ប្រជាពលរដ្ឋជាង១៣០នាក់ នៅភូមិស្នាសង្គ្រាម ឃុំបល្ល័ង្ក ស្រុកប្រាសាទបាគង ខេត្តសៀមរាប បានទាមទារឱ្យអាជ្ញាធរឃុំ ផ្តល់តំណែងឱ្យលោក ពេញ ព្រូន ធ្វើជាប្រធានភូមិឡើងវិញ ដោយអះអាងថា ការដកតំណែងអតីតប្រធានភូមិរូបនេះ ជារឿងអយុត្តិធម៌ ខណៈរូបគាត់តែងតែការពារផលប្រយោជន៍ និងជួយដោះស្រាយបញ្ហារបស់ពលរដ្ឋ ជាពិសេសបញ្ហាដីធ្លី។
លោក ពេញ ព្រូន ជាអតីតមេភូមិស្នាសង្គ្រាម ត្រូវបានថ្នាក់លើដកចេញពីតំណែងកាលពីថ្ងៃទី១៦ ខែវិច្ឆិកា ឆ្នាំ២០២២ ក្រោយចេញមុខតវ៉ាទាមទារដំណោះស្រាយដីធ្លីជាមួយប្រជាពលរដ្ឋចំនួន ២១០គ្រួសារ នៅតំបន់អភិវឌ្ឍន៍រុនតាឯក។ ក្រោយការបញ្ចប់តំណែងមេភូមិរូបនេះ ប្រជាពលរដ្ឋនៅភូមិស្នាសង្គ្រាមជាង១៣០នាក់ បាននាំគ្នាផ្តិតមេដៃដាក់ទៅសាលាឃុំ ទាមទារអាជ្ញាធរថ្នាក់លើផ្តល់តំណែងមេភូមិដល់លោក ពេញ ព្រូន ឡើងវិញ។
ពលរដ្ឋនៅភូមិស្នាសង្គ្រាម អ្នកស្រី ថៃ ម៉ាអម បានលើកឡើងនៅថ្ងៃទី២៣ ខែវិច្ឆិកា ឆ្នាំ២០២២នេះថា អ្នកស្រីក៏បានផ្តិតមេដៃទាមទារឱ្យលោក ពេញ ព្រូន បានមកធ្វើជាមេភូមិវិញដែរ ដោយអ្នកស្រីអះអាងថា អតីតមេភូមិរូបនេះជាថ្នាក់ដឹកនាំល្អសម្រាប់ប្រជាពលរដ្ឋក្នុងភូមិ ដោយតែងតែបម្រើការពារផលប្រយោជន៍ និងជួយដោះស្រាយរាល់បញ្ហាជួបទុក្ខលំបាករបស់ប្រជាពលរដ្ឋ ជាពិសេសបញ្ហាដីធ្លី។
អ្នកស្រីបន្តថា ការដកតំណែងលោក ពេញ ព្រូន ពីមេភូមិនេះ ជាការរើសអើង និងជាការគំរាមកំហែងផ្នែកស្មារតី ក្រោយពីលោក ពេញ ព្រូន បានសកម្មក្នុងការជួយប្រជាពលរដ្ឋរឿងជម្លោះដីធ្លីជាមួយអាជ្ញាធរជាតិអប្សរា។
អ្នកស្រីបន្ថែមថា៖ «មេភូមិនេះ គាត់បានធ្វើការងារបម្រើប្រជាពលរដ្ឋបានល្អណាស់ ដូចថា ក្រុមហ៊ុនយកដីធ្លីពលរដ្ឋ និងពលរដ្ឋជួបទុក្ខលំបាកផ្សេងៗ គាត់តែងតែចេញមុខជួយទាំងអស់ បែរថ្នាក់លើទម្លាក់គាត់ចោលទៅវិញ។ តែពួកខ្ញុំកំពុងតែស្វះស្វែងដាក់ពាក្យស្នើឱ្យគាត់បានជាមេភូមិមកវិញ មនុស្សល្អត្រូវបានថ្នាក់លើទម្លាក់ចោល។ បើមេភូមិមិនល្អ មិនបម្រើផលប្រយោជន៍ពលរដ្ឋវិញ គឺថ្នាក់លើមិនទម្លាក់ទេ ទោះពលរដ្ឋទាមទារទម្លាក់ក៏ដោយ»។
