ក្រុមយុវជនបានលើកឡើងថា រដ្ឋបាលរាជធានីភ្នំពេញនៅមិនទាន់អនុញ្ញាតឱ្យពួកគេធ្វើបាតុកម្មនៅទីលានប្រជាធិបតេយ្យប្រឆាំងការចេញបណ្ណស្នាក់នៅអចិន្ត្រៃយ៍ដល់ជនបរទេស និងលុបចោលគម្រោងបង្កើតអគារសិក្សាភាសាវៀតណាមនៅសាកលវិទ្យាល័យភូមិន្ទភ្នំពេញនៅឡើយទេ ដោយអាជ្ញាធរតម្រូវឱ្យពួកគេកែលិខិតជាថ្មីស្របតាមនីតិវិធីរដ្ឋបាលជាមុនសិន។
យុវតី ប៊ិន ស្រីពៅ ដែលអះអាងថាមកកពីខេត្តក្រចេះ ឱ្យដឹងថា មន្ត្រីរដ្ឋបាលរាជធានីភ្នំពេញបានណាត់ក្រុមយុវជនទៅជួបនៅម៉ោង១០ព្រឹក ថ្ងៃអង្គារនេះ ដើម្បីជជែកអំពីការស្នើសុំធ្វើបាតុកម្មនៅទីលានប្រជាធិបតេយ្យ ប៉ុន្តែនៅពេលក្រុមយុវជនទៅដល់ ស្រាប់តែមន្ត្រីរដ្ឋបាលរាជធានីភ្នំពេញណែនាំឱ្យពួកគាត់កែតម្រូវលិខិតស្នើសុំធ្វើបាតុកម្មឡើងវិញ ដោយសារខុសទម្រង់នីតិវិធីរដ្ឋបាល។ ករណីនេះ កញ្ញាថា ធ្វើឱ្យក្រុមយុវជនជួបការលំបាកច្រើន និងមានភាពស្មុគស្មាញក្នុងការស្នើសុំធ្វើបាតុកម្មដោយអហិង្សានេះ។
យុវតីរូបនោះលើកឡើងថា៖ «លំបាកច្រើន ហើយយើងត្រូវខាតពេលវេលាច្រើន ទី១ ទាក់ទងសុវត្ថិភាពពួកយើង ទី២ ទាក់ទងការរកស៊ីរបស់ពួកយើង និងចំណាយផ្សេងៗ។ តែធម្មតាការរកស៊ីរបស់យើង ធម្មតាយើងជាប្រជាពលរដ្ឋ ជាអ្នករកស៊ី អ៊ីចឹងយើងទាក់ទងនឹងហានិភ័យជីវភាព ប៉ុន្តែយើងស៊ូធ្វើទៅមុខទៀត»។
យុវតីនោះបន្ថែមថា៖ «ហើយក៏ផ្ដាំជូនពរពុកម៉ែបងប្អូនទាំងអស់គ្នាជួយពិចារណាគិតឡើងវិញ ទាក់ទងនឹងវាសនាប្រទេសជាតិរបស់យើង ព្រោះយើងជាម្ចាស់ទឹកដី អត់អាចឱ្យវាសនាទឹកដីរបស់យើងទៅឱ្យអ្នកផ្សេងគ្រប់គ្រងបានទេ»។
យុវជន អ៊ំ ឈុម លើកឡើងថា ពួកគាត់ដាក់ញ្ញត្តិទៅរដ្ឋបាលរាជធានីភ្នំពេញជាច្រើនដងមកហើយ តែត្រូវបានស្ថាប័នរដ្ឋមួយនេះតែងតែបង្កភាពស្មុគស្មាញដល់ពួកគាត់ក្នុងការកែតម្រូវលិខិត និងការប្រមូលស្នាមមេដៃ ដោយទាមទារយកស្នាមមេដៃផ្ទាល់ និងត្រូវយកច្បាប់ដើម ដែលការណ៍នេះធ្វើឱ្យគាត់ជួបការលំបាកច្រើន ខាតពេលវេលា និងថវិកា ជាដើម។
យ៉ាងណាក្ដី លោកអះអាងថា ទោះជាមានការលំបាកយ៉ាងណា ក៏ពួកគាត់នៅតែតស៊ូធ្វើតាមការណែនាំរបស់មន្ត្រីរដ្ឋបាលរាជធានីភ្នំពេញ ដើម្បីទទួលបានសិទ្ធិធ្វើបាតុកម្មនៅទីលានប្រជាធិបតេយ្យ ប្រឆាំងការចេញបណ្ណស្នាក់នៅអចិន្ត្រៃយ៍ដល់ជនបរទេស និងលុបចោលគម្រោងបង្កើតអគារសិក្សាភាសាវៀតណាមនៅសាកលវិទ្យាល័យភូមិន្ទភ្នំពេញ។
លោកនិយាយថា៖ «ការធ្វើរបស់សាលារាជធានីភ្នំពេញ តែងតែធ្វើឱ្យយើងមានការលំបាកខ្លះ ប៉ុន្តែនៅក្នុងពេលនេះដែរ យើងនៅតែធ្វើបាតុកម្មនេះ ទោះបីជាមានការលំបាកយ៉ាងណា ក៏យើងព្យាយាមធ្វើឱ្យបានសម្រេចតាមគោលដៅយើង»។
ទោះជាបែបនេះក្ដី ក្រុមយុវជនលើកឡើងប្រហាក់ប្រហែលគ្នាថា ពួកគេនឹងកែសម្រួលញត្តិជាថ្មី ដើម្បីដាក់ទៅរដ្ឋបាលរាជធានីភ្នំពេញយ៉ាងយូរនៅក្នុងសប្តាហ៍នេះ។
វីអូឌី មិនអាចសុំការបញ្ជាក់ពីអភិបាលរងរាជធានីភ្នំពេញ លោក កើត ឆែ និងអ្នកនាំពាក្យ លោក ម៉េត មាសភក្តី បានទេ នៅថ្ងៃអង្គារនេះ។
នាយកទទួលបន្ទុកកិច្ចការទូទៅ នៃអង្គការសិទ្ធិមនុស្សលីកាដូ លោក អំ សំអាត មានប្រសាសន៍ថា តាមច្បាប់ស្តីពីការធ្វើបាតុកម្មដោយសន្តិវិធី គឺប្រជាពលរដ្ឋគ្រាន់តែជូនដំណឹងពីការសុំធ្វើបាតុកម្ម ឬការជួបជុំគ្នាដោយសន្តិវិធីនៅទីលានប្រជាធិបតេយ្យ ដោយមិនចាំបាច់មានការយល់ព្រមពីរដ្ឋបាលរាជធានីភ្នំពេញ ក៏ពួកគេអាចជួបជុំបានដែរ ប៉ុន្តែការជួបជុំនោះត្រូវធ្វើឡើងក្រោមមនុស្ស២០០នាក់។
ករណីនេះ លោកថា បើរដ្ឋបាលរាជធានីភ្នំពេញនៅតែបង្កការលំបាកនិងភាពស្មុគស្មាញដល់ក្រុមយុវជនដែលស្នើសុំធ្វើបាតុកម្មដោយអហិង្សានោះ គឺជាការរំលោភលើសិទ្ធិរបស់ប្រជាពលរដ្ឋ ដែលផ្ទុយពីច្បាប់ជាតិ និងច្បាប់អន្តរជាតិ ។
លោកបន្តថា៖ «ការជូនដំណឹង វាខុសពីការសុំច្បាប់! បើការជូនដំណឹង មានកម្មវត្ថុ មានកាលបរិច្ឆេទ អំពីគោលបំណងនៃការជូនដំណឹង និងការជួបជុំ មានតែប៉ុណ្ណឹង! ប៉ុន្តែបើខុសគ្នាបន្តិចបន្តួច យើងជជែកគ្នាបាន។ តែបើសិនជាឱ្យកែចុះកែឡើង វាហាក់ដូចជាមានភាពរឹតត្បិតមួយ ដែលនាំឱ្យប៉ះពាល់ដល់សេរីភាពក្នុងការជួបជុំដោយសន្តិវិធី ដែលធានាដោយច្បាប់ស្តីពីបាតុកម្មដោយសន្តិវិធី និងរដ្ឋធម្មនុញ្ញ ក៏ដូចជាបទដ្ឋានអន្តរជាតិ»។
