ថ្លែងក្នុងបទសម្ភាសជាមួយសារព័ត៌មាន CNN ដែលចេញកាលពីថ្ងៃអង្គារម្សិលមិញ ប្រធានាធិបតីអាមេរិក លោក ចូ បៃឌិន បានឱ្យដឹងថា រូបលោកមិនគិតថាប្រធានាធិបតីរុស្ស៊ី លោក វ្លាឌីមៀរ ពូទីន នឹងប្រើប្រាស់អាវុធនុយក្លេអ៊ែរបែបយុទ្ធសាស្ត្រ ក្នុងសង្គ្រាមជាមួយអ៊ុយក្រែននោះទេ បើទោះបីជាប្រធានាធិបតីរូបនេះបានព្រមានពីហានិភ័យខ្ពស់នៃសង្រ្គាមនុយក្លេអ៊ែរ កាលពីសប្ដាហ៍មុនក៏ដោយ។
ទាក់ទិននឹងសំណួររបស់អ្នកសារព័ត៌មាន ថាតើវាអាចជាការពិតកម្រិតណាសម្រាប់លោក ពូទីន ក្នុងការប្រើប្រាស់អាវុធនុយក្លេអ៊ែរបែបយុទ្ធសាស្ត្រ ប្រធានាធិបតីអាមេរិកបានឆ្លើយតបយ៉ាងខ្លីថា៖ «ជាក់ស្ដែង ខ្ញុំមិនគិតថាគាត់ [លោក ពូទីន] នឹងធ្វើសកម្មភាពនេះនោះទេ»។
ទីភ្នាក់ងារសារព័ត៌មាន Reuters បានរាយការណ៍បន្តថា ភាពតានតឹងរវាងរុស្ស៊ី និងអ៊ុយក្រែន ក្នុងរយៈពេលចុងក្រោយនេះ បានចាប់ផ្ដើមកើនឡើងខ្លាំង បន្ទាប់ពីរុស្ស៊ីបានបើកការឈ្លានពានទ្រង់ទ្រាយធំមកលើប្រទេសក្បែរខាងរបស់ខ្លួនមួយនេះ ដែលធ្វើឡើងបន្ទាប់ពីការប្រកាសសង្រ្គាមមួយដោយប្រធានាធិបតី លោក វ្លាឌីមៀរ ពូទីន។
ករណីនេះក៏បានបង្កឱ្យមានជាការព្រួយបារម្ភពីបណ្ដាប្រទេសនានា ដែលថា ការប៉ះទង្គិចរវាងប្រទេសទាំង២នេះអាចនឹងវិវត្តទៅជាសង្រ្គាមដោយប្រើប្រាស់អាវុធនុយក្លេអ៊ែរផងដែរ ខណៈប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី ក៏ធ្លាប់ឱ្យដឹងកាលពីពេលកន្លងទៅថា ការត្រៀមខ្លួនដើម្បីប្រើប្រាស់អាវុធនុយក្លេអ៊ែរដើម្បីការពារប្រទេសរុស្ស៊ី ដែលលើកឡើងដោយលោក ពូទីន មិនមែនជាករណីលេងសើចឡើយ។
ទោះជាយ៉ាងណា អ្នកនាំពាក្យវិមានក្រឹមឡាំងមួយរូបធ្លាប់បានបញ្ជាក់កាលពីពេលថ្មីៗនេះថា គោលនយោបាយសន្តិសុខរបស់រុស្ស៊ី គឺកំណត់ថា ប្រទេសរបស់ខ្លួននឹងប្រើប្រាស់អាវុធនុយក្លេអ៊ែរសម្រាប់តែករណីដែលអត្ថិភាពរបស់ខ្លួនត្រូវបានគំរាមកំហែងប៉ុណ្ណោះ៕
