ក្រុមយុវជននៅខេត្តកំពង់ចាម ៣៥នាក់ ដែលជាអ្នកស្រឡាញ់សុខភាព និងតែងតែជួយការងារសង្គម បានផ្ដួចផ្ដើមគំនិតជាលើកដំបូង ដោយជ្រើសរើសយកថ្ងៃទី១២ ខែធ្នូ ឆ្នាំ២០២២ កន្លងទៅនេះ ប្រមូលផ្ដុំគ្នា ដើម្បីបរិច្ចាគឈាមជូនដល់មន្ទីរពេទ្យទុកសម្រាប់ជួយសង្គ្រោះដល់ពលរដ្ឋដែលត្រូវការឈាមដើម្បីប្រើប្រាស់។
យុទ្ធនាការរបស់ក្រុមយុវជនជិះកង់នេះ គឺក្នុងគោលបំណងឱ្យប្រជាពលរដ្ឋចេះស្រឡាញ់សុខភាព រួមសាមគ្គីភាពគ្នា ជួយការងារសង្គម និងចេះជួយដល់អ្នកដទៃ។ ដោយយុទ្ធនាការនេះចាប់ពីអាហារដ្ឋាន យូខេស៊ី ស្ថិតក្នុងសង្កាត់វាលវង់ ក្រុងកំពង់ចាម ដែលមានចម្ងាយ៤គីឡូម៉ែត្រ ឆ្ពោះទៅកាន់មន្ទីរពេទ្យបង្អែកខេត្តកំពង់ចាម។
ប្រធានក្រុមធ្វើយុទ្ធនាការជិះកង់ដែលមានឈ្មោះថា «សុខភាពជិះកង់កំពង់ចាម» លោក ជា ជាង បានលើកឡើងថា លោកបង្កើតក្រុមសុខភាពជិះកង់កំពង់ចាម មានសមាជិកជាង១០នាក់ គោលបំណងនៃក្រុមជិះកង់នេះបង្ហាញឱ្យយុវជនសព្វថ្ងៃ កែប្រែគំនិតមកស្រឡាញ់សុខភាព តាមរយៈការជិះកង់ហាត់ប្រាណ និងរួមគ្នាបរិច្ចាគឈាម ដើម្បីជួយសង្គ្រោះដល់អ្នកដទៃដែលកំពុងត្រូវការឈាមជួយសង្គ្រោះបន្ទាន់។
លោកបន្តថា៖ «ការជិះកង់របស់ “សុខភាពកំពង់ចាម” នេះ គឺទី១ គោលបំណងធំបំផុត គឺដើម្បីសុខភាពបាន[ល្អប្រសើរ] ហើយទី២ គឺជាការប្រមូលផ្ដុំនូវមជ្ឈមណ្ឌលការហាត់ប្រាណ សម្រាប់បងប្អូនប្រជាពលរដ្ឋទូទៅ»។
ស្រដៀងគ្នានេះដែរ លោក ដន ផុសនិត ដែលជាអ្នកដឹកនាំយុវជនជិះកង់ ហើយជាប្រធានក្រុមឈ្មោះ «ជិះកង់ឆាខ្វៃ» បានបង្ហាញពីសារៈសំខាន់នៃការផ្ដល់ឈាមថា ការបរិច្ចាគឈាមនេះ វាមានអត្ថប្រយោជន៍ជាច្រើនចំពោះសុខភាព ហើយនឹងជួយធ្វើឱ្យយើងលុបបំបាត់ការធុញថប់ក្នុងអារម្មណ៍ ជួយបញ្ចុះគីឡូ មិនឱ្យឡើង។ លោកបន្តអះអាងថា ការផ្តល់ឈាមនេះ វាបានជួយសង្គ្រោះមនុស្សម្នាក់មិនឱ្យស្លាប់បាន ដូច្នេះវាមានន័យខ្លាំងសម្រាប់អ្នកក្រីក្រ ឬអ្នកកំពុងត្រូវការឈាម។
លោកបន្តថា៖ «អ្វីដែលសំខាន់ ចង់ចែករំលែកទាក់ទងជាមួយនឹងបញ្ហាសុខភាព ហើយក៏ដូចជាការចែករំលែកទៅដល់ប្រជាជន ទាក់ទងនឹងមន្ទីរពេទ្យពីការផ្ដល់ឈាម ជាទូទៅការផ្ដល់ឈាម វាអត្ថប្រយោជន៍ជាច្រើន ដូចជា ការធ្វើឱ្យយើងបាត់នូវអារម្មណ៍ស្ត្រេស ទី២ ទាក់ទងទៅជាមួយនឹងការបង្កើតនូវឈាមក្រហមថ្មីឡើងវិញ ឈាមក្រហមចាស់ត្រូវបានបរិច្ចាគ ហើយឈាមថ្មីត្រូវបានបង្កើតថ្មី»។
