ក្រុមយុវជនជិត១០នាក់ នៅថ្ងៃសុក្រនេះ បានយកស្នាមមេដៃជាថ្មីជាង២០០ ទៅដាក់នៅរដ្ឋបាលរាជធានីភ្នំពេញ ដើម្បីស្នើធ្វើបាតុកម្មនៅទីលានប្រជាធិបតេយ្យ ប្រឆាំងការចេញបណ្ណស្នាក់នៅអចិន្ត្រៃយ៍ដល់ជនបរទេស និងលុបចោលគម្រោងបង្កើតអគារសិក្សាភាសាវៀតណាមនៅសាកលវិទ្យាល័យភូមិន្ទភ្នំពេញ។
ការយកឯកសារដែលជាស្នាមមេដៃផ្ទាល់របស់ប្រជាពលរដ្ឋទៅដាក់នៅរដ្ឋបាលរាជធានីភ្នំពេញនេះ ធ្វើឡើងក្រោយពីអាជ្ញាធរនាពេលកន្លងមក បានបដិសេធទទួលយកស្នាមមេដៃរបស់ប្រជាពលរដ្ឋដែលក្រុមយុវជនបានប្រមូលតាមបណ្តាញសង្គម។
យុវជន អ៊ំ ឈុម ប្រាប់វីអូឌីក្រោយជួបជាមួយតំណាងរដ្ឋបាលរាជធានីភ្នំពេញថា ដំបូងឡើយ ក្រុមយុវជនបានប្រមូលស្នាមមេដៃប្រជាពលរដ្ឋតាមបណ្តាញសង្គម ដូចជា តេឡេក្រាម និងហ្វេសប៊ុកឆាត ជាដើម ដោយទទួលបានស្នាមមេដៃជាង២ ០០០ ប៉ុន្តែរដ្ឋបាលរាជធានីភ្នំពេញមិនទទួលយកស្នាមមេដៃទាំងនោះទេ ដោយតម្រូវឱ្យប្រមូលស្នាមមេដៃផ្ទាល់របស់ប្រជាពលរដ្ឋវិញ។
យុវជនរូបនេះបន្តថា ក្រុមយុវជនបានប្រមូលសាជាថ្មីដោយបានស្នាមមេដៃចំនួន២២៧ និងបានដាក់ទៅរដ្ឋបាលរាជធានីភ្នំពេញ នៅថ្ងៃសុក្រនេះ ដើម្បីស្នើសុំធ្វើបាតុកម្មនៅទីលានប្រជាធិបតេយ្យនៅក្នុងខែតុលានេះ។
លោកបន្ថែមថា៖ «សម្រាប់ខ្ញុំ នៅតែរក្សាគោលជំហរត្រូវតែធ្វើបាតុកម្ម ទោះមានការគាំទ្រពីប្រជាជនខ្មែរតិចឬក៏ច្រើន ព្រោះវៀតណាមមានមហិច្ឆតាឈ្លានពានទឹកដីគេជារហូតមក តាំងពីដើមមក ហើយយើងបានប្រឈមនឹងការបាត់បង់ទឹកដីកម្ពុជាក្រោមរបស់យើង និងកោះត្រល់ជាដើម។ ហើយឥលូវនេះ វៀតណាមបានស្នើជាបន្តបន្ទាប់ទៀតមកកម្ពុជាយើង ដែលយើងឃើញថា ករណីទាំងអស់នេះ វាអត់ប្រក្រតី ដែលវាចូលដល់ការគ្រប់គ្រងដោយប្រយោលពីអាណានិគមវៀតណាមនេះ»។
យុវជនម្នាក់ទៀត លោក ខុន រស្មី និយាយថា មានការផ្សព្វផ្សាយជាច្រើនអំពីជនជាតិវៀតណាមចូលមករស់នៅទឹកដីកម្ពុជាដោយខុសច្បាប់ ហើយមិនត្រូវបានអាជ្ញាធរកម្ពុជាបង្ក្រាប ឬចាប់បញ្ជូនទៅវិញឡើយ ដែលនេះជាក្តីបារម្ភមួយសម្រាប់លោកចំពោះជនជាតិមួយនេះ។ ក្រៅពីនោះ លោកបារម្ភថា ការបង្កើតអាគារសម្រាប់បង្រៀនភាសាវៀតណាមក្នុងកម្មវិធីសិក្សារបស់សាលារដ្ឋនៅកម្ពុជា ក៏អាចនឹងប៉ះពាល់ដល់ផលប្រយោជន៍របស់ជាតិផងដែរ។
លោកបន្ថែមថា៖ «រឿងជនជាតិវៀតណាមនេះ កាលមុនកើតកូវីដនោះ ខាងក្រសួងបានបណ្តេញឱ្យទៅស្រុកទេសខ្លួនឯងវិញហើយ ប៉ុន្តែអាជ្ញាធរវៀតណាមខ្លួនឯងហ្នឹងមិនឱ្យចូលប្រទេសទេ ក្រោមហេតុផលកូវីដ។ អ៊ីចឹងខ្ញុំសួរថា តើជនជាតិវៀតណាមទាំងអស់ហ្នឹង មកដល់ពេលនេះ គាត់ទៅនៅណាអស់ហើយ? ឬមួយក៏សម្ងំធ្វើបណ្ណស្នាក់នៅអចិន្ត្រៃយ៍ឱ្យរួចបាត់ហើយ?»