មាត្រា៣៥ នៃរដ្ឋធម្មនុញ្ញ ចែងថា ប្រជាពលរដ្ឋខ្មែរទាំង២ភេទមានសិទ្ធិចូលរួមយ៉ាងសកម្មក្នុងជីវភាពនយោបាយ សេដ្ឋកិច្ច សង្គមកិច្ច និងវប្បធម៌របស់ប្រទេសជាតិ។ សេចក្តីស្នើទាំងឡាយរបស់ប្រជាពលរដ្ឋ ត្រូវបានទទួលការពិនិត្យនិងដោះស្រាយយ៉ាងហ្មត់ចត់ពីអង្គការរដ្ឋ។
ចំណែកមាត្រា៣៧ នៃរដ្ឋធម្មនុញ្ញ ចែងថា សិទ្ធិធ្វើកូដកម្ម និងធ្វើបាតុកម្មដោយសន្តិវិធី ត្រូវយកមកអនុវត្តនៅក្នុងក្របខណ្ឌនៃច្បាប់ ខណៈមាត្រា៤១ ចែងថា ប្រជាពលរដ្ឋខ្មែរមានសេរីភាពខាងការបញ្ចេញមតិរបស់ខ្លួន សេរីភាពខាងសារព័ត៌មាន សេរីភាពខាងបោះពុម្ពផ្សាយ និងសេរីភាពខាងជួបជុំ ជាដើម។
ការស្នើសុំធ្វើបាតុកម្មរបស់ក្រុមយុវជនទាំងនេះ ធ្វើឡើងក្រោយពីក្រសួងអប់រំ យុវជន និងកីឡា គ្រោងបង្កើតអាគារសិក្សាភាសាវៀតណាមនៅសាកលវិទ្យាល័យភូមិន្ទភ្នំពេញ ខណៈក្រសួងមហាផ្ទៃបានក្រើនរំឭកដល់មន្ត្រីក្រោមឱវាទ និងវិស័យឯកជនទទួលស្គាល់បណ្ណស្នាក់នៅអចិន្ត្រៃយ៍ជនបរទេសអន្តោប្រវេសន្តសម្រាប់បម្រើក្នុងជីវភាពប្រចាំថ្ងៃ បន្ទាប់ពីរកឃើញថា មន្ត្រីថ្នាក់ក្រោមជាតិ និងវិស័យឯកជនមួយចំនួន មិនទាន់ទទួលស្គាល់តម្លៃក្នុងការប្រើប្រាស់បណ្ណស្នាក់នៅអចិន្ត្រៃយ៍ជនបរទេសអន្តោប្រវេសន្តទាំងនោះ។
ទាក់ទងគម្រោងស្នើសុំធ្វើបាតុកម្មប្រឆាំងការផ្តល់បណ្ណស្នាក់នៅអចិន្ត្រៃយ៍ដល់ជនបរទេស និងគម្រោងបង្កើតដេប៉ាតឺម៉ង់សិក្សាភាសាវៀតណាមនេះ យុវជនម្នាក់ គឺលោក ធែល ធីលែន ត្រូវបានសមត្ថកិច្ចចាប់ខ្លួនកាលពីថ្ងៃទី៤ ខែតុលា ឆ្នាំ២០២២នេះ ក្រោយបានជួបមន្ត្រីរដ្ឋបាលរាជធានីភ្នំពេញ ដោយសមត្ថកិច្ចសម្អាងលើបទចោទក្នុងសំណុំរឿងកាលពី៦ឆ្នាំមុន ដែលចោទយុវជនរូបនោះថាបានលួចលក់អចលនវត្ថុ[ដី]របស់អ្នកដទៃ នៅឃុំព្រែកអំពិល ស្រុកខ្សាច់កណ្តាល ខេត្តកណ្តាល៕
