្រុងចេញចាប់ពី៥ទៅ៦គ្រឿង។
លោកថា៖ «ករណីនេះមើលទៅដូចជាការជួញដូរសត្វធាតុអ៊ីចឹង។ ជនជាតិចិនទាំងនេះត្រូវបានចាត់ទុកដូចជាទាសករ។ ពួកគេធ្វើការដោយទទួលបានតែអាហារដើម្បីទទួលទានប៉ុណ្ណោះ ហើយមិនទទួលបានប្រាក់ឈ្នួលអ្វីឡើយ។ ហើយនៅពេលដែលពួកគេចាកចេញ គឺពួកគេគ្មានទទួលបានអ្វីទាំងអស់»។
ជាមួយគ្នានេះ សន្តិសុខមួយរូបទៀតនៅតំបន់ឆៃណាថោនក៏បានឱ្យដឹងផងដែរថា កម្មករជនជាតិចិន វៀតណាម និងខ្មែរទាំងអស់បានចាកចេញអស់ហើយ ហើយអាជីវកម្មនៅក្នុងបរិវេណនោះមិនត្រូវបានអនុញ្ញាតឱ្យដំណើរការទៀតទេ។
លោកអះអាងថា៖ «ពួកគេទាំងអស់នេះ គឺសុទ្ធសឹងតែជាអ្នកមកដោយខុសច្បាប់ ដូច្នេះហើយពួកគេខ្លាចប៉ូលិសកម្ពុជាខ្លាំងណាស់»។
ខណៈអ្នកយកព័ត៌មានចូលទៅកៀកនឹងទីតាំងមួយនៃតំបន់ឆៃណាថោន ក្នុងនោះគេសង្កេតឃើញមានកម្មករបីនាក់កំពុងតែកាត់បន្លាលួសចេញពីបរិវេណមួយ។
កម្មករម្នាក់បានលើកឡើងថា៖ «យើងត្រូវតែកាត់បន្លាលួសទាំងនេះចោល ដើម្បីកុំឱ្យប៉ូលិសមើលឃើញថា វាដូចជាទីតាំងដែលមានការបង្ខាំងមនុស្ស។ ជាក់ស្ដែង [ការដាក់បន្លាលួស] គឺយើងមិនបានបង្ខាំងនរណាម្នាក់មិនឱ្យរត់ចេញពីអគារនោះទេ ប៉ុន្តែយើងមិនអាចដាក់បន្លាលួសនេះបានទេ នៅពេលដែលប៉ូលិសចុះមក ដែលវាអាចនឹងមានបញ្ហា។ ដូច្នេះហើយ យើងត្រូវតែកាត់វាចេញ»។
សារព័ត៌មានស៊ីស៊ីថាមស៍ (The Cambodia China Times) ក៏បានរាយការណ៍ពីការចុះបង្រ្កាបមួយកាលពីថ្ងៃអាទិត្យ នៅការិយាល័យរបស់ក្រុមហ៊ុន ZhengHeng New Energy ក្នុងខេត្តព្រះសីហនុផងដែរ។
ទាក់ទិននឹងករណីនេះ មន្ត្រីប៉ូលិសម្នាក់ដែលសុំមិនបញ្ចេញឈ្មោះ បានប្រាប់សារព័ត៌មានខាងលើថា មនុស្សយ៉ាងហោចណាស់១០នាក់ក៏ត្រូវបានចាប់ខ្លួនពីអគារមួយទៀតក្នុងសង្កាត់លេខ៤ ក្រុងព្រះសីហនុ កាលពីយប់ថ្ងៃអាទិត្យផងដែរ។
យោងតាមការចុះបញ្ជីពាណិជ្ជកម្មរបស់ក្រសួងពាណិជ្ជកម្ម ក្រុមហ៊ុន ZhengHeng New Energy នេះដឹកនាំដោយជនជាតិចិនមួយរូបមានឈ្មោះ Zhu Ronghui ដែលមានការិយាល័យនៅក្នុងបុរី Elite Town កោះពេជ្រ ខណៈក្រុមហ៊ុននេះក៏ត្រូវបានរកឃើញថាមានទំនាក់ទំនងនឹងក្រុមហ៊ុន ZhengHeng Group នៅភ្នំពេញផងដែរ។
គួរបញ្ជាក់ថា ក្រុមហ៊ុន Zhengheng Group កាលពីដើមខែនេះ ក៏ធ្លាប់បានស្នើ និងសន្យាផ្តល់ប្រាក់មួយចំនួនឱ្យវីអូឌីផងដែរ ជាថ្នូរនឹងការដកឈ្មោះក្រុមហ៊ុនរបស់ខ្លួនចេញពីអត្ថបទព័ត៌មានមួយដែលបានផ្សាយអំពីប្រតិបត្តិការឆបោកនៅគម្រោងរបស់ក្រុមហ៊ុន យូញៀន ឌីវីឡុបមិន គ្រុប (Union Development Group) ក្នុងខេត្តកោះកុង៕
បកប្រែនិងសម្រួលចេញពីអត្ថបទដើមភាសាអង់គ្លេស៖ Eerie Silence Descends on Notorious Sihanoukville Scam Compounds
