ក្រុមស្ត្រីថ្ងៃសុក្រ បានប្រមូលផ្ដុំគ្នានៅមុខស្ថានទូតសហរដ្ឋអាមេរិកប្រចាំនៅកម្ពុជា នៅថ្ងៃសុក្រនេះ ដើម្បីស្នើប្រទេសប្រកាន់លទ្ធិប្រជាធិបតេយ្យមួយនេះ ជួយជំរុញទៅរដ្ឋាភិបាលកម្ពុជាឱ្យដោះលែងស្វាមី និងសាច់ញាតិរបស់ពួកគេ ព្រមទាំងអ្នកទោសនយោបាយ ដែលកំពុងជាប់ពន្ធនាគារឱ្យមានសេរីភាពវិញ។
ការស្នើរបស់ក្រុមស្ត្រីថ្ងៃសុក្រ បានធ្វើឡើងស្របពេលដែលប្រធានាធិបតីសហរដ្ឋអាមេរិក លោក ចូ បៃឌិន នឹងមកកម្ពុជា នៅថ្ងៃទី១២ និងទី១៣ ខែវិច្ឆិកា សប្តាហ៍ក្រោយនេះ ដើម្បីចូលរួមកិច្ចប្រជុំកំពូលអាស៊ាន-អាមេរិក។
អ្នកស្រី ព្រំ ចាន់ថា ភរិយារបស់លោក កាក់ កុម្ភារ ដែលជាសកម្មជនបក្សសង្គ្រោះជាតិដែលត្រូវតុលាការរំលាយ ប្រាប់វីអូឌីថា ពួកគាត់ទៅប្រមូលផ្តុំនៅមុខស្ថានទូតសហរដ្ឋអាមេរិកនេះ ក្នុងគោលបំណងសុំឱ្យមន្ត្រីទូតជួយសម្របសម្រួលឱ្យពួកគាត់បានជួបជាមួយប្រធានាធិបតីសហរដ្ឋអាមេរិក លោក ចូ បៃឌិន ដោយផ្ទាល់ ដើម្បីលើកឡើងពីទុក្ខកង្វល់ និងស្នើឱ្យអាមេរិកជួយជំរុញទៅរដ្ឋាភិបាលកម្ពុជាឱ្យដោះលែងសាច់ញាតិពួកគេ និងអ្នកទោសនយោបាយនៅកម្ពុជា ដែលកំពុងជាប់ឃុំ។
អ្នកស្រីថា៖ «ប៉ុន្មានថ្ងៃទៀត គឺមានជំនួបប្រជុំអាស៊ានធំនៅប្រទេសកម្ពុជា ហើយតំណាងប្រទេស ជាពិសេសសហរដ្ឋអាមេរិក លោក ចូ បៃឌិន គាត់អញ្ជើញមក។ អ៊ីចឹងខ្ញុំសុំជួបគាត់ផ្ទាល់ ដើម្បីនិយាយរឿងក្រុមគ្រួសារពួកខ្ញុំដែលកំពុងជាប់ឃុំនៅពន្ធនាគារព្រៃស ក៏ដូចជា[ពន្ធនាគារ]ត្រពាំងផ្លុងផងដែរ ជាពិសេសគឺចង់ឱ្យគាត់ជំរុញឱ្យរដ្ឋាភិបាល ដើម្បីធ្វើយ៉ាងណាក៏ដោយ ឱ្យដោះលែងគ្រួសាររបស់ពួកខ្ញុំ ក៏ដូចជាឱ្យប្រទេសកម្ពុជាមានគោរពសិទ្ធិមនុស្ស ហើយនឹងជាពិសេសក្នុងពេលខាងមុខនេះ គឺមានការបោះឆ្នោតឱ្យមានតម្លាភាពត្រឹមត្រូវ ក៏ដូចជា គ.ជ.ប ឱ្យមានតម្លាភាពត្រឹមត្រូវទាំងអស់»។
