លោកនាយករដ្ឋមន្ត្រី ហ៊ុន សែន ថ្លែងថា រដ្ឋាភិបាលបានផ្តល់ និងត្រៀមផ្តល់សាច់ប្រាក់ជូនប្រជាពលរដ្ឋមិនតិចជាង ២លាននាក់បន្ថែមទៀត ដើម្បីកាត់បន្ថយភាពក្រីក្រ ហើយលោកស្នើទៅគណបក្សនយោបាយ និងសង្គមស៊ីវិល មានការយោគយល់កុំចាត់ទុកថា ការធ្វើរបស់រដ្ឋាភិបាលជាល្បែងទាញយកសន្លឹកឆ្នោតនៅឆ្នាំ២០២៣ខាងមុខនេះ។
ក្នុងសន្និសីទស្តីពី«ចក្ខុវិស័យកម្ពុជាឆ្នាំ២០២២» នាព្រឹកថ្ងៃព្រហស្បតិ៍នេះ លោកនាយករដ្ឋមន្ត្រី ហ៊ុន សែន បានថ្លែងថា ដើម្បីតម្រង់ទិសដៅអភិវឌ្ឍសង្គម និងសេដ្ឋកិច្ចកម្ពុជា រាជរដ្ឋាភិបាលបានដាក់ចេញនូវយុទ្ធសាស្ត្រចតុកោណចំនួន ៤ដំណាក់កាលរួចមកហើយ។
លោកថ្លែងបន្តថា នៅក្នុងយុទ្ធសាស្ត្រចតុកោណនោះ រាជរដ្ឋាភិបាលក៏បានកំណត់យកចំណុចសំខាន់ៗជាងគេនោះគឺ «មនុស្ស» ជាវិស័យអាទិភាពចម្បងបំផុត ក្នុងចំណោមវិស័យអាទិភាពផ្សេងទៀតរួមមាន ផ្លូវ ទឹក និងភ្លើង។ លោកបញ្ជាក់ថា ការផ្តោតការយកចិត្តទុកដាក់លើការអភិវឌ្ឍធនធានមនុស្ស ដើម្បីបង្កើតការងារ និងកាត់បន្ថយភាពក្រីក្រជាដើម។
ករណីនេះ លោកនាយករដ្ឋមន្ត្រី ហ៊ុន សែន ថា រដ្ឋាភិបាលសម្រេចផ្តល់ និងត្រៀមផ្តល់សាច់ប្រាក់ជូនប្រជាពលរដ្ឋរាប់លាននាក់បន្ថែមទៀត ដើម្បីកាត់បន្ថយភាពក្រីក្រ ហើយលោកស្នើទៅសង្គមស៊ីវិល និងគណបក្សនយោបាយ មានការយោគយល់ កុំចាត់ទុកថា ការធ្វើរបស់រដ្ឋាភិបាលជាល្បែងទាញយកសន្លឹកឆ្នោតនៅឆ្នាំ២០២៣ខាងមុខនេះ ។
លោក ហ៊ុន សែន ថ្លែងថា៖ «រដ្ឋត្រូវអន្តរាគមន៍តាមរយៈផ្តល់សាច់ប្រាក់ បើតាមការប៉ាន់ស្មានគឺមានប្រហាក់ប្រហែលជា ៦០ម៉ឺនគ្រួសារ និងប្រជាជនមិនតិចជាង ២លាននាក់បន្ថែមទៀត ដូច្នេះយើងត្រូវរ៉ាប់រងទាំងបញ្ហាកូវីដ ទាំងបញ្ហានូវការដាក់ចេញនូវយន្តការចេញសាច់ប្រាក់ សម្រាប់គាំពារប្រជាពលរដ្ឋ សម្រាប់ឆ្លើយតបនិងអតិផរណា គឺយើងទទួលបន្ទុកចិញ្ចឹមប្រជាជនជិត ៥លាននាក់ មិនមែនជាការប៉ាវចិញ្ចឹមទេ ប៉ុន្តែជាការប៉ះប៉ូវ ដើម្បីកុំឱ្យពួកគាត់ធ្លាក់ទៅក្រោមបន្ទាត់ភាពក្រីក្រ»។
លោក ហ៊ុន សែន ថ្លែងបន្តថា៖ «ហើយខ្ញុំក៏សំណូមពរឱ្យបណ្តាបក្សនយោបាយ សង្គមស៊ីវិល យោគយល់ចំពោះរាជរដ្ឋាភិបាល កុំចាត់ទុកថា ការធ្វើរបស់រាជរដ្ឋាភិបាល ដើម្បីជាល្បែងសម្រាប់ទាញយកសន្លឹកឆ្នោតនៅឆ្នាំ២០២៣ខាងមុខ ខ្ញុំសង្ឃឹមថា ក្រុមគ្រួសារដែលគ្រប់លក្ខខណ្ឌដែលត្រូវទទួល និងទទួលបានផលប្រយោជន៍ មិនមែនជាបញ្ហាលេងសើចសម្រាប់បញ្ហានយោបាយទេ ក៏ប៉ុន្តែគឺជាការទទួលខុសត្រូវធំណាស់ចំពោះមុខប្រវត្តិសាស្ត្ររបស់ជាតិយើង»។
ប្រធានគណបក្សឆន្ទៈខ្មែរ លោក គង់ មុនីកា សង្កេតឃើញថា កន្លងមក រដ្ឋាភិបាលផ្តល់សាច់ប្រាក់ជូនប្រជាពលរដ្ឋ ដើម្បីកាត់បន្ថយភាពក្រីក្រនោះ គឺការអនុវត្តជាក់ស្តែង អ្នកដែលទទួលបានប្រាក់នោះភាគច្រើនជាសែស្រឡាយអាជ្ញាធរមូលដ្ឋាន ខណៈពលរដ្ឋក្រីក្រភាគច្រើនមិនទទួលបានប្រាក់ទាំងនោះឡើយ។
