បន្ទាប់ពីចូលរួមប្រារព្ធខួបលើកទី៧៤ នៃទិវាសិទ្ធិមនុស្សអន្តរជាតិ ១០ធ្នូ រួចមក ក្រុមកូដករណាហ្គាវើលដ៍ប្រមាណ ១០០នាក់បាននាំគ្នាទៅបង្ហោះប៉ោងៗ និងលើកបដាមួយចំនួននៅរសៀលថ្ងៃសិទ្ធិមនុស្សដដែលនេះ ក្នុងគោលបំណងទាមទារឱ្យដោះលែងប្រធានសហជីពរបស់ពួកគេ គឺកញ្ញា ឈឹម ស៊ីថរ ឱ្យមានសេរីភាពវិញ។
កូដករណាហ្គាវើលដ៏មួយរូបដែលចូលរួមសកម្មភាពនោះ អ្នកនាង សុខ ថាវុធ ប្រាប់វីអូឌីនៅថ្ងៃទី១០ធ្នូនេះថា ការដែលពួកគេមកបង្ហោះប៉ោងៗ កាន់រូបថត និងលើកបដានៅមុខពន្ធនាគាព្រៃសឬម២ ក្នុងគោលបំណងបង្ហាញថា ពួកគេនៅទាមទារសិទ្ធិសេរីភាពសហជីព ទោះបីជាវិវាទការងារនេះបានអូសបន្លាយអស់រយៈពេល១ឆ្នាំក្ដី។
បន្ថែមពីនេះ ពួកគាត់ទាមទារឱ្យទម្លាក់រាល់ការចោទប្រកាន់ទៅលើថ្នាក់ដឹកនាំ និងសមាជិកសហជីពក្រុមហ៊ុនណាហ្គាវើលដ៍ទាំងអស់ ជាពិសេសដោះលែងប្រធានសហជីពប្រចាំក្រុមហ៊ុននេះ កញ្ញា ឈឹម ស៊ីថរ ដោយថាការឃុំខ្លួនកញ្ញាជារឿងអយុត្តិធម៌។
អ្នកនាងលើកឡើងថា៖«យើងបង្ហោះជាសារ ជារូបភាព បង ឈឹម ស៊ីថរ ហ្នឹង យើងចង់បញ្ជាក់ប្រាប់ថាគាត់មិនឯកការទេ ហើយអ្វីដែលពួកយើងចង់បានសិទ្ធិសេរីភាពជាមនុស្ស ហើយក៏ដូចជាសិទ្ធិសេរីភាពការងារដែលពួកយើងកំពុងទាមទារអ៊ីចឹងដែរ»។
អ្នកនាងបន្ថែមថា៖«ហើយសារដែលយើងបង្ហោះហ្នឹងចង់បញ្ជាក់ថា ក្រុមកូដករថ្ងៃហ្នឹងគឺពួកយើងស្លៀកបំពាក់ពណ៌ស្លាទុំប្រៀបបីដូចជាអ្នកទោស មានន័យថាកូដករគឺអត់ខ្លាចជាប់គុកទេ។ អ៊ីចឹង គឺយើងមានសិទ្ធិសេរីភាពក្នុងការបញ្ចេញមតិ។ អ៊ីចឹងបើការបញ្ចេញមតិត្រូវបានជាប់ពន្ធនាគាដែរ អ៊ីចឹងពួកយើងអត់ខ្លាចទេ»។
ខ្លឹមសារលើបដា ដែលលើកឡើងក្នុងពេលប្រមូលផ្តុំ និងបង្ហោះប៉ោងៗនៅខាងមុខពន្ធនាគារព្រៃសនោះ មានអត្ថន័យថា «ការចាប់ដាក់គុកមិនមែនជាដំណោះស្រាយទេ, គ្មានអ្នកណាចង់ជាប់គុកនោះទេតែដើម្បីសិទ្ធិសេរីភាពយើងហ៊ានត្រូវប្ដូរ, យុត្តិធម៌ត្រូវតែឈ្នះអំពើអយុត្តិធម៌ ហើយយកឈ្នះភាពភ័យខ្លាចដើម្បីយុត្តិធម៌, បញ្ឈប់ការចាប់អ្នកទាមទារសិទ្ធិការងារដាក់គុក» ព្រមទាំងខ្លឹមសារមួយចំនួនទៀត។
