ក្រសួងសាធារណការ និងដឹកជញ្ជូន អនុញ្ញាតឱ្យសាធារណជនប្រើប្រាស់សាកល្បងផ្លូវល្បឿនលឿនភ្នំពេញ-ក្រុងព្រះសីហនុ ដោយឥតគិតថ្លៃរយៈពេល១ខែ ដោយចាប់ផ្ដើមពីដើមខែរហូតដល់ចុងខែតុលា ខាងមុខនេះ។
ក្នុងសេចក្ដីជូនដំណឹងរបស់ក្រសួងសាធារណការ និងដឹកជញ្ជូន ចុះថ្ងៃទី២៧ ខែកញ្ញានេះ បានឱ្យដឹងថា គម្រោងសាងសង់ផ្លូវល្បឿនលឿនភ្ជាប់ពីរាជធានីភ្នំពេញ ទៅក្រុងព្រះសីហនុ ខេត្តព្រះសីហនុ ដែលវិនិយោគសាងសង់ដោយក្រុមហ៊ុនសាជីវកម្មស្ពាននិងថ្នល់ចិន (CRBC) ជាផ្លូវល្បឿនលឿនដំបូងបង្អស់នៅក្នុងប្រទេសកម្ពុជា និងជាផ្លូវដែលតម្រូវឱ្យបង់ប្រាក់សម្រាប់អ្នកប្រើប្រាស់ផ្លូវនេះ។
ប្រភពដដែលបន្តថា ក្រសួងនិងក្រុមហ៊ុនវិនិយោគនឹងអនុញ្ញាតឱ្យសាធារណជនប្រើប្រាស់ផ្លូវល្បឿនលឿននេះដោយឥតគិតថ្លៃ ក្នុងរយៈពេល១ខែ គិតចាប់ពីថ្ងៃទី១ ដល់ថ្ងៃទី៣១ ខែតុលា ឆ្នាំ២០២២ ហើយចំពោះយានយន្តដែលអនុញ្ញាតឱ្យប្រើប្រាស់ រួមមាន រថយន្តគ្រប់ប្រភេទ ដែលមានល្បឿនអតិបរមាលើសពី ៧០គ.ម/ម៉ោង (កំណត់ពីរោងចក្រ) និងទោចក្រយានយន្តដែលមានទំហំស៊ីឡាំងចាប់ពី ៥០០CC ឡើងទៅ។ ប៉ុន្តែក្រសួង និងអាជ្ញាធរសមត្ថកិច្ច និងប្រតិបត្តិករផ្លូវល្បឿនលឿន មានសិទ្ធិបដិសេធ មិនអនុញ្ញាតឱ្យបុគ្គលណាប្រើប្រាស់ផ្លូវល្បឿនលឿន និងចាត់វិធានការតាមផ្លូវច្បាប់ ក្នុងករណីមិនអនុវត្តតាមការណែនាំ។
សេចក្តីជូនដំណឹងដដែលបានក្រើនរំឭកដល់សាធារណជនឱ្យចូលរួមគោរពបទបញ្ជា និងសេចក្តីណែនាំនានាឱ្យបានខ្ជាប់ខ្ជួន ដើម្បីថែរក្សាសណ្តាប់ធ្នាប់ សុវត្ថិភាព និងបង្ការគ្រោះថ្នាក់ជាយថាហេតុ ចំពោះការប្រើប្រាស់ផ្លូវល្បឿនលឿននេះ៕