ក្រុមស្ត្រីថ្ងៃសុក្រ បាននាំគ្នាយកញត្តិទៅដាក់នៅស្ថានទូតម៉ាឡេស៊ី និងស្ថានទូតឥណ្ឌូនេស៊ី នៅថ្ងៃព្រហស្បតិ៍នេះ ដើម្បីស្នើសុំស្ថានទូតទាំង២នោះ ជួយជំរុញទៅរដ្ឋាភិបាលកម្ពុជា ឱ្យដោះលែងស្វាមី និងសាច់ញាតិរបស់ពួកគេ ដែលកំពុងជាប់ពន្ធនាគារឱ្យមានសេរីភាពវិញ ស្របពេលកម្ពុជានឹងធ្វើជាម្ចាស់ផ្ទះរៀបចំកិច្ចប្រជុំកំពូលអាស៊ាន នៅសប្តាហ៍ក្រោយ។
អ្នកស្រី ព្រំ ចាន់ថា ភរិយារបស់លោក កាក់ កុម្ភារ ដែលជាសកម្មជនបក្សសង្គ្រោះជាតិ ដែលត្រូវតុលាការរំលាយ ប្រាប់វីអូឌីថា ការដែលពួកគាត់ដាក់ញត្តិស្នើឱ្យស្ថានទូតម៉ាឡេស៊ី និងស្ថានទូតឥណ្ឌូនេស៊ី ជួយអន្តរាគមន៍នេះ ដោយសារតែប្រទេសទាំង២នេះ ជាប្រទេសសមាជិកអាស៊ាន ហើយការប្រជុំអាស៊ាននឹងធ្វើឡើងនៅកម្ពុជានៅសប្តាហ៍ក្រោយនេះ។
អ្នកស្រី ព្រំ ចាន់ថា បន្តថា ស្វាមី និងសាច់ញាតិរបស់ក្រុមស្ត្រីថ្ងៃសុក្រ ជាអ្នកនយោបាយ ពុំមានកំហុសអ្វីនោះទេ ប៉ុន្តែត្រូវបានសមត្ថកិច្ចរបស់រដ្ឋាភិបាលកម្ពុជាចោទប្រកាន់ និងឃុំខ្លួនយ៉ាងអយុត្តិធម៌។
ស្ត្រីថ្ងៃសុក្ររូបនេះ បន្តទៀតថា រូបអ្នកស្រី និងសាច់ញាតិរបស់អ្នកជាប់ឃុំទាំងអស់ ចង់ឱ្យប្រទេសម៉ាឡេស៊ី ឥណ្ឌូនេស៊ី និងប្រទេសដែលជាសមាជិកអាស៊ានផ្សេងទៀត លើកយកករណីរបស់ពួកគាត់ទៅជជែកក្នុងពេលប្រជុំអាស៊ាន និងជំរុញទៅរដ្ឋាភិបាលកម្ពុជា ឱ្យដោះលែងស្វាមី និងសាច់ញាតិរបស់ពួកគាត់ឱ្យមានសេរីភាពវិញ។
អ្នកស្រីបន្ថែមថា៖ «ក្រុមគ្រួសាររបស់ពួកខ្ញុំ មិនដែលកាត់ដីឱ្យអ្នកណាមួយដុំផង មិនលក់ព្រៃ លក់ភ្នំអីផង មកចោទក្រុមគ្រួសាររបស់ពួកខ្ញុំថា ក្បត់ជាតិអីចឹងមិនត្រូវទេ។ គ្រួសាររបស់ពួកខ្ញុំជាអ្នកនយោបាយ អ្នកស្នេហាជាតិ ស្មោះត្រង់ អ្នកស្រឡាញ់ប្រជាធិបតេយ្យ អីចឹងគ្រួសាររបស់ពួកខ្ញុំគ្មានកំហុសទេ»។
យ៉ាងណា មន្ត្រីស្ថានទូតប្រទេសទាំង២នោះ មិនទទួលញត្តិរបស់ក្រុមស្ត្រីថ្ងៃសុក្រនេះទេ ហើយក៏មិនបានបញ្ជាក់ពីមូលហេតុដែរ។ នេះបើតាមការអះអាងរបស់ក្រុមស្ត្រីថ្ងៃសុក្រ ដែលបានទៅដាក់ញត្តិ។
អ្នកស្រី ព្រំ ចាន់ថា បានបង្ហាញការខកចិត្តចំពោះមន្ត្រីស្ថានទូតទាំង២នេះ ដែលមិនព្រមទទួលញត្តិរបស់ពួកគាត់។ អ្នកស្រីថា ក្រុមស្ត្រីថ្ងៃសុក្រនឹងធ្វើយុទ្ធនាការដាក់ញត្តិតាមស្ថានទូតប្រទេសសមាជិកអាស៊ានផ្សេងទៀត ដើម្បីជួយដល់ស្វាមី និងសាច់ញាតិរបស់ពួកគាត់។
ការរកកិច្ចអន្តរាគមន៍របស់ភរិយាសកម្មជនគណបក្សសង្គ្រោះជាតិ ដែលតុលាការរំលាយ ធ្វើឡើងបន្ទាប់ពីតុលាការកម្ពុជាបានកាត់ទោស និងឃុំខ្លួនស្វាមីរបស់ពួកគេឱ្យជាប់ពន្ធនាគារចន្លោះពី ៣ទៅ៧ឆ្នាំ ក្រោមបទចោទប្រកាន់ «ញុះញង់ និងរួមគំនិតក្បត់» ពាក់ព័ន្ធនឹងព្រឹត្តិការណ៍វិលចូលប្រទេសកម្ពុជារបស់លោក សម រង្ស៊ី កាលពីថ្ងៃទី៩ ខែវិច្ឆិកា ឆ្នាំ២០១៩៕