មន្ត្រីជាន់ខ្ពស់ក្រសួងមហាផ្ទៃ ឱ្យដឹងថា តាមការស៊ើបសង្កេតបឋម គ្រាប់បែកដៃដែលប្រទះឃើញនៅមុខក្រុមហ៊ុនណាហ្គាវើលដ៍២នោះ សមត្ថកិច្ចបានរកឃើញជនបង្កជាជនជាតិចិន ដោយគ្រាប់បែកដៃនោះត្រូវបានគេដឹកតាមរថយន្តទំនើបមួយគ្រឿង ហើយជ្រុះនៅតាមដងផ្លូវនៃកន្លែងកើតហេតុ។
នៅព្រឹកថ្ងៃព្រហស្បតិ៍នេះ មានការភ្ញាក់ផ្អើលមួយ ក្រោយស្ត្រីជាអ្នកបោសសម្អាតតាមដងផ្លូវ បានប្រទះឃើញគ្រាប់បែកមួយគ្រាប់នៅមុខក្រុមហ៊ុនណាហ្គាវើលដ៍២ ក្បែររដ្ឋសភា ក្នុងខណ្ឌចំការមន រាជធានីភ្នំពេញ។
អ្នកនាំពាក្យក្រសួងមហាផ្ទៃ លោក ខៀវ សុភ័គ មានប្រសាសន៍ថា គ្រាប់បែកដៃដែលស្ត្រីអ្នកបោសសម្អាតផ្លូវនោះបានប្រទះឃើញ ត្រូវបានសមត្ថកិច្ចស្រាវជ្រាវរកឃើញជាបឋម ថាមានជនបង្កជាជនជាតិចិន។
លោករៀបរាប់ឱ្យដឹងថា៖ «មិនមែនជាគ្រាប់បែកបង្កៃទេ តាមការស៊ើបអង្កេត និងសាក្សី យើងរកឃើញថាមានឡានមួយបើកទៅ ពេលបើកទៅ ក៏វាជ្រុះពីឡាននោះ គ្រាប់បែកនោះជ្រុះមួយដុំ ជ្រុះរបស់មួយដុំពីឡាន។ ដល់ព្រលឹមឡើង អ្នកអនាម័យយើងនោះ គាត់ធ្វើការព្រលឹមឡើង គាត់ឃើញ គាត់ក៏រើសយកមកដាក់កន្លែងសួនច្បារហ្នឹង ហើយគាត់ក៏មានការសង្ស័យ គាត់រាយការណ៍ឱ្យអ្នកក្បែរហ្នឹង […] យើងរកលេខឡានហ្នឹងឃើញហើយ ជាឡានទំនើបមួយ ហើយយើងក៏ឆែកទៅក្រសួងគមនាគមន៍ ក៏ឃើញអត្តសញ្ញាណអ៊ីចឹងដែរ។ អ៊ីចឹងយើងកំពុងតែតាមដានរកមើលជនល្មើសថាតើវាទម្លាក់របស់ហ្នឹងយ៉ាងម៉េចសិន»។
តែយ៉ាងណា លោក ខៀវ សុភ័គ យល់ឃើញថា ករណីនេះមិនមែនជារឿងភេរវកម្ម ឬរឿងនយោបាយនោះទេ អាចជារឿងដែលជនបង្កចាញ់ល្បែងច្រើនជាង។
លោក ខៀវ សុភ័គ ថ្លែងថា៖ «ដូច្នេះ ក្នុងជំហានដំបូងនេះ យើងរកឃើញថា វាមិនមែនជារឿងភេរវកម្មអីទេ ហើយក៏មិនមែនជារឿងនយោបាយ គំរាមកំហែងអី អត់មានទេ! គ្រាន់ថា ទីមួយ វាអាចជាជម្លោះឈ្លោះគ្នា ឬក៏ការគំរាមគ្នាក្នុងរឿងល្បែងស៊ីសងនេះ ដូចថាចាញ់ល្បែងគំរាមគ្នា អាចអ៊ីចឹងច្រើនជាង»។
អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ លោក ស ថេត មានប្រសាសន៍ថា សមត្ថកិច្ចជំនាញបាននិងកំពុងសហការគ្នាស្វែងរកជនសង្ស័យ ដើម្បីមានចំណាត់ការទៅតាមផ្លូវច្បាប់។
លោកថា៖ «រឿងហ្នឹង ពីណាទេ គេយកទៅប្លុង [ចោល] ហើយអ្នកអនាម័យ បោសសំរាម គេរកឃើញ! ដល់អ៊ីចឹងទៅ ខាងស៊ីម៉ាក់ គេយកទៅបំផ្ទុះចោលទៅ គេកម្ទេចចោល។ គេកំពុងធ្វើ[សមត្ថកិច្ចកំពុងស្រាវជ្រាវ] អត់មានអ្នកណាគេដឹងភ្លាមទេ គេកំពុងរួមដៃគ្នាដើម្បីស្រាវជ្រាវ កំពុងតែកំណត់»។
ស្រ្តីជាអ្នកបោសសំរាមដែលបានប្រទះឃើញគ្រាប់បែកនោះ អ្នកស្រី ពៅ សាវី បានរៀបរាប់ប្រាប់អ្នកសារព័ត៌មាននៅកន្លែងកើតហេតុនោះថា នៅម៉ោងប្រមាណ៦ព្រឹក ថ្ងៃទី១៥ ខែធ្នូ ឆ្នាំ២០២២នេះ អ្នកស្រីបានទៅបោសសំរាមដូចសពដងនៅតាមដងវិថីរដ្ឋសភា ស្រាប់តែពេលនោះ អ្នកស្រីបានប្រទះឃើញវត្ថុម្យ៉ាងពណ៌ស និងមានសភាពស្អិត ហើយអ្នកស្រីក៏បានកាយមើល ស្រាប់តែប្រទះឃើញគ្រាប់បែកនោះតែម្តង ទើបអ្នកស្រីប្រញាប់រាយការណ៍ទៅសមត្ថកិច្ច។
អ្នកស្រីថា៖ «ខ្ញុំកាយមើលសង្ស័យ សង្ស័យគ្រាប់ស្អីគេ ក៏កាយមើល ដល់កាយចេញជារូបគ្រាប់ ខ្ញុំនៅ[មិនអស់ចិត្ត]នេះទៀត ស្មានតែដបទឹកអប់ ខ្ញុំកាយទៀត កាយទៅឃើញខ្សែភ្លើង។ វាអត់មានថង់ទេ វានៅស្អិតៗដូចនំខេក ឬរបៀបថង់ប្លាស្ទិក»។
ប្រតិភូរាជរដ្ឋាភិបាលទទួលបន្ទុកជាអគ្គនាយកមជ្ឈមណ្ឌលសកម្មភាពកំចាត់មីនកម្ពុជា(CMAC) លោក ហេង រតនា មានប្រសាសន៍ថា គ្រាប់បែកដែលត្រូវបានប្រទះឃើញនោះ ជាប្រភេទគ្រាប់បែកដៃ ហើយវាបានផ្ទុះ ខណៈមន្ត្រីជំនាញកំពុងឆែកប្រព័ន្ធសុវត្ថិភាព។
លោកថា៖ «គ្រាប់បែកដៃ […] យើងចូលទៅធ្វើការទៅ ឆែកសុវត្ថិភាព គេដាក់ខ្សែទាញមើលអីទៅ វាក៏ផ្ទុះ»។
ទោះជាយ៉ាងណា បើតាមសមត្ថកិច្ច ហេតុការណ៍នេះពុំបានបណ្តាលឱ្យនរណាម្នាក់រងរបួស ឬគ្រោះថ្នាក់ឡើយ៕