ពលរដ្ឋនៅភូមិស្នាសង្គ្រាមម្នាក់ទៀត លោក រ៉ាន រ៉ា និយាយថា លោកមិនពេញចិត្តចំពោះការដកលោក ពេញ ព្រូន ពីតំណែងជាមេភូមិនោះទេ។ លោកថា អតីតមេភូមិរូបនេះតែងតែខ្វល់ខ្វាយពីទុក្ខលំបាក និងជួយដោះស្រាយបញ្ហានានារបស់ប្រជាពលរដ្ឋនៅក្នុងសហគមន៍ ហើយលោកចង់ឱ្យលោក ពេញ ព្រូន បានធ្វើជាមេភូមិឡើងវិញ។
លោកបន្ថែមថា៖ «ពេលដែលគាត់ដឹងរឿងប្រជាជនបាត់បង់ដីធ្លី គាត់ក៏ខ្នះខ្នែងជួយប្រជាពលរដ្ឋឱ្យមានដំណោះស្រាយ បែរជាគេចោទគាត់ថាដើរបំផុសបំផុលដឹកនាំប្រជាពលរដ្ឋតវ៉ាទៅវិញ ហើយគាត់បានទម្លាក់គាត់[លោក ពេញ ព្រូន]ចោលពីតំណែងទៀត។ យើងមិនដឹងជួយម៉េចបាន បើថ្នាក់លើគេជាអ្នកទម្លាក់»។
អតីតមេភូមិស្នាសង្គ្រាម លោក ពេញ ព្រូន មានប្រសាសន៍ថា ករណីថ្នាក់លើដកលោកចេញពីតំណែងប្រធានភូមិនោះ ជារឿងមិនត្រឹមត្រូវ និងអយុត្តិធម៌សម្រាប់លោក ខណៈរូបលោកមិនបានប្រព្រឹត្តកំហុសធ្ងន់ធ្ងររហូតដល់ថ្នាក់ដកចេញពីតំណែងនោះទេ។
លោកយល់ថា ការដករូបលោកចេញពីតំណែងពីសំណាក់អាជ្ញាធរថ្នាក់លើនេះ ដោយសារតែលោកសកម្មក្នុងការចូលរួមតវ៉ាទាមទារសិទ្ធិដីធ្លីជាមួយពលរដ្ឋចំនួន២១០គ្រួសារជាបន្តបន្ទាប់នាពេលថ្មីៗនេះ ហើយលោកក៏ជាអតីតតំណាងពលរដ្ឋ ៤៤គ្រួសារដែលតវ៉ារឿងជម្លោះដីធ្លីជាមួយអាជ្ញាធរជាតិអប្សរា តាំងពីឆ្នាំ២០០៥ផងដែរ។
យ៉ាងណា អតីតមេភូមិមកពីគណបក្សប្រជាជនកម្ពុជារូបនេះ បានលើកឡើងថា រូបលោកគ្មានគោលបំណងចង់ទៅចូលរួមជីវភាពនយោបាយជាមួយគណបក្សនយោបាយផ្សេងនោះទេ ដោយបារម្ភពីសុវត្ថិភាព និងខ្លាចមានការធ្វើទុក្ខបុកម្នេញណាមួយទៅលើរូបលោក និងក្រុមគ្រួសារ។
លោកបន្ថែមថា៖ «ស្អីក៏ឈប់ធ្វើដែរ សុំនៅជាអព្យាក្រឹត្យ ធ្វើជាពលរដ្ឋធម្មតា ទៅខាងណាក៏មិនទៅដែរ ព្រោះខ្ញុំវាឈឺចាប់ខ្លាំងពេកដោយសារតែបក្សនយោបាយហ្នឹង។ ឈឺចាប់ដោយសារគេទម្លាក់ដោយគ្មានមូលហេតុច្បាស់លាស់ គ្មានប្រជាពលរដ្ឋណាដឹងឮជាទូទៅ ទម្លាក់ដោយការផ្សំគំនិតគ្នា។ ប្រជាពលរដ្ឋគេងឿងឆ្ងល់ដែរ បើទម្លាក់អី សុំឱ្យរៀបចំឱ្យប្រជាពលរដ្ឋបានដឹងឮទាំងអស់គ្នា»។
វីអូឌី មិនអាចសុំការអត្ថាធិប្បាយជុំវិញករណីនេះពីមេឃុំបល្ល័ង្ក អ្នកស្រី ឡែម ណាត បានទេ នៅថ្ងៃនេះ។
ប៉ុន្តែអ្នកស្រីធ្លាប់បានបញ្ជាក់នាពេលថ្មីៗនេះថា ការបញ្ឈប់លោក ពេញ ព្រូន ពីតំណែង ដោយសារប្រធានភូមិស្នាសង្គ្រាមរូបនេះមានកំហុសច្រើន ក្រោយលោកកាន់តំណែងរយៈពេល៤ឆ្នាំមកនេះ ដូចជា ការយកលុយពីប្រជាពលរដ្ឋពេលធ្វើឯកសារដីធ្លី ការប្រមាថព្រះសង្ឃ និងថ្នាក់ដឹកនាំ ជាដើម។
អ្នកស្រីបន្ថែមថា៖ «គាត់ពាក់ព័ន្ធនឹងការប្រព្រឹត្តកំហុសឆ្គងលើការបម្រើសេវាសាធារណៈច្រើន ដូចខ្ញុំទទួលបានពាក្យបណ្ដឹងរបស់ពលរដ្ឋនៅភូមិស្នាសង្គ្រាមហ្នឹងឯង ទាក់ទងនឹងការរត់ឯកសារច្បាប់ដី គាត់យកលុយគេមកចាយអស់អ៊ីចឹងទៅ គាត់អត់រត់ឯកសារឱ្យគេច្រើនខែហើយបង ហើយគាត់ចាយលុយគេអស់ទៅ។ មួយទៀត គាត់ប្រមាថព្រះសង្ឃ ប្រមាថថ្នាក់ដឹកនាំ»។
នាយកទទួលបន្ទុកកិច្ចការទូទៅ នៃអង្គការការពារសិទ្ធិមនុស្សលីកាដូ លោក អំ សំអាត មានប្រសាសន៍ថា ប្រសិនបើការដកតំណែងលោក ពេញ ព្រូន ចេញពីមេភូមិ ដោយសារគាត់ដឹកនាំពលរដ្ឋតវ៉ាដីធ្លីនោះ គឺជាគំរូមិនល្អមួយ និងបានរំលោភលើគោលការណ៍លទ្ធិប្រជាធិបតេយ្យ និងសិទ្ធិសេរីភាពដែលធានាដោយច្បាប់រដ្ឋធម្មនុញ្ញ។
លោកបន្ថែមថា៖ «ការតវ៉ាការទាមទារដីធ្លី និងការជួយប្រជាពលរដ្ឋ មិនមែនជារឿងខុសច្បាប់នោះទេ។ អាហ្នឹងបើសិនជា ដោយសារតែរឿងហ្នឹង ហើយត្រូវបានដកគាត់ចេញពីមេភូមិ អាហ្នឹងមានន័យថា វាបានរំលោភទៅលើគោលការណ៍លទ្ធិប្រជាធិបតេយ្យ និងសេរីភាពរបស់ពួកគាត់ ដែលធានាដោយច្បាប់ និងរដ្ឋធម្មនុញ្ញ។ យើងមើលមាត្រា៣៥ នៃរដ្ឋធម្មនុញ្ញដែលនិយាយថា ពលរដ្ឋទាំង២ភេទមានសិទ្ធិចូលរួមយ៉ាងសកម្មក្នុងជីវភាពនយោបាយ សេដ្ឋកិច្ច សង្គម និងវប្បធម៌»។
មួយទៀតនោះ លោកថា ការដែលលោក ពេញ ព្រូន មិនហ៊ានចុះចូលជាមួយគណបក្សនយោបាយផ្សេងទៀត ក្រោយដកពីតំណែងនោះ បានឆ្លុះបញ្ចាំងពីស្ថានភាពសង្គមកម្ពុជា។ លោក អំ សំអាត បន្តថា ក្នុងសង្គមកម្ពុជាបច្ចុប្បន្ននេះ អ្នកដែលសកម្មចេញមុខតវ៉ាទាមទារ និងការពារផលប្រយោជន៍ពលរដ្ឋ ហើយទៅចូលជីវភាពនយោបាយក្រៅបក្សកាន់អំណាច តែងតែរងការគំរាមកំហែង និងធ្វើទុក្ខបុកម្នេញពីសំណាក់អាជ្ញាធរ។
អ្នកភូមិចំនួន២១០គ្រួសារ នៅស្រុកប្រាសាទបាគង ឃុំបល្ល័ង្ក ដែលមានដីអាស្រ័យផលចំនួន១៦០ហិកតា នៅភូមិធម្មជាតិរុនតាឯក ឃុំរុនតាឯក ស្រុកបន្ទាយស្រី មានជម្លោះដីធ្លីជាមួយអាជ្ញាធរជាតិអប្សរា តាំងពីឆ្នាំ២០០៥ និងបានផ្ទុះការតវ៉ាទ្រង់ទ្រាយធំជាបន្តបន្ទាប់ទៀតនៅឆ្នាំ២០២២នេះ ដើម្បីទាមទាររកដំណោះស្រាយ ក្នុងនោះក៏មានមេភូមិស្នាសង្គ្រាម លោក ពេញ ព្រូន ផងដែរ៕