រថយន្តក្រុងចំនួន៣គ្រឿងត្រូវបានដឹកនាំដោយរថយន្តស៊ីរ៉ែនរបស់នគរបាលចេញពីផ្លូវលេខ៣១០ នៅកណ្ដាលរាជធានីភ្នំពេញ នៅម៉ោង១២និង២៥នាទី រំលងអធ្រាត្រថ្ងៃព្រហស្បតិ៍ម្សិលមិញ។ មន្ត្រីនគរបាលបានទៅឈរជើងតាំងពីព្រឹកព្រលឹម នៅអគារអាផាតមិន (Apartment) មួយកន្លែង និងបិទចរាចរណ៍មហាវិថីព្រះមុនីវង្ស និងផ្លូវលេខ៦៣។ យ៉ាងហោចណាស់មានរថយន្តនគរបាលចំនួន៦គ្រឿងចតនៅតាមផ្លូវ។
គេអាចឮនគរបាលនិយាយតាមអាយកូមថា នេះគឺជាក្រុមទី៣នៃជនបរទេសដែលត្រូវបានសង្រ្គោះពីអាផាតមិន ក្នុងសប្ដាហ៍នេះ។ លើសពីនេះ គេអាចឮនគរបាលនិយាយថា លើកនេះ ជនបរទេសនឹងត្រូវបញ្ជូនទៅកាន់អាកាសយានដ្ឋាន និងជិះយន្តហោះត្រលប់ទៅកាន់ប្រទេសចិន។
ការឆ្មក់ចូលរបស់នគរបាលនៅសង្កាត់បឹងកេងកងទី១ រាជធានីភ្នំពេញ ធ្វើឡើងស្របពេលដែលនគរបាលចាត់វិធានការប្រយុទ្ធប្រឆាំងនឹងការជួញដូរមនុស្ស ក្នុងរយៈពេលប៉ុន្មានសប្ដាហ៍កន្លងមកនេះ។
អាជ្ញាធរបានឆ្មក់ចូលជាង១០កន្លែង ក្នុងរាជធានីភ្នំពេញ និងខេត្តព្រះសីហនុ ហើយពលករបរទេសរាប់ពាន់នាក់ត្រូវបានសង្រ្គោះពីទីតាំងឆបោក ដែលមនុស្សជាច្រើនត្រូវបានរៀបចំនិរទេសអាស្រ័យលើស្ថានភាពឯកសាររបស់ពួកគេ។ មានរាប់រយករណីត្រូវបានប្រកាសជាផ្លូវការថាជាករណីជួញដូរមនុស្ស ពាក់ព័ន្ធនឹងការបង្ខាំង និងការធ្វើទារុណកម្ម។
អស់រយៈពេលជាង១ឆ្នាំហើយដែលពលករបរទេសត្រូវបានឆបោកឱ្យមកធ្វើការនៅក្នុងប្រទេសកម្ពុជា ដែលមន្រ្តីនគរបាលបាននិយាយថាពាក់ព័ន្ធនឹងល្បែងស៊ីសង។ ទោះយ៉ាងណា ពលករនិយាយថា ការងារនោះគឺការឆបោកមនុស្សតាមអ៊ីនធឺណិត។
លោក កែវ វណ្ណថន អគ្គនាយករង និងជាអ្នកនាំពាក្យអគ្គនាយកដ្ឋានអន្តោប្រវេសន៍ បដិសេធធ្វើអត្ថាធិប្បាយដោយប្រាប់ថាជាប់រវល់ ខណៈអភិបាលរាជធានីភ្នំពេញ លោក ឃួង ស្រេង បង្វែរសំណួរទៅថ្នាក់ជាតិ។
នគរបាលសង្កាត់ និងខណ្ឌបឹងកេងកងទី១ ក៏បានបង្វែរសំណួរទៅនាយកដ្ឋានអន្តោប្រវេសន៍ ប៉ុន្តែបានទទួលស្គាល់ថាមានការឆ្មក់ចូលរយៈពេលមួយសប្ដាហ៍មកហើយ។