លោកបន្ថែមទៀតថា៖ «វាធ្វើឱ្យយើងហ្នឹងផ្ដល់ឈាមទៅឱ្យប្រជាជនក្រីក្រដែលគេខ្វះខាតឈាម ប្រៀបបានទៅនឹងធានាគារឈាមអ៊ីចឹង សរុបជារួម ហៅថាធានាគារឈាម។ ហើយការចូលរួមក្រុមកង់របស់ខ្ញុំមានគ្នា រហូតដល់២០នាក់ គឺក្រុមកង់ឆាខ្វៃ ហើយការផ្ដល់ឈាមនេះមានអារម្មណ៍ថាសប្បាយរីករាយ ដែលបានជួបជុំគ្នាជាច្រើន ក៏ដូចជារីករាយក្នុងការផ្ដល់ឈាមហ្នឹង»។
ជុំវិញរឿងនេះ អនុប្រធានមន្ទីរពេទ្យបង្អែកខេត្តកំពង់ចាម លោកវេជ្ជបណ្ឌិត ច្រឹង នរិទ្ធ ប្រាប់វីអូឌីឱ្យដឹងថា មកដល់ពេលនេះ ឈាមដែលបានផ្ដល់ក្នុងមន្ទីរពេទ្យបង្អែក បើធៀបនឹងចំនួនអ្នកប្រើប្រាស់ គឺមិនទាន់គ្រប់ចំពោះតម្រូវការនោះទេ។ លោកបន្តថា ដោយសារភាពចាំបាច់របស់អ្នកប្រើប្រាស់ឈាមមានចំនួនលើសពីការផ្គត់ផ្គង់ ហេតុនេះនាំឱ្យមន្ទីរពេទ្យចេះតែបន្តខ្វះខាតឈាមសម្រាប់ព្យាបាលអ្នកជំងឺជាដរាប។
លោកបន្តថា៖ «យើងឃើញថាចំនួន [អ្នកត្រូវការឈាម] ហ្នឹងវាលើសចំនួនដែលយើងបានប្រមូល[ការបរិច្ចាគឈាម] តែជាធម្មតា យកមក យើងបំបែកពីឈាមក្រហមសុទ្ធទៅជាប្លាស្មា ហើយពេលខ្លះចាំបាច់បំប្លែងពីប្លាស្មា ទៅប្លាកែតទៀត។ បើប្រៀបទៅ [តម្រូវការឈាម]មានលើសចំនួនទៅនឹងការប្រមូលហ្នឹង»។
លោកបញ្ជាក់បន្ថែមទៀតថា៖ «ចំពោះអ្នកជួបប្រទះកន្លងមកហ្នឹង ជាពិសេសស្រ្តីឆ្លងទន្លេ មានការហូរឈាមច្រើន អ្នកជំងឺដែលមានគ្រោះថ្នាក់ចរាចរណ៍ អ្នកជំងឺដែលស្លេកស្លាំង ដែលមានជំងឺគ្រាប់ឈាម ឬក៏មានជំងឺខួរឆ្នង គាត់តែងតែមកដាក់ឈាមដើម្បីសង្គ្រោះជីវិត»។
បើតាមអនុប្រធានមន្ទីរពេទ្យបង្អែករូបនេះ ក្នុងរយៈពេលត្រឹមខែ១១ ក្នុងឆ្នាំ២០២២នេះ មន្ទីរពេទ្យបង្អែកខេត្តកំពង់ចាម ទទួលបានការបរិច្ចាគឈាមពីសប្បុរសជនមានចំនួន ២ ៩២៥ផ្លោក សម្រាប់ជូនអ្នកជំងឺ។ បើគិតពីតួលេខនេះ គឺជាចំនួនមួយដែលនៅតែមិនទាន់គ្រប់ចំពោះតម្រូវការដែលនឹងត្រូវប្រើប្រាស់នៅក្នុងមន្ទីរពេទ្យនេះនៅឡើយទេ។
លោកវេជ្ជបណ្ឌិត ច្រឹង នរិទ្ធ ឱ្យដឹងទៀតថា ចំពោះលក្ខខណ្ឌក្នុងការផ្ដល់ឈាមឱ្យអ្នកជំងឺក្នុងមន្ទីរពេទ្យវិញ លុះត្រាតែមានការបញ្ជាក់ពីមន្ទីរសុខាភិបាលផ្ទាល់ ទើបផ្ដល់ជូនពួកគាត់ ហើយការផ្តល់ជូននេះទៀតសោត លុះត្រាមានអាការ ដូចជា ស្រ្តីសម្រាលកូន ហូរឈាមចេញក្រៅច្រើន ដូចជាអ្នកជំងឺគ្រោះថ្នាក់ចរាចរណ៍ និងអ្នកជំងឺដែលមានស្ថានភាពស្លេកស្លាំង ឬក៏អ្នកជំងឺឈាមសស៊ីឈាមក្រហម ជាដើម។
ចំណែកទីប្រឹក្សាក្រសួងសុខាភិបាល និងជាប្រធានមន្ទីរសុខាភិបាលខេត្តកំពង់ចាម លោកