មន្ត្រីរដ្ឋាភិបាលជាន់ខ្ពស់មួយរូប បានឱ្យដឹងនៅថ្ងៃសុក្រនេះថា ករណីទឹកជំនន់ និងការរអិលបាក់ដីជាច្រើនកន្លែងនៅក្នុងខេត្តភាគខាងត្បូង ប្រទេសហ្វីលីពីន បានសម្លាប់មនុស្សយ៉ាងហោចណាស់ ៣១នាក់ ខណៈក្រុមអ្នកជួយសង្គ្រោះកំពុងបន្តស្វែងរកអ្នកដែលបាត់ខ្លួនដទៃទៀត។ នេះបើតាមការចុះផ្សាយដោយ ទីភ្នាក់ងារសារព័ត៌មាន Reuters។
ថ្លែងតាមរយៈទូរស័ព្ទ មន្រ្តីក្នុងតំបន់ លោក Naguib Sinarimbo បានលើកឡើងថា ករណីភ្លៀងធ្លាក់ខ្លាំងដែលបង្កឡើងដោយព្យុះត្រូពិចមួយប្រភេទ បានបង្កឱ្យមានជាទឹកជំនន់ និងការរអិលបាក់ដី ដែលបានប៉ះពាល់ដល់ក្រុងមួយចំនួនក្នុងខេត្ត Maguindanao ។
ប្រភពដដែល បន្តថា ប្រតិបត្តិការជួយសង្គ្រោះទាំងឡាយ ក៏កំពុងតែបន្តធ្វើឡើងដើម្បីស្វែងរកអ្នកដែលបាត់ខ្លួនដទៃទៀតផងដែរ ដោយមិនបានបញ្ជាក់ពីចំនួនប៉ុន្មាននោះទេ។
ទោះជាយ៉ាងណា លោក Naguib Sinarimbo ថា ស្ថានភាពអាកាសធាតុនៅថ្ងៃសុក្រនេះ បានធូរស្រាលទៅវិញបន្តិចហើយ បើធៀបទៅនឹងយប់ថ្ងៃព្រហស្បតិ៍ម្សិលមិញ។
លោក Naguib Sinarimbo ថ្លែងថា៖ «ចំនួន [អ្នកស្លាប់] នៅតែបន្តមានការប្រែប្រួល ដោយយើងរំពឹងថា តួលេខនឹងមានការកើនឡើងច្រើនជាងនេះ»។
គួរបញ្ជាក់ថា ប្រទេសហ្វីលីពីន កាលពីខែកញ្ញាកន្លងទៅ ក៏ធ្លាប់មានករណីព្យុះទីហ្វុងណូរុ (Noru) កើតឡើងផងដែរ ដោយក្នុងនោះមានមនុស្សយ៉ាងហោចណាស់ ៨នាក់ បានស្លាប់បាត់បង់ជីវិត ដីស្រែចម្ការ និងសហគមន៍ត្រូវបានជន់លិច ខណៈដំណាំទាំងឡាយក៏រងនូវការបំផ្លិចបំផ្លាញ៕
