អាជ្ញាធរអំពាវនាវឱ្យប្រជាពលរដ្ឋចូលរួមយុទ្ធនាការបោសសម្អាតកុងស៊ីបញ្ចាំខុសច្បាប់ ដើម្បីលុបបំបាត់អំពើចោរកម្ម ល្បែងស៊ីសង និងការចែកចាយ-ការប្រើប្រាស់គ្រឿងញៀន នៅទូទាំងរាជធានីភ្នំពេញ។
អភិបាលរងរាជធានីភ្នំពេញ លោក ឃ្លាំង ហួត បានសរសេរសារនៅលើបណ្ដាញសង្គមហ្វេសប៊ុករបស់លោក នៅថ្ងៃទី២៦ ខែកញ្ញានេះថា កុងស៊ីទទួលបញ្ចាំដែលត្រូវមានវិធានការដាក់ទោសតាមច្បាប់ ដោយសារមានទទួលបញ្ចាំរបស់ចោរ គ្មានឯកសារ យកការប្រាក់ខ្ពស់ខុសច្បាប់ និងទទួលបញ្ចាំមិនបង់ពន្ធដារជូនរដ្ឋ ជាដើម។
ករណីនេះ លោកបានអំពាវនាវឱ្យប្រជាជនរស់នៅរាជធានីភ្នំពេញទាំងអស់ត្រូវចូលរួមសហការជាពលរដ្ឋល្អ ក្នុងយុទ្ធនាការបោសសម្អាតកុងស៊ីបញ្ចាំខុសច្បាប់ទាំងនោះ ដើម្បីលុបបំបាត់អំពើចោរកម្មនានា លុបបំបាត់ល្បែងស៊ីសងខុសច្បាប់ និងលុបបំបាត់ការចែកចាយ-ប្រើប្រាស់គ្រឿងញៀន នៅទូទាំងរាជធានី។
កាលពីថ្ងៃទី២៤ ខែកញ្ញានេះ អភិបាលរងរាជធានីភ្នំពេញ លោក ឃ្លាំង ហួត បានសហការជាមួយមន្ត្រីជំនាញ បានចុះទៅស្រាវជ្រាវនៅសង្កាត់ទឹកល្អក់ទី៣ ខណ្ឌទួលគោក ដោយក្នុងនោះរកឃើញហាងបញ្ចាំចំនួន១៣ អត់មានច្បាប់អនុញ្ញាត ហើយសមត្ថកិច្ចបានដកហូតបានម៉ូតូចំនួន១ ១១៣គ្រឿង, រថយន្តចំនួន១៤គ្រឿង, ម៉ូតូកង់បីចំនួន៩គ្រឿង, Passapp ចំនួន១២គ្រឿង ព្រមទាំងឃាត់ខ្លួនម្ចាស់ទីតាំង និងបុគ្គលិកចំនួន៩នាក់ ក្នុងនោះមានមេខ្លោងម្នាក់ ត្រូវកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ ដើម្បីចាត់វិធានការច្បាប់បន្ត។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង សង្កេតឃើញថា អំពើល្មើសចោរកម្ម លួច ឆក់ និងបទល្មើសផ្សេងៗទៀត ភាគច្រើនកើតចេញពីការយករបស់ទ្រព្យទៅបញ្ចាំនៅហាងបញ្ចាំខុសច្បាប់។ ករណីនេះ លោកជំរុញទៅអាជ្ញាធរធ្វើការស្រាវជ្រាវ និងចុះបង្ក្រាបលើម្ចាស់ហាងបញ្ចាំខុសច្បាប់ទាំងអស់ និងពង្រឹងការអនុវត្តច្បាប់ ដោយមិនប្រកាន់បក្ខពួក ទើបអាចកាត់បន្ថយនូវអំពើល្មើសផ្សេងៗបានប្រសិទ្ធភាពខ្ពស់ ។
លោកថា៖ «ពលរដ្ឋតែងតែគិតថា អាជ្ញាធរហ្នឹងមិនហ៊ានបង្ក្រាបកន្លែងហាងអ្នកមានខ្សែធំៗ បង្ក្រាបបានតែត្រីចង្វារ ត្រីរ៉ស់ ត្រីឆ្ដោ មិនហ៊ានប៉ះពាល់ ទុកឱ្យធ្វើសកម្មភាពងងើលដដែល ហើយបញ្ហាដែលកើតឡើងនៅក្នុងសង្គម ដូចជា លួច ឆក់ និងអំពើខុសច្បាប់ផ្សេងៗនៅតែបន្តកើតមានដដែល។ អ៊ីចឹងអាជ្ញាធរត្រូវហ៊ានធ្វើការបង្ក្រាបដោយមោះមុត ទាំងកន្លែងម្ចាស់ហាងបញ្ចាំតូច កន្លែងធំ ត្រូវអនុវត្តច្បាប់ឱ្យបានស្មើគ្នា ដើម្បីកែប្រែការគិតរបស់ប្រជាពលរដ្ឋទៅលើអាជ្ញាធរទៀត»៕