រដ្ឋមន្ត្រីការបរទេសសហរដ្ឋអាមេរិក លោក អេនតូនី ប្លីនខេន (Antony Blinken) បានឱ្យដឹងនៅថ្ងៃពុធម្សិលមិញថា អាមេរិកបានអនុម័តផ្តល់ជំនួយយោធាក្នុងទំហំទឹកប្រាក់ចំនួន៤០០លានដុល្លារបន្ថែមទៀតដល់អ៊ុយក្រែន ដែលក្នុងនោះរួមបញ្ចូលទាំងអាវុធ បរិក្ខារយោធា និងឧបករណ៍ការពារដែនអាកាស ជាដើម។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ថ្លែងក្នុងសេចក្តីថ្លែងការណ៍មួយ រដ្ឋមន្ត្រីការបរទេសអាមេរិករូបនេះបន្តថា៖ «គ្រាប់កាំភ្លើងធំ កាំជ្រួចការពារដែនអាកាស និងយានជំនិះយោធាទំនើបៗដែលយើងកំពុងតែផ្តល់ជូននេះ ពិតជាមានសារៈសំខាន់ក្នុងការជួយដល់ប្រទេសអ៊ុយក្រែនក្នុងសមរភូមិ [តទល់នឹងទ័ពរុស្ស៊ី]»។
ជាមួយគ្នានេះ មន្ទីរបញ្ចកោណអាមេរិក (Pentagon) ក៏បានបញ្ជាក់ដែរថា កញ្ចប់ជំនួយនោះ ក៏រួមមានអាវុធបន្ថែមទៀត សម្រាប់ប្រព័ន្ធការពារដែនអាកាស NASAMS និងប្រព័ន្ធរ៉ុក្កែតចល័ត ហាយម៉ាស (HIMARS) ផងដែរ។
គួរបញ្ជាក់ថា កញ្ចប់ជំនួយផ្នែកយោធារបស់អាមេរិក ផ្ដល់ឱ្យអ៊ុយក្រែន គិតរហូតមកដល់ពេលនេះ គឺមានចំនួនប្រមាណ១៩,៧ពាន់លានដុល្លារហើយ គិតចាប់តាំងពីរុស្ស៊ីបានបើកការឈ្លានពានទ្រង់ទ្រាយធំរបស់ខ្លួនទៅលើប្រទេសមួយនេះកាលពីខែកុម្ភៈមក។
ទាក់ទិននឹងករណីនេះ ប្រភពស្និទ្ធស្នាលនឹងប្រធានាធិបតីរុស្ស៊ី លោក វ្លាឌីមៀរ ពូទីន មួយរូប ធ្លាប់បានព្រមានកាលពីពេលកន្លងទៅថា ការកើនឡើងនៃការគាំទ្រផ្នែកយោធាដែលផ្តល់ដល់អ៊ុយក្រែនដោយសហរដ្ឋអាមេរិក និងសម្ពន្ធមិត្តរបស់ពួកគេ គឺជាការចាក់សាំងលើភ្លើងបន្ថែមទៀត ហើយវាក៏អាចនឹងនាំមកនូវហានិភ័យនៃការប្រែក្លាយទៅជាសង្រ្គាមនុយក្លេអ៊ែរយ៉ាងពេញលេញបាន នាពេលខាងមុខផងដែរ៕
