របាយការណ៍ស្ទង់មតិមួយរបស់អង្គការតម្លាភាពកម្ពុជា (TI) បានរកឃើញថា យុវជនកម្ពុជាភាគច្រើនមិនសូវចាប់អារម្មណ៍រឿងនយោបាយ ដោយសារតែពួកគេព្រួយបារម្ភពីសុវត្ថិភាព និងយល់ថានយោបាយគឺជារឿងគ្រោះថ្នាក់។
អង្គការតម្លាភាពកម្ពុជា បានផ្សព្វផ្សាយរបាយការណ៍ស្ទង់មតិមួយ ស្ដីពី «ការស្ទង់មតិយុវជនស្ដីពីគោលនយោបាយ» នៅថ្ងៃទី៣១ ខែតុលា ឆ្នាំ២០២២ ក្រោយពីបានធ្វើការស្ទង់មតិដោយផ្ទាល់ជាមួយយុវជនកម្ពុជាចំនួន១ ៦០០នាក់ ដែលមានអាយុចន្លោះពី១៥ឆ្នាំ ទៅ៣០ឆ្នាំ នៅភូមិចំនួន២០០ នៅទូទាំងប្រទេស ចាប់ពីខែវិច្ឆិកា ដល់ខែធ្នូ ឆ្នាំ២០២១។
របាយការណ៍ស្ទង់មតិនោះបានរកឃើញថា ក្នុងចំណោមយុវជន១ ៦០០នាក់ គឺមាន១៧ភាគរយ និយាយថា ពួកគេចាប់អារម្មណ៍ ឬចាប់អារម្មណ៍យ៉ាងខ្លាំងលើកិច្ចការនយោបាយ ខណៈ ៨២ភាគរយ បាននិយាយថា ពួកគេមិនចាប់អារម្មណ៍ទាល់តែសោះ ឬចាប់អារម្មណ៍បន្តិចបន្តួចលើកិច្ចការនយោបាយ។ ការវិភាគបង្ហាញបន្ថែមថា យុវជនដែលចាប់អារម្មណ៍លើនយោបាយច្រើនជាបុរសមានការអប់រំខ្ពស់ រស់នៅទីប្រជុំជន និងមានចំណូលក្នុងគ្រួសារខ្ពស់។
ការស្ទង់មតិដដែលបន្តថា នៅពេលសួរពីមូលហេតុចម្បងដែលយុវជនមិនចាប់អារម្មណ៍លើនយោបាយនោះ យុវជន ២ភាគបី (៦៦ភាគរយ) បានលើកឡើងថា ដោយសារតែពួកគេមានកង្វះខាតចំណេះដឹងអំពីនយោបាយ ខណៈពួកគេនៅក្មេងពេក និងខ្លះទៀតយល់ថានយោបាយជារឿងគ្រោះថ្នាក់។
នាយកប្រតិបត្តិអង្គការតម្លាភាពកម្ពុជា លោក ប៉ិច ពិសី យល់ថា ការរឹតត្បិតសិទ្ធិសេរីភាព និងលំហសេរីភាពនៃការបញ្ចេញមតិរបស់ពលរដ្ឋ ការរឹតត្បិតសង្គមស៊ីវិល និងអ្នកសារព័ត៌មានជាដើមនោះ បានធ្វើឱ្យពលរដ្ឋ ក្នុងនោះមានទាំងយុវជនផង មានការភ័យខ្លាចពីសុវត្ថិភាព ឬគ្រោះថ្នាក់ បើសិនពួកគេចូលរួមពិភាក្សា ឬចូលរួមសកម្មភាពនយោបាយ។ លោកបន្តថា ផលប៉ះពាល់ពីការមិនចូលរួមរបស់យុវជនក្នុងនយោបាយនេះ អាចនឹងបង្កផលវិបាករយៈពេលវែង ដោយហេតុថា ប្រទេសមួយរីកចម្រើន ទាមទារឱ្យយុវជនចូលរួមលើគ្រប់វិស័យ ជាពិសេសសេដ្ឋកិច្ច សាសនា និងនយោបាយ។
លោកថា៖ «លើគ្រប់វិស័យ ទាំងវិស័យសេដ្ឋកិច្ច សាសនា នយោបាយហ្នឹង គឺជាវិស័យដែលចម្បងជាងគេ ដែលទាមទារឱ្យពលរដ្ឋសកម្ម សកម្មក្នុងន័យយល់ដឹងផង សកម្មក្នុងន័យចូលរួមផង។ រាល់កិច្ចការនយោបាយ និងកិច្ចការសង្គម ជាពិសេសក្នុងន័យអយុត្តិធម៌សង្គម រឿងដែលជាការព្រួយបារម្ភរបស់ជាតិ»។
លោកបន្តថា៖ «ពលរដ្ឋកម្ពុជាយើង មានយុវជនចំនួន១ភាគ៣នៃប្រជាជនសរុប បើពលរដ្ឋ១ភាគ៣អត់ចូលរួម ប្រទេសហ្នឹងមានការអភិវឌ្ឍយឺតយ៉ាវ»។
មន្ត្រីសង្គមស៊ីវិលរូបនេះបន្ថែមថា មានតែរដ្ឋាភិបាល និងអ្នកនយោបាយទេ ដែលអាចជួយជំរុញឱ្យយុវជនដែលជាកម្លាំងស្នូល ចូលរួមសកម្មភាពនយោបាយនិងសង្គម ហើយពួកគេត្រូវធានាពីសុវត្ថិភាព និងបើកទូលាយដល់យុវជនក្នុងការចូលរួម នោះទើបអាចជួយឱ្យប្រទេសជាតិមានការអភិវឌ្ឍ និងរីកចម្រើនបានឆាប់រហ័ស។ ក្រៅពីនោះ លោកក៏បានជំរុញដល់យុវជនចូលរួមឱ្យបានសកម្មផងដែរក្នុងកិច្ចការនយោបាយនិងសង្គម បើទោះជាករណីខ្លះមានលក្ខខណ្ឌរឹតត្បិតសិទ្ធិសេរីភាពពលរដ្ឋក៏ដោយ។