តាមរយៈវីដេអូដែលផ្សាយលើបណ្តាញសង្កមហ្វេសប៊ុកនៅថ្ងៃសៅរ៍នេះបង្ហាញថា ក្នុងពេលប្រមូលផ្តុំនៅខាងមុខពន្ធនាគារនោះ មន្ត្រីពន្ធនាគារបានចេញមកប្រាប់កូដករ និងសហជីពដែលមានវត្តមាននៅទីនោះ ឱ្យដកថយចេញពីខាងមុខពន្ធនាគារ ដើម្បីរក្សាសណ្តាប់ធ្នាប់ និងបង្កភាពងាយស្រួលដល់ក្រុមគ្រួសារអ្នកជាប់ឃុំផ្សេងទៀត ក្នុងការចូលទៅជួបសាច់ញាតិរបស់ពួកគេក្នុងពន្ធនាគារ។
ក្រុមកូដករ និងសហជីព បានបញ្ជាក់ប្រាប់ទៅមន្ត្រីពន្ធនាគារវិញថា ពួកគេសុខចិត្តនៅមួយចំហៀងផ្លូវ និងមិនបង្កការរំខានណាមួយដល់ពលរដ្ឋក្នុងការធ្វើដំណើរ ពិសេសពលរដ្ឋដែលចង់ចូលទៅសួរសុខទុក្ខសាច់ញាតិរបស់ពួកគេក្នុងពន្ធនាគារនោះឡើយ។
ថ្លែងនៅមុខពន្ធនាគារព្រៃសនៅថ្ងៃទី១០ខែធ្នូ ឆ្នាំ២០២២ ប្រធានសហព័ន្ធសហជីពកម្មករចំណីអាហារ និងសេវាកម្មកម្ពុជា អ្នកស្រី អ៊ូ ទេពផល្លីន លើកឡើងថា ការជួបជុំគ្នានៅមុខពន្ធនាគារព្រៃសនោះ មិនមានបំណងដើម្បីមកបើកទ្វារ ឬរំដោះ កញ្ញា ស៊ីថរ នោះឡើយ ប៉ុន្តែការជួបជុំគ្នានោះ គឺធ្វើឡើងក្នុងថ្ងៃសិទ្ធិមនុស្សអន្តរជាតិ១០ធ្នូ ដើម្បីបង្ហាញការនឹករលឹក ព្រោះអ្នកធ្វើការងារការពារសិទ្ធិកម្មករត្រូវបានជាប់ពន្ធនាគារដោយអយុត្តិធម៌។
អ្នកស្រីក៏បានលើកឡើងថា អ្នកការពារសិទ្ធិមនុស្ស អ្នកការពារសិទ្ធិកម្មករក្នុងវិស័យការងារមិនមែនជាឧក្រិដ្ឋជនឡើយ ប៉ុន្តែពួកគេនៅតែរងភាពអយុត្តិធម៌តាមរយៈប្រព័ន្ធតុលាការ។
អ្នកស្រីបន្តថា៖ «នៅពេលយើងធ្វើការងារសកម្មជនសិទ្ធិមនុស្ស យើងតែងតែរងនូវភាពអយុត្តិធម៌តាមរយៈការយកតុលាការជាឧបករណ៍ក្នុងការចាប់ថ្នាក់ដឹកនាំសហជីព ចាប់សកម្មជនសិទ្ធិមនុស្សតាមតែអំពើចិត្ត ឃុំខ្លនតាមតែអំពើចិត្ត។ រឿងករណីណាហ្គា បើយើងតាមមើលមែនទែនទៅ សូម្បីតែព្រះរាជអាជ្ញាក៏ចេញមកជួយចោទជំនួសក្រុមហ៊ុនដែរ»។
ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរ នៃក្រុមហ៊ុនណាហ្គាវើលដ៍ កញ្ញា ឈឹម ស៊ីថរ ត្រូវបានសមត្ថកិច្ចចាប់នៅព្រលានយន្តហោះអន្តរជាតិភ្នំពេញ និងបញ្ជូនទៅឃុំនៅពន្ធនាគារព្រៃស ជាលើកទី២ ក្រោយពេលកញ្ញាបានធ្វើដំណើរត្រលប់មកពីប្រជុំនៅប្រទេសអូស្ត្រាលីវិញ កាលពីព្រឹកថ្ងៃទី២៦ ខែវិច្ឆិកា។
ក្នុងសេចក្តីថ្លែងការណ៍របស់អ្នកនាំពាក្យអយ្យការអមសាលាដំបូងរាជធានីភ្នំពេញ កាលពីថ្ងៃទី២៩ ខែវិច្ឆិកា បានអះអាងថា ការចាប់ខ្លួនកញ្ញា ឈឹម ស៊ីថរ ជាថ្មីទៀតនេះ ដោយសារកញ្ញាបានចាកចេញពីកម្ពុជាដោយគ្មានការអនុញ្ញាតពីចៅក្រោមស៊ើបសួរ ដែលអំពើនេះជាការបំពានលើកាតព្វកិច្ចនៃការត្រួតពិនិត្យតាមផ្លូវតុលាការ។
សេចក្តីថ្លែងការណ៍បន្តថា ចំពោះការលើកឡើងថា ជនត្រូវចោទមិនទទួលបានដំណឹងពីដីកាសម្រេចក្នុងការដាក់ឱ្យជនត្រូវចោទ កញ្ញា ឈឹម ស៊ីថរ ស្ថិតនៅក្រោមការត្រួតពិនិត្យតាមផ្លូវតុលាការនោះ គឺបង្ហាញយ៉ាងច្បាស់ពីចេតនាមិនទទួលខុសត្រូវចំពោះមុខច្បាប់។
ប្រភពដដែលបន្តថា ក្នុងករណីនេះ នៅពេលចៅក្រមស៊ើបសួរសម្រេចដោះលែងជនត្រូវចោទឱ្យនៅក្រៅឃុំបណ្ដោះអាសន្ននោះ ចៅក្រមស៊ើបសួរប្រើប្រាស់វិធានការជំនួសមកវិញនូវដីកាសម្រេចដាក់ជនត្រូវចោទឱ្យស្ថិតនៅក្រោមកាតព្វកិច្ចនៃការត្រួតពិនិត្យតាមផ្លូវតុលាការ ដែលដីកាសម្រេចនេះ ជនត្រូវចោទត្រូវតែគោរពតាម និងអនុវត្តឱ្យបានម៉ឺងម៉ាត់។
តែយ៉ាងនេះក្តី សហមេធាវីការពារក្តីកញ្ញា ស៊ីថរ ធ្លាប់អះអាងប្រាប់វីអូឌីថា ពួកគេមិនទទួលបានសេចក្តីជូនដំណឹងណាមួយពាក់ព័ន្ធដីកាត្រួតពិនិត្យតាមផ្លូវតុលាការឡើយ។
ក្រោយការចាប់ឃុំខ្លួន កញ្ញា ស៊ីថរ ជាលើកទី២ មិនបានប៉ុន្មានម៉ោងផង ប្រតិកម្មពីសំណាក់សហគមន៍ជាតិ និងអន្តរជាតិក៏ចាប់ផ្តើមធ្លាក់មកជាបន្តបន្ទាប់។
សហរដ្ឋអាមេរិក និងអូស្ត្រាលី ជាប្រទេសនាំមុខគេក្នុងការទាមទារឱ្យរដ្ឋាភិបាលកម្ពុជាដោះលែងកញ្ញា ឈឹម ស៊ីថរ និងសមាជិកសហជីពផ្សេងទៀតដែលកំពុងជាប់ឃុំ ព្រមទាំងស្នើឱ្យដោះស្រាយបញ្ចប់វិវាទការងារនេះឱ្យបានត្រឹមត្រូវ។
ដោយឡែក កាលពីថ្ងៃទី៧ ខែធ្នូ លិខិតរបស់សហព័ន្ធសហជីពអឺរ៉ុបផ្នែកចំណីអាហារ កសិកម្ម និងទេសចរណ៍(EFFAT) បានផ្ញើទៅកាន់ឯកអគ្គរាជទូតខ្មែរប្រចាំប្រទេសបែលហ្សិក លោក នង សាកល បញ្ជាក់ថា ការចាប់ខ្លួនកញ្ញា ឈឹម ស៊ីថរ គឺបំពានច្បាប់របស់កម្ពុជា ។ បន្ថែមពីនេះ គឺបំពានលើកាតព្វកិច្ចការងារ និងសិទ្ធិមនុស្សជាអន្តរជាតិរបស់រាជរដ្ឋាភិបាលកម្ពុជា។ ករណីនេះ EFFAT ទាមទារឱ្យរដ្ឋាភិបាលដោះលែងកញ្ញា ឈឹម ស៊ីថរ ជាបន្ទាន់ និងដោយគ្មានលក្ខខណ្ឌ៕