ប្រជាពលរដ្ឋជិត២០០នាក់ តំណាងឱ្យពលរដ្ឋ២១០គ្រួសារ នៅស្រុកប្រាសាទបាគង ខេត្តសៀមរាប បានប្រមូលផ្តុំតវ៉ាជាថ្មីទៀតនៅមុខអាជ្ញាធរជាតិអប្សរា នៅថ្ងៃពុធនេះ ដើម្បីទាមទារសំណងដីធ្លី។
កាលពីថ្ងៃទី២៥ ខែតុលា ម្សិលមិញ ប្រជាពលរដ្ឋរាប់សិបនាក់ នៅភូមិស្នាសង្គ្រាម ឃុំបល្ល័ង្ក ស្រុកប្រាសាទបាគង ដែលមានដីអាស្រ័យផលនៅភូមិធម្មជាតិរុនតាឯក ឃុំរុនតាឯក ស្រុកបន្ទាយស្រី បាននាំគ្នាតវ៉ា និងដាក់ញត្តិនៅអាជ្ញាធរជាតិអប្សរា ដោយចោទស្ថាប័នមួយនេះថាបានយកដីស្រែរបស់ពួកគាត់ទៅបែងចែកឱ្យពលរដ្ឋផ្សេងទៀត ដោយមិនបានដោះស្រាយសំណង។
លោក សំ មុំ ជាប្រជាពលរដ្ឋរស់នៅភូមិស្នាសង្គ្រាម ប្រាប់វីអូឌីនៅថ្ងៃពុធនេះថា ការតវ៉ារបស់អ្នកភូមិកាលពីថ្ងៃម្សិលមិញនោះ នៅពុំមានដំណោះស្រាយណាមួយសម្រាប់ពួកគាត់នៅឡើយ ដែលធ្វើឱ្យអ្នកភូមិមិនសប្បាយចិត្ត ហើយមកតវ៉ានៅមុខអាជ្ញាធរជាតិអប្សរាជាថ្មីទៀត ជើម្បីជំរុញឱ្យមានដំណោះស្រាយដីធ្លី។
ពលរដ្ឋរូបនេះអះអាងថា ប្រជាពលរដ្ឋចំនួន២១០គ្រួសារ ត្រូវបានអាជ្ញាធរជាតិអប្សរាដាក់បង្គោលហ៊ុមព័ទ្ធយកដីស្រែអស់១៦០ហិកតា កាលពីឆ្នាំ២០០៥ ដោយសន្យាផ្តល់សំណងចន្លោះពី៥០០ដុល្លារ ទៅ៧០០ដុល្លារក្នុង១ហិកតា ប៉ុន្តែរហូតមកដល់ឆ្នាំ២០២២នេះ អាជ្ញាធរមិនទាន់ផ្តល់សំណងនោះជូនពលរដ្ឋឡើយ ហើយបានយកដីធ្លីរបស់ពួកគាត់ទៅអភិវឌ្ឍធ្វើដីឡូត៍បែងចែកឱ្យពលរដ្ឋផ្សេងទៅវិញ។
អ្នកនាំពាក្យអាជ្ញាធរជាតិអប្សរា លោក ឡុង កុសល កាលពីថ្ងៃម្សិលមិញ សុំមិនឆ្លើយបញ្ជាក់ជុំវិញរឿងនេះទេ ដោយលោកអះអាងថា មិនទាន់ទទួលបានញត្តិ ឬឯកសារពីក្រុមពលរដ្ឋនៅឡើយ។
មន្ត្រីសម្របសម្រួលគម្រោងធុរកិច្ច និងសិទ្ធិមនុស្ស នៅមជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត មានប្រសាសន៍ថា ករណីអាជ្ញាធរមិនទទួលសំណើរបស់ប្រជាពលរដ្ឋ ហើយរុញដាក់គ្នានោះ គឺបង្ហាញពីកម្សោយ និងការមិនទទួលខុសត្រូវរបស់អាជ្ញាធរទាំងនោះចំពោះប្រជាពលរដ្ឋដែលជាម្ចាស់ឆ្នោត។ លោកថា តាមរដ្ឋធម្មនុញ្ញ គឺអាជ្ញាធររដ្ឋត្រូវទទួលយកសំណើរបស់ប្រជាពលរដ្ឋទៅពិនិត្យនិងដោះស្រាយយ៉ាងហ្មត់ចត់ផងដែរ៕