វីអូឌី មិនអាចសុំបញ្ជាក់ពីអភិបាលរងរាជធានីភ្នំពេញ លោក កើត ឆែ និងអ្នកនាំពាក្យ លោក ម៉េត មាសភក្តី បានទេ នៅថ្ងៃសុក្រនេះ។ ប៉ុន្តែបើតាមក្រុមយុវជន គឺមន្ត្រីរដ្ឋបាលរាជធានីភ្នំពេញបានទទួលស្នាមមេដៃប្រជាពលរដ្ឋពីពួកគេហើយ ប៉ុន្តែមិនទាន់សម្រេចថាយ៉ាងណានៅឡើយទេ ដោយរងចាំការជួបប្រជុំពិភាក្សាគ្នាម្តងទៀតសិន។
នាយកទទួលបន្ទុកកិច្ចការទូទៅ នៃអង្គការសិទ្ធិមនុស្សលីកាដូ លោក អំ សំអាត មានប្រសាសន៍ថា តាមច្បាប់ស្តីពីការធ្វើបាតុកម្មដោយសន្តិវិធី គឺប្រជាពលរដ្ឋគ្រាន់តែជូនដំណឹងពីការសុំធ្វើបាតុកម្ម ឬការជួបជុំគ្នាដោយសន្តិវិធីនៅទីលានប្រជាធិបតេយ្យ ដោយមិនចាំបាច់មានការយល់ព្រមពីសាលារាជធានីភ្នំពេញ ក៏ពួកគេអាចជួបជុំបានដែរ ប៉ុន្តែការជួបជុំនោះត្រូវធ្វើឡើងក្រោមមនុស្ស២០០នាក់។
លោកបន្តថា៖ «បើមិនមានការអនុញ្ញាតទេ ជាការរំលោភលើសិទ្ធ និងរំលោភលើច្បាប់ស្តីពីការធ្វើបាតុកម្មដោយសន្តិវិធី ព្រោះនៅក្នុងច្បាប់ អាចជួបជុំគ្នាធ្វើបាតុកម្មដោយសន្តិវិធីក្រោម២០០នាក់»។
មាត្រា៣៥ នៃរដ្ឋធម្មនុញ្ញ ចែងថា ប្រជាពលរដ្ឋខ្មែរទាំង២ភេទ មានសិទ្ធិចូលរួមយ៉ាងសកម្មក្នុងជីវភាពនយោបាយ សេដ្ឋកិច្ច សង្គមកិច្ច និងវប្បធម៌របស់ប្រទេសជាតិ។ សេចក្តីស្នើទាំងឡាយរបស់ប្រជាពលរដ្ឋត្រូវបានទទួលការពិនិត្យ និងដោះស្រាយយ៉ាងហ្មត់ចត់ពីអង្គការរដ្ឋ។
ចំណែកមាត្រា៣៧ នៃរដ្ឋធម្មនុញ្ញ ចែងថា សិទ្ធិធ្វើកូដកម្ម និងធ្វើបាតុកម្មដោយសន្តិវិធី ត្រូវយកមកអនុវត្តនៅក្នុងក្របខណ្ឌនៃច្បាប់ ខណៈមាត្រា៤១ ចែងថា ប្រជាពលរដ្ឋខ្មែរមានសេរីភាពខាងការបញ្ចេញមតិរបស់ខ្លួន សេរីភាពខាងសារព័ត៌មាន សេរីភាពខាងបោះពុម្ពផ្សាយ និងសេរីភាពខាងជួបជុំ ជាដើម។
ការស្នើសុំធ្វើបាតុកម្មរបស់ក្រុមយុវជនទាំងនេះ ធ្វើឡើងក្រោយពីក្រសួងអប់រំ យុវជន និងកីឡា គ្រោងបង្កើតអាគារសិក្សាភាសាវៀតណាមនៅសាកលវិទ្យាល័យភូមិន្ទភ្នំពេញ ខណៈក្រសួងមហាផ្ទៃ បានក្រើនរំឭកដល់មន្ត្រីក្រោមឱវាទ និងវិស័យឯកជនទទួលស្គាល់បណ្ណស្នាក់នៅអចិន្ត្រៃយ៍ជនបរទេសអន្តោប្រវេសន្តសម្រាប់បម្រើក្នុងជីវភាពប្រចាំថ្ងៃ បន្ទាប់ពីរកឃើញថា មន្ត្រីថ្នាក់ក្រោមជាតិ និងវិស័យឯកជនមួយចំនួន មិនទាន់ទទួលស្គាល់តម្លៃក្នុងការប្រើប្រាស់បណ្ណស្នាក់នៅអចិន្ត្រៃយ៍ជនបរទេសអន្តោប្រវេសន្តទាំងនោះ។
ទាក់ទងគម្រោងស្នើសុំធ្វើបាតុកម្មប្រឆាំងការផ្តល់បណ្ណស្នាក់នៅអចិន្ត្រៃយ៍ដល់ជនបរទេស និងគម្រោងបង្កើតដេប៉ាតឺម៉ង់សិក្សាភាសាវៀតណាមនេះ យុវជនម្នាក់ គឺលោក ធែល ធីលែន ត្រូវបានសមត្ថកិច្ចចាប់ខ្លួនកាលពីថ្ងៃទី៤ ខែតុលា ឆ្នាំ២០២២នេះ ក្រោយបានជួបមន្ត្រីរដ្ឋបាលរាជធានីភ្នំពេញ ដោយសមត្ថកិច្ចសម្អាងលើបទចោទក្នុងសំណុំរឿងកាលពី៦ឆ្នាំមុន ដែលចោទយុវជនរូបនោះថាបានលួចលក់អចលនវត្ថុ[ដី]របស់អ្នកដទៃ នៅឃុំព្រែកអំពិល ស្រុកខ្សាច់កណ្តាល ខេត្តកណ្តាល៕