វិមានក្រឹមឡាំង (Kremlin) នៅថ្ងៃព្រហស្បតិ៍ម្សិលមិញ បានលើកឡើងឱ្យដឹងថា ការវាយប្រហារតាមដែនអាកាសរបស់ខ្លួនលើហេដ្ឋារចនាសម្ពន្ធរបស់អ៊ុយក្រែន គឺមិនមែនសំដៅទៅលើជនស៊ីវិលនោះទេ ដោយបន្ថែមថា អ៊ុយក្រែនអាចបញ្ចប់ទុក្ខវេទនារបស់ប្រជាជនខ្លួនបាន តាមរយៈការបំពេញតាមការទាមទាររបស់រុស្ស៊ីក្នុងការដោះស្រាយជម្លោះ។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ការលើកឡើងនេះត្រូវបានធ្វើឡើងបន្ទាប់ពីរុស្ស៊ីក្នុងរយៈពេលប៉ុន្មានសប្តាហ៍ចុងក្រោយនេះ បានវាយប្រហារជាបន្តបន្ទាប់លើហេដ្ឋារចនាសម្ពន្ធថាមពលនៅទូទាំងប្រទេសអ៊ុយក្រែន ដែលក្នុងនោះក៏បានបណ្ដាលឱ្យមនុស្សរាប់លាននាក់រស់នៅដោយគ្មានអគ្គិសនី និងទឹកសម្រាប់ប្រើប្រាស់ ស្របពេលដែលសីតុណ្ហភាពចាប់ផ្ដើមចុះត្រជាក់កាន់តែខ្លាំងផងដែរ។
ទោះជាយ៉ាងណា អ្នកនាំពាក្យវិមានក្រឹមឡាំង លោក ឌីមីទ្រី ប៉េស្កូវ (Dmitry Peskov) បានថ្លែងប្រាប់អ្នកយកព័ត៌មានថា៖ «ការវាយប្រហារ [របស់រុស្ស៊ី] គឺមិនមានការកំណត់គោលដៅលើពលរដ្ឋនោះទេ។ វាគ្មានករណីនេះកើតឡើងឡើយ ខណៈពួកគេពិតជាមានការយកចិត្តទុកដាក់ចំពោះរឿងនេះខ្លាំងណាស់»។
អ្នកនាំពាក្យរូបនេះបន្តថា៖ «ចំពោះគោលដៅ [វាយប្រហារ] គឺផ្ដោតសំខាន់តែលើទីតាំងទាំងឡាយណាដែលមានសក្ដានុពលយោធាប៉ុណ្ណោះ ដែលត្រូវទទួលរងការវាយប្រហារ»។
ស្របពេលដែលលោកប្រធានាធិបតី វ្លាឌីមៀរ ពូទីន ធ្លាប់បានលើកឡើងថា រុស្ស៊ីមិនមានបំណងចង់បំផ្លាញអ៊ុយក្រែន ឬប្រជាជនរបស់ខ្លួន លោក ឌីមីទ្រី ប៉េស្កូវ បានបន្ថែមថា៖ «ថ្នាក់ដឹកនាំរបស់អ៊ុយក្រែនមានឱកាសគ្រប់បែបយ៉ាងក្នុងការធ្វើឱ្យស្ថានការណ៍វិលមករកភាពប្រក្រតីឡើងវិញ និងដោះស្រាយស្ថានការណ៍តាមរយៈការបំពេញតាមតម្រូវការរបស់ភាគីរុស្ស៊ី ដែលពួកគេអាចនឹងបញ្ចប់ការឈឺចាប់ដែលអាចកើតមានក្នុងចំណោមប្រជាជនទាំងអស់របស់ពួកគេបាន»។
រុស្ស៊ីបានបើកការឈ្លានពានទ្រង់ទ្រាយធំរបស់ខ្លួនមកលើអ៊ុយក្រែន តាមផ្លូវគោក ផ្លូវអាកាស និងសមុទ្រ កាលពីខែកុម្ភៈ ដែលបានបង្កឱ្យជនស៊ីវិលរាប់ពាន់នាក់បានស្លាប់បាត់បង់ជីវិត តំបន់ទីក្រុងជាច្រើនប្រែក្លាយទៅជាគំនរបាក់បែក និងបង្កឱ្យមានជាវិបត្តិមនុស្សធម៌ធ្ងន់ធ្ងរកើតឡើង ខណៈមនុស្សរាប់លាននាក់ក៏បានភៀសខ្លួនចេញពីប្រទេសផងដែរ។
ទោះជាយ៉ាងណា បណ្ដាប្រទេសមួយចំនួនធ្លាប់បានអះអាងកាលពីពេលកន្លងទៅថា រុស្ស៊ីនឹងមិនឈ្នះសង្គ្រាមរបស់ខ្លួននៅអ៊ុយក្រែនឡើយ ហើយលោកប្រធានាធិបតី វ្លាឌីមៀរ ពូទីន ក៏មិនអាចកំណត់លក្ខខណ្ឌនៃកិច្ចព្រមព្រៀងសន្តិភាពណាមួយសម្រាប់អ៊ុយក្រែនផងដែរ៕