លោកបន្តថា បើរដ្ឋាភិបាលមិនផ្តល់ប្រាក់ជូនប្រជាពលរដ្ឋក្រីក្រឱ្យចំគោលដៅទេ នឹងធ្វើឱ្យគណបក្សកាន់អំណាចបាត់បង់ប្រជាប្រិយ ហើយជាឱកាសធ្វើឱ្យគណបក្សប្រឆាំងទទួលបានសំឡេងគាំទ្រពីប្រជាពលរដ្ឋទៅវិញ។
លោក គង់ មុនីកា មានប្រសាសន៍ថា៖ «ចំណាយមិនចំគោលដៅមានន័យថា វាធ្វើឱ្យខាតបង់ថវិកាជាតិ ហើយប្រជាពលរដ្ឋដែលរងគ្រោះ ក្រីក្រ គឺនៅតែបន្តរងគ្រោះ នៅតែបន្តខ្វះខាត […] នៅពេលនោះ គណបក្សនយោបាយ[បក្សប្រឆាំង]នឹងទាញយកសំឡេងពីបញ្ហាទាំងអស់ហ្នឹងហើយ»។
នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ លោក អំ សំអាត មានប្រសាសន៍ថា សង្គមស៊ីវិលធ្វើការមិនមាននិន្នាការគាំទ្របក្សនយោបាយណាមួយនោះទេ ពីព្រោះសង្គមស៊ីវិលធ្វើការងារលើកកម្ពស់សិទ្ធិមនុស្ស ស្របតាមគោលការណ៍ប្រជាធិបតេយ្យ សេរី ពហុបក្ស។
ចំណែករដ្ឋាភិបាលប្រកាសផ្តល់ និងត្រៀមផ្តល់សាច់ប្រាក់ជូនប្រជាពលរដ្ឋ ដើម្បីកាត់បន្ថយភាពក្រីក្ររបស់ប្រជាពលរដ្ឋនោះ លោកសាទរ ប៉ុន្តែលោកស្នើទៅរដ្ឋាភិបាលផ្តល់សាច់ប្រាក់នោះ ជូនប្រជាពលរដ្ឋដោយកុំប្រកាន់បក្ខពួកនិយម និងធ្វើជារៀងរហូត កុំធ្វើតែពេលបោះឆ្នោតខិតជិតមកដល់ នាំឱ្យមានការរិះគន់ពីសាធារណជន។
លោក អំ សំអាត មានប្រសាសន៍ថា៖ «យើងគាំទ្រទៅដល់ការជួយដល់ប្រជាពលរដ្ឋក្រីក្រ ប៉ុន្តែសុំឱ្យការជួយហ្នឹងបន្តជានិរន្តន៍ កុំឱ្យការជួយមានកាលៈទេសៈ និងពេលវេលាដែលនាំឱ្យគេរិះគន់ភ្ជាប់ជាមួយរឿងនយោបាយ។ អ៊ីចឹងការជួយសុំឱ្យអាជ្ញាធរមូលដ្ឋានវាយតម្លៃដោយតម្លាភាព និងយុត្តិធម៌ ហើយទទួលបានផលប្រយោជន៍ស្មើគ្នា»។
របាយការណ៍របស់ក្រសួងផែនការ ពីអត្រានៃភាពក្រីក្រនៅកម្ពុជា ឆ្នាំ២០១៩-២០២០ ចេញនៅថ្ងៃទី១៧ ខែវិច្ឆិកា ឆ្នាំ២០២១ ឱ្យដឹងថា ប្រជាជនកម្ពុជាប្រមាណ ១៨% (១៧,៨%) ឬ ជិត៣លាននាក់នៃប្រជាជនសរុប កំពុងរស់ក្រោមបន្ទាត់ភាពក្រីក្រ។ ក្រសួងផែនការបញ្ជាក់ថា អត្រាភាពក្រីក្របានរង ផលប៉ះពាល់ខ្លាំងពីការរីករាលដាលជំងឺកូវីដ-១៩ ចាប់ពីឆ្នាំ២០២០ ជាពិសេសប៉ះពាល់សេដ្ឋកិច្ច។
របាយការណ៍ធនាគារពិភពលោក (World Bank) បានព្យាករណ៍ចុងក្រោយ កាលពីថ្ងៃទី៣០ ខែមិថុនា ឆ្នាំ២០២២ ថា សេដ្ឋកិច្ចរបស់កម្ពុជានឹងទទួលបានកំណើន ៤,៥ ភាគរយ ក្នុងឆ្នាំ២០២២ ប៉ុន្តែត្រូវទប់ទល់នឹងវិបត្តិប្រេងឥន្ធនៈឡើងថ្លៃ។ ការឡើងថ្លៃឥតស្រាកស្រាន្តនៃប្រេងឥន្ធនៈ និងស្បៀងអាហារនៅលើទីផ្សារពិភពលោក កំពុងរុញអតិផរណាឱ្យកាន់តែធំឡើង ហើយនៅកម្ពុជា គ្រួសារក្រីក្រនឹងងាយរងគ្រោះ ព្រោះមិនសូវមានប្រាក់សន្សំ ហើយត្រូវរងការលំបាកធ្ងន់ជាងគេពីសំណាក់វិបត្តិប្រេងឡើងថ្លៃនេះ ខណៈដែលចំណូលបន្តធ្លាក់ចុះ៕