ស្ថាបនិកអង្គការអភិវឌ្ឍន៍ផ្នត់គំនិត លោកបណ្ឌិត សេក សុជាតិ មានប្រសាសន៍ថា ការចូលរួមតិចតួចរបស់យុវជនក្នុងរឿងនយោបាយ គឺជាហានិភ័យក្នុងភាពជាអ្នកដឹកនាំរបស់សង្គមកម្ពុជាបច្ចុប្បន្ន និងអនាគត ហើយកម្ពុជានឹងខ្វះនូវការប្រកួតប្រជែងផ្នត់គំនិត និងគំនិតក្នុងការដោះស្រាយបញ្ហាសង្គម។
លោកថា៖ «យុវជន! បើកាលណាគាត់បោះបង់ការចូលរួមក្នុងសកម្មភាពសង្គម ឬកិច្ចការនយោបាយនៅក្នុងប្រទេស ទោះបីជាលក្ខណៈដោយផ្ទាល់ឬដោយប្រយោលក្ដី វាសុទ្ធតែហានិភ័យ ហើយវានឹងធ្វើឱ្យប៉ះពាល់យ៉ាងធ្ងន់ធ្ងរដល់ប្រទេសជាតិរបស់យើងក្នុងថ្ងៃអនាគត»។
លោកបន្ថែមថា ដើម្បីឱ្យយុវជនចូលរួមសកម្មក្នុងកិច្ចការនយោបាយឡើងវិញ គណបក្សកាន់អំណាច និងគណបក្សដទៃទៀត ត្រូវតែលើកទឹកចិត្តដល់យុវជនឱ្យចូលរួម ប៉ុន្តែមិនត្រូវយកយុវជនធ្វើជាឈ្នាន់ដើម្បីកេងចំណេញនយោបាយរបស់ពួកគេនោះទេ។
ប្រធានអង្គភាពអ្នកនាំពាក្យរាជរដ្ឋាភិបាល លោក ផៃ ស៊ីផាន មានប្រសាសន៍ថា បច្ចុប្បន្ន លោកសង្កេតឃើញយុវជនភាគច្រើនចាប់អារម្មណ៍ខ្លាំងទៅលើបរិបទឌីជីថល និងឧស្សាហកម្ម និងខ្វល់រឿងអនាគតរបស់ពួកគេ ជាជាងរឿងនយោបាយផ្សេងទៀត។ តែយ៉ាងណា លោកថា យុវជនទាំងអស់ សុទ្ធតែមានលទ្ធភាពចូលរួមសកម្មភាពនយោបាយ ហើយកន្លងមក ក្រសួងស្ថាប័នរដ្ឋតែងតែផ្ដល់ឱកាសដល់យុវជនចូលរួមផងដែរ។
លោកថ្លែងថា៖ «យុវជនហ្នឹង គាត់យកចិត្តទុកដាក់ឆ្លើយតបនៅក្នុងការរស់នៅនៃបរិបទ ៤.០ បរិបទឧស្សាហកម្ម [ឌីជីថល] គាត់ត្រូវការរៀនឌីជីថល គាត់ត្រូវការរៀននេះ គាត់ត្រូវការរៀននោះ គឺគាត់ខ្វល់អំពីរឿងអនាគតរបស់គាត់ ជាជាងរឿងនយោបាយដទៃទៀត […] ហើយនិន្នាការនៃការចូលរួម ខ្ញុំមើលឃើញថា ស្រុកខ្មែរច្រើន មានមធ្យោបាយច្រើន មានយន្តការច្រើន ដែលសម្របសម្រួលឱ្យយុវជនអាចចូលរួមបាន»។
បើតាមលទ្ធផលរបាយការណ៍ស្ទង់មតិរបស់អង្គការតម្លាភាពកម្ពុជា អ្នកជំនាញផ្នែកការចូលរួមនយោបាយរបស់ពលរដ្ឋ ក៏បានបង្ហាញមូលហេតុចម្បងចំនួន៣ ដែលរារាំងប្រជាពលរដ្ឋមិនឱ្យមានភាពសកម្មផ្នែកនយោបាយផងដែរ ក្នុងនោះ ព្រោះតែពួកគេមិនអាច ព្រោះពួកគេមិនចង់ និងព្រោះកង្វះអ្នកជួយជំរុញ។
ករណីនេះ របាយការណ៍ស្ទង់មតិ បានផ្តល់ជាអនុសាសន៍ដល់រដ្ឋាភិបាលគួរតែកែលម្អក្របខណ្ឌច្បាប់ គោលនយោបាយ និងបរិយាកាសនយោបាយសម្រាប់យុវជន ដើម្បីឱ្យពួកគេបានចូលរួមក្នុងជីវិតសង្គម និងជីវិតនយោបាយរបស់ប្រទេសជាតិ។ ក្រៅពីនោះ ប្រភពដដែលបានជំរុញឱ្យរដ្ឋាភិបាល ប្រកាន់ខ្ជាប់នូវសិទ្ធិពលរដ្ឋ និងសេរីភាពរបស់យុវជន ជាពិសេសសេរីភាពក្នុងការបញ្ចេញមតិ ការបង្កើតសមាគមនិងការជួបជុំ ព្រមទាំងសិទ្ធិទទួលបានព័ត៌មានផងដែរ៕
