សហព័ន្ធសហជីពអឺរ៉ុបផ្នែកចំណីអាហារ កសិកម្ម និងទេសចរណ៍ (EFFAT) ទាមទាររដ្ឋាភិបាលដោះលែងកញ្ញា ឈឹម ស៊ីថរ និងថាការចាប់ខ្លួនកញ្ញា ឈឹម ស៊ីថរ ដែលជាមេដឹកនាំសហជីពបុគ្គលិកក្រុមហ៊ុនណាហ្គាវើលដ៍នេះ បំពានលើក្រមនីតិវិធីព្រហ្មទណ្ឌរបស់ប្រទេសកម្ពុជា។
បើតាមលិខិតរបស់សហព័ន្ធសហជីពអឺរ៉ុបផ្នែកចំណីអាហារ កសិកម្ម និងទេសចរណ៍ (EFFAT) ដែលផ្ញើទៅកាន់ឯកអគ្គរាជទូតខ្មែរប្រចាំប្រទេសបែលហ្សិក លោក នង សាកល កាលពីថ្ងៃទី៧ ខែធ្នូ កន្លងទៅនេះ ថាការចាប់ខ្លួនកញ្ញា ឈឹម ស៊ីថរ គឺបំពានទាំងច្បាប់របស់ប្រទេសកម្ពុជា និងកាតព្វកិច្ចការងារនិងសិទ្ធិមនុស្សជាអន្តរជាតិរបស់រាជរដ្ឋាភិបាលកម្ពុជា និង ទាមទារឱ្យដោះលែងកញ្ញា ឈឹម ស៊ីថរ ជាបន្ទាន់ និងដោយគ្មានលក្ខខណ្ឌ។
លិខិតដដែលបន្តថា ការចាប់ខ្លួននិងឃុំខ្លួនជាការបំពានលក្ខខណ្ឌនៅក្រៅឃុំរបស់កញ្ញា ឈឹម ស៊ីថរ ដោយសារតែទាំង កញ្ញា ឈឹម ស៊ីថរ និងមេធាវីរបស់កញ្ញា មិនបានទទួលដំណឹងអំពីលក្ខខណ្ឌនៅក្រៅឃុំ ដូចដែលដីកាបង្គាប់ឱ្យដាក់ក្រោមការត្រួតពិនិត្យតាមផ្លូវតុលាការ និងមិនមានស្នាមមេដៃរបស់កញ្ញាជាភស្តុតាង ដែលបង្ហាញពីលក្ខខណ្ឌនៃការនៅក្រៅឃុំរបស់កញ្ញា ខណៈដែលដីកាបង្គាប់នេះចុះថ្ងៃទី១៤ ខែមីនា ឆ្នាំ២០២២ មិនត្រូវបានប្រគល់ឱ្យកញ្ញា ឈឹម ស៊ីថរ ឬមេធាវីរបស់កញ្ញាទេ រហូតដល់បន្ទាប់ពីការឃុំខ្លួនកញ្ញានៅថ្ងៃទី២៦ ខែវិច្ឆិកា ឆ្នាំ២០២២។
លិខិតរបស់ EFFAT ថា៖ «ការចាប់ខ្លួននិងឃុំខ្លួនកញ្ញា ឈឹម ស៊ីថរ គឺបំពានលើក្រមនីតិវិធីព្រហ្មទណ្ឌរបស់កម្ពុជា ដែលចែងយ៉ាងច្បាស់ថា ជនត្រូវចោទត្រូវទទួលដំណឹងអំពីលក្ខខណ្ឌនៃការនៅក្រៅឃុំរបស់ខ្លួន»។
បន្ថែមពីនេះ សហព័ន្ធសហជីពអឺរ៉ុបផ្នែកចំណីអាហារ កសិកម្ម និងទេសចរណ៍ ថាការចាប់ខ្លួនកញ្ញា ឈឹម ស៊ីថរ បានរំលោភលើកាតព្វកិច្ចរបស់រដ្ឋាភិបាលក្នុងការការពារ និងគោរពសិទ្ធិសេរីភាពក្នុងការបង្កើតសហជីព និងកាតព្វកិច្ចរបស់កម្ពុជាក្រោមអនុសញ្ញា ៨៧ របស់អង្គការ ILO ដែលរដ្ឋាភិបាលបានផ្តល់សច្ចាប័នក្នុងខែសីហា ឆ្នាំ១៩៩៩។
បន្ថែមពីនេះ សហព័ន្ធសហជីពអឺរ៉ុបផ្នែកចំណីអាហារ កសិកម្ម និងទេសចរណ៍ (EFFAT) ថាការធ្វើកូដកម្មរបស់កូដករ គឺជាការអនុវត្តសិទ្ធិជាមូលដ្ឋានក្នុងការទាមទារដំណោះស្រាយរបស់ពួកគេ តែបែរជាត្រូវបានអាជ្ញាធរកម្ពុជាធ្វើទុក្ខបុកម្នេញទៅវិញ។
លិខិតរបស់ EFFAT បន្តថា៖ «បន្ទាប់ពីការព្យាយាមជាច្រើនដងដើម្បីចរចាជាមួយក្រុមហ៊ុនដោយសុទ្ធចិត្ត និងស្វែងរកដំណោះស្រាយចំពោះវិវាទនោះ LRSU បានចាប់ផ្តើមធ្វើកូដកម្ម ដោយគោរពតាមនីតិវិធីច្បាប់។ ក្នុងអំឡុងពេលដែលយើងសរសេរលិខិតនេះ កូដកម្មនៅតែបន្ត បើទោះជាកម្មករប្រឈមនឹងអំពើហិង្សា និងការធ្វើទុក្ខបុកម្នេញដែលនៅតែបន្តពីសមត្ថកិច្ចនិងក្រុមហ៊ុនក៏ដោយ»។
ប្រភពបន្ថែមថា ការអះអាងរបស់ក្រុមហ៊ុនណាហ្គាវើលដ៍ ដែលថាការបញ្ឈប់បុគ្គលិក គឺជាការចាំបាច់ដោយសារអាជីវកម្មរបស់ក្រុមហ៊ុនប៉ះពាល់ដោយជំងឺកូវីដ-១៩ តែឥលូវនេះបង្ហាញថា ក្រុមហ៊ុនកុហក ក្រុមហ៊ុនកំពុងទទួលបានប្រាក់ចំណេញច្រើន ហើយបានចាប់ផ្តើមជួលកម្មករថ្មី។
កញ្ញា ឈឹម ស៊ីថរ ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរ នៃក្រុមហ៊ុនណាហ្គាវើលដ៍ (LRSU) ត្រូវបានសមត្ថកិច្ចចាប់ឃុំខ្លួនកាលពីថ្ងៃទី២៦ ខែវិច្ឆិកា ឆ្នាំ២០២២ នៅអាកាសយានដ្ឋានអន្តរជាតិភ្នំពេញ ក្នុងពេលកញ្ញាត្រលប់មកពីប្រទេសអូស្ត្រាលីវិញ ដែលកញ្ញាបានទៅចូលរួមមហាសន្និបាតពិភពលោក លើកទី៥ នៃសហព័ន្ធសហជីពអន្តរជាតិ (ITUC)៕