លោក កុល សុផាត អធិការនគរបាលសង្កាត់បឹងកេងកងទី១ មានប្រសាសន៍ថា៖ «ខាងនាយកដ្ឋានអន្តោប្រវេសន៍បានដោះស្រាយបញ្ហាជនជាតិចិន ហើយឥលូវនេះ ករណីនេះបានបញ្ចប់ហើយ។ នាយកដ្ឋានអន្តោប្រវេសន៍ធ្វើការលើករណីនេះ ហើយខ្ញុំមិនដឹងរឿងនេះច្បាស់ទេ»។
លោក សុខ សម្បត្តិ អភិបាលខណ្ឌបឹងកេងកងទី១ មានប្រសាសន៍ថា ផ្លូវនេះត្រូវបានបិទត្រឹមតែ៥នាទីប៉ុណ្ណោះ ខណៈអ្នករាយការណ៍ព័ត៌មានដែលនៅទីនោះឃើញបិទជិត៣ម៉ោង។
អ្នកលក់ដូរនៅក្បែរនោះបាននិយាយថា គាត់បានឃើញគេយកគ្រែដេកជាថ្នាក់ ចូលទៅក្នុងអាផាតមិន ក្នុងរយៈពេលប៉ុន្មានខែចុងក្រោយនេះ ហើយគាត់គិតថាប្រហែលជាគេយកអាផាតមិននោះធ្វើជាមន្ទីរពេទ្យ ឬគ្លីនិក។
ក្បួនរថយន្តដែលបានចាកចេញពីផ្លូវលេខ៣១០ ត្រូវបានដឹកនាំដោយរថយន្តនគរបាលពណ៌ខ្មៅ ដែលរថយន្តក្រុងមួយមានដាក់តែវ៉ាលីប៉ុណ្ណោះ ហើយរថយន្តក្រុង២ទៀត ដឹកមនុស្ស។ នៅពីក្រោយក្បួនរថយន្ត មានរថយន្តសង្គ្រោះបន្ទាន់។
ក្បួនរថយន្តបានរត់ឆ្លងកាត់តាមផ្លូវលេខ៦៣ មហាវិថីព្រះសីហនុ មហាវិថីព្រះមុនីរ៉េត ឡើងទៅផ្លូវលេខ២១៧ និងផ្លូវលេខ២០០៤ ហើយទីបំផុត ឈប់ប្រហែលមួយម៉ោង នៅខាងក្រៅមណ្ឌលឃុំឃាំងជនអន្តោប្រវេសន៍ នៅទល់មុខអាកាសយានដ្ឋាន។ រថយន្តសង្គ្រោះបានចូលទៅក្នុងមណ្ឌល ខណៈអ្នកផ្សេងទៀតបានរង់ចាំនៅខាងក្រៅ លើកលែងតែមានអ្នកចង់ចូលបន្ទប់ទឹក។ មន្ត្រីប្រដាប់អាវុធបានមកយាមរថយន្តក្រុង ខណៈមន្ត្រីនគរបាលអន្តោប្រវេសន៍ជាច្រើននាក់មកថតរូប។
រថយន្តក្រុងទាំង២គ្រឿងដែលដឹកអ្នកដំណើរ បានធ្វើដំណើរមកដល់អាកាសយានដ្ឋានអន្តជាតិភ្នំពេញ នៅវេលាម៉ោង១និង៣០នាទីរសៀល។ ជនបរទេសប្រមាណ៥០-៨០នាក់ដែលអមដំណើរដោយនគរបាល បានដើរចូលតាមទ្វារកញ្ចក់នៃច្រកចូលខាងមុខ៕
បកប្រែនិងសម្រួលចេញពីអត្ថបទដើមភាសាអង់គ្លេស៖ Police Raid Delivers Dozens of Foreign Nationals Straight to Airport