អ្នកស្រីបន្ថែមថា៖ «ប្រទេសកម្ពុជា ធម្មតាអត់គោរពសិទ្ធិមនុស្សទេ អ៊ីចឹងចាប់ចងតាមតែអំពើចិត្ត ជាពិសេសគឺមន្ត្រីបក្សប្រឆាំងតែម្តង ជាពិសេសក្រុមគ្រួសារពួកខ្ញុំតែម្តង ហើយក៏ដូចជាសកម្មជនដទៃទៀត និយាយទៅរងសម្ពាធសព្វបែបយ៉ាងទាំងអស់ […] អ៊ីចឹងខ្ញុំចង់គាត់ [លោក ចូ បៃឌិន] ហ្នឹង ធ្វើម៉េចក៏ដោយជំរុញរដ្ឋាភិបាលឱ្យគោរពសិទ្ធិមនុស្ស»។
អ្នកស្រី កុល សាត ភរិយាលោក គង់ ម៉ាស់ សកម្មជនគណបក្សសង្គ្រោះជាតិដែលត្រូវបានតុលាការរំលាយ មានប្រសាសន៍ថា ស្វាមីរបស់គាត់ ក៏ដូចជាសាច់ញាតិរបស់ក្រុមស្ត្រីថ្ងៃសុក្រផ្សេងទៀត ជាអ្នកនយោបាយ ពុំមានកំហុសអ្វីនោះទេ ប៉ុន្តែត្រូវបានសមត្ថកិច្ចរបស់រដ្ឋាភិបាលកម្ពុជាចោទប្រកាន់ និងឃុំខ្លួនយ៉ាងអយុត្តិធម៌អស់រយៈពេលជាង២០ខែមកហើយ។
អ្នកស្រីបន្តថា៖ «អ៊ីចឹងខ្ញុំមកថ្ងៃនេះ គឺមកធ្វើការតវ៉ា ក៏ដូចជាសំណូមពរទៅដល់ខាងស្ថានទូត ក៏ដូចជាប្រទេសលោកសេរី សូម[ជួយជំរុញរដ្ឋាភិបាលកម្ពុជា]ឱ្យដោះលែងអ្នកទោសនយោបាយទៅ ព្រោះប្តីរបស់ពួកខ្ញុំអត់មានកំហុសទេ! ហើយសម្រាប់ជាក្រុមគ្រួសារ គឺទឹកភ្នែករាល់ពេលវេលា! អ៊ីចឹងខ្ញុំអត់មានអីទេ បើសិនជាដោះលែងប្តីពួកខ្ញុំ ពួកខ្ញុំមិនមកចំណាយពេលវេលាអត់ប្រយោជន៍ទេ ខាតបង់ទាំងថវិកា ខាតបង់ទាំងពេលកូនរៀន ខាតទាំងពេលរកស៊ី អ៊ីចឹងពួកខ្ញុំជួបការលំបាកខ្លាំងណាស់»។
ការប្រមូលផ្តុំរបស់ក្រុមស្ត្រីថ្ងៃសុក្រ នៅព្រឹកមិញនេះដែរ ក៏មានការរុញច្រានគ្នា និងការដណ្តើមយកបដាផងដែរ ពីសំណាក់ក្រុមប្រជាការពារខណ្ឌ ខណៈក្រុមស្ត្រីថ្ងៃសុក្រព្យាយាមលើកបដា និងព្យាយាមដើរជុំវិញស្ថានទូតអាមេរិកប្រចាំនៅកម្ពុជា ក្នុងខណ្ឌដូនពេញ រាជធានីភ្នំពេញ។
វីអូឌី នៅពុំទាន់អាចសុំការបញ្ជាក់ជុំវិញករណីនេះពីតំណាងស្ថានទូតអាមេរិកប្រចាំនៅកម្ពុជា និងប្រធានអង្គភាពអ្នកនាំពាក្យរាជរដ្ឋាភិបាល លោក ផៃ ស៊ីផាន បានទេ នៅថ្ងៃសុក្រនេះ។
តែយ៉ាងណា លោក ផៃ ស៊ីផាន ធ្លាប់មានប្រសាសន៍ថា ការស្វែងរកកិច្ចអន្តរាគមន៍របស់ក្រុមស្ត្រីថ្ងៃសុក្រ មិនអាចជួយដល់ស្វាមីរបស់ពួកគេបានឡើយ។ លោកបន្តថា ភរិយាសកម្មជនបក្សប្រឆាំងទាំងនោះគួរតែស្វែងរកមេធាវីល្អៗ ដើម្បីមកតតាំងនៅតុលាការជាជាងធ្វើការតស៊ូមតិបែបនេះ។
លោកថា៖ «អ្វីដែលគាត់តតាំង សរសេរញត្តិដាក់ទៅតាមស្ថានទូត បើយើងនិយាយទៅ ស្ថានទូតដែលមានកាតព្វកិច្ច គេធ្វើកិច្ចការសហប្រតិបត្តិការជាមួយរាជរដ្ឋាភិបាលតាមផ្លូវការងារទូត គឺមិនមានអ្វីដែលមកលូកលាន់នៅក្នុងសាច់រឿងផ្ទៃក្នុងរបស់យើងទេ។ ចំណែកអ្វីដែលសកម្មជនទាំងអស់នោះយល់ថាជាការរំលោភដល់សិទ្ធិសេរីភាពរបស់ប្ដី គឺគួរតែដោះស្រាយតាមអ្វីដែលជាយន្តការយើងមានចែងក្នុងរដ្ឋធម្មនុញ្ញ គឺតុលាការ»។
នាយិកាប្រតិបត្តិមជ្ឈមណ្ឌលសិទ្ធិមនុស្សកម្ពុជា លោកស្រី ចក់ សុភាព យល់ឃើញថា ការជួបជុំរបស់សកម្មជនដីធ្លី បរិស្ថាន និងនយោបាយ នាពេលកន្លងមក ជាពិសេសការតវ៉ារបស់ស្រ្តីថ្ងៃសុក្រនេះ ជាការអនុវត្តសិទ្ធិសេរីភាពដោយសន្តិវិធី ដែលមានចែងក្នុងច្បាប់ជាតិ ហេតុដូច្នេះ អាជ្ញាធរគួរតែបង្កភាពងាយស្រួលដល់ពួកគេ ដោយមិនត្រូវប្រើអំពើហិង្សា និងគំរាមកំហែងនោះទេ។
លោកស្រីថា៖ «ជាពិសេសដូចស្រ្តីថ្ងៃសុក្រហ្នឹង ក្រុមគ្រួសាររបស់គាត់ហ្នឹងត្រូវបានប្រឈម ហើយដែលអ្នកខ្លះគឺស្ថិតនៅក្នុងការឃុំឃាំងហ្នឹង អ៊ីចឹងទៅធ្វើឱ្យពួកគាត់ត្រូវអនុវត្តនូវសិទ្ធិសេរីភាពរបស់គាត់ក្នុងការជួបជុំដោយសន្តិវិធី និងបញ្ចេញមតិ។ អ៊ីចឹងអាជ្ញាធរ តាមនីតិវិធីច្បាប់ យើងគួរតែបង្កភាពអំណោយផលសម្រាប់ពួកគាត់នៅក្នុងការអនុវត្តនូវសិទ្ធិសេរីភាពរបស់ពួកគាត់ទាំងអស់ហ្នឹង»។
ការរកកិច្ចអន្តរាគមន៍នៅស្ថានទូតនានារបស់ភរិយាសកម្មជនគណបក្សសង្គ្រោះជាតិដែលតុលាការរំលាយ ធ្វើឡើងបន្ទាប់ពីតុលាការកម្ពុជាបានកាត់ទោស និងឃុំខ្លួនស្វាមីរបស់ពួកគេឱ្យជាប់ពន្ធនាគារចន្លោះពី ៣ទៅ៧ឆ្នាំ ក្រោមបទចោទប្រកាន់ «ញុះញង់ និងរួមគំនិតក្បត់» ពាក់ព័ន្ធនឹងព្រឹត្តិការណ៍វិលចូលប្រទេសកម្ពុជារបស់លោក សម រង្ស៊ី កាលពីថ្ងៃទី៩ ខែវិច្ឆិកា ឆ្នាំ២០១៩៕