ក្រសួងការបរទេសកូរ៉េខាងជើង បាននិយាយថា ប្រទេសកូរ៉េខាងជើង គាំទ្រការប្រកាសរបស់រុស្ស៊ី ក្នុងការដាក់បញ្ចូលតំបន់មួយចំនួននៃអ៊ុយក្រែនជាទឹកដីរបស់ខ្លួន និងបានចោទប្រកាន់សហរដ្ឋអាមេរិកថា បានជ្រៀតជ្រែកកិច្ចការផ្ទៃក្នុងរបស់ប្រទេសដទៃ។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters នៅថ្ងៃទី៤ ខែតុលា ឆ្នាំ២០២២នេះ។
ប្រព័ន្ធផ្សព្វផ្សាយរបស់កូរ៉េខាងជើង KCNA បានរាយការណ៍ថា កូរ៉េខាងជើងគាំទ្រទីក្រុងម៉ូស្គូក្នុងការដាក់បញ្ចូលផ្នែកខ្លះនៃប្រទេសអ៊ុយក្រែនជាទឹកដីរបស់ខ្លួន ដែលត្រូវបានថ្កោលទោសដោយក្រុមប្រឹក្សាសន្តិសុខអង្គការសហប្រជាជាតិ។
ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី និងមេដឹកនាំលោកខាងលិច បានថ្កោលទោសការបោះឆ្នោតប្រជាមតិនេះថា ជាការក្លែងបន្លំ ដោយទីក្រុងវ៉ាស៊ីនតោន បានជំរុញឱ្យរដ្ឋជាសមាជិករបស់អង្គការសហប្រជាជាតិ មិនទទួលស្គាល់ស្ថានភាពផ្លាស់ប្តូរណាមួយរបស់អ៊ុយក្រែន និងឱ្យរុស្ស៊ីដកទ័ពរបស់ខ្លួនចេញពីតំបន់ដែលខ្លួនបានដណ្តើមយក។
លោក ចូ ជុលស៊ូ (Jo Chol Su) អគ្គនាយកអង្គការអន្តរជាតិ នៅក្រសួងការបរទេសរបស់ទីក្រុងព្យុងយ៉ាង បាននិយាយថា ការធ្វើប្រជាមតិត្រូវបានធ្វើឡើងដោយស្របច្បាប់ស្របតាមធម្មនុញ្ញរបស់អង្គការសហប្រជាជាតិ ប៉ុន្តែសហរដ្ឋអាមេរិកកំពុងឈ្លានពានប្រទេសផ្សេងទៀតដើម្បីរក្សាឧត្តមភាពរបស់ខ្លួន។
លោក Jo បានលើកឡើងនៅក្នុងសេចក្តីថ្លែងការណ៍មួយ ដែលត្រូវបានរាយការណ៍ដោយ KCNA ថា សហរដ្ឋអាមេរិកជ្រៀតជ្រែកកិច្ចការផ្ទៃក្នុងនៃប្រទេសឯករាជ្យ និងរំលោភសិទ្ធិស្របច្បាប់របស់ប្រទេសទាំងនោះ ដោយបំពានលើក្រុមប្រឹក្សាសន្តិសុខអង្គការសហប្រជាជាតិ។
លោក Jo Chol Su បន្ថែមថា៖ «សហរដ្ឋអាមេរិក បានធ្វើសង្រ្គាមឈ្លានពានប្រឆាំងនឹងរដ្ឋអធិបតេយ្យ រួមទាំងអតីតយូហ្គោស្លាវី អាហ្វហ្គានីស្ថាន និងអ៊ីរ៉ាក់ ប៉ុន្តែសហរដ្ឋអាមេរិកមិនត្រូវបានកោះហៅដោយ ក្រុមប្រឹក្សាសន្តិសុខអង្គការសហប្រជាជាតិឡើយ»។
លោក Jo បាននិយាយថា ក្រុមប្រឹក្សាសន្តិសុខអង្គការសហប្រជាជាតិ នឹងប្រឈមមុខនឹងផលវិបាក ប្រសិនបើធ្វើតាមទីក្រុងវ៉ាស៊ីនតោន ដែលប្រកាន់យកនូវឥរិយាបថក្រអឺតក្រទម តាមទំនើងចិត្ត និងលម្អៀង។
អ៊ុយក្រែន បានផ្តាច់ទំនាក់ទំនងជាមួយកូរ៉េខាងជើង កាលពីខែកក្កដា ឆ្នាំ២០២២ បន្ទាប់ពីទីក្រុងព្យុងយ៉ាងបានទទួលស្គាល់សាធារណរដ្ឋចំនួន២ ដែលប្រកាសផ្តាច់ខ្លួនចេញពីភាគខាងកើតអ៊ុយក្រែន។
សហរដ្ឋអាមេរិក បានលើកឡើងកាលពីខែមុនថា រុស្ស៊ីទិញគ្រាប់រ៉ុក្កែត និងគ្រាប់ផ្លោងរាប់លានគ្រាប់ពីកូរ៉េខាងជើង សម្រាប់ប្រើប្រាស់ក្នុងសង្រ្គាមនៅអ៊ុយក្រែន។
ទោះយ៉ាងណា កូរ៉េខាងជើង បានច្រានចោលការលើកឡើងនេះ ដោយព្រមានក្រុងវ៉ាស៊ីនតោនឱ្យ «បិទមាត់» និងឈប់បង្កើតពាក្យចចាមអារ៉ាមដែលធ្វើឱ្យប៉ះពាល់ដល់មុខមាត់របស់ខ្លួន។
គួរបញ្ជាក់ថា ភាពតានតឹងរវាងរុស្ស៊ី និងអ៊ុយក្រែន ក្នុងរយៈពេលចុងក្រោយនេះ បានចាប់ផ្ដើមកើនឡើងខ្លាំង បន្ទាប់ពីរុស្ស៊ីបានបើកការឈ្លានពានទ្រង់ទ្រាយធំទៅលើប្រទេសក្បែរខាងរបស់ខ្លួនមួយនេះ ដែលធ្វើឡើងបន្ទាប់ពីការប្រកាសសង្រ្គាមដោយប្រធានាធិបតី លោក វ្លាឌីមៀរ ពូទីន។
រុស្ស៊ី បានបើកការឈ្លានពានទ្រង់ទ្រាយធំរបស់ខ្លួនទៅលើអ៊ុយក្រែនតាមផ្លូវគោក ផ្លូវអាកាស និងសមុទ្រ កាលពីថ្ងៃទី២៤ ខែកុម្ភៈ ឆ្នាំ២០២២ ដែលបានធ្វើឱ្យបណ្ដាប្រទេសមួយចំនួននៅលើពិភពលោកសម្រេចដាក់ទណ្ឌកម្មយ៉ាងធ្ងន់ធ្ងរជាបន្តបន្ទាប់លើរុស្ស៊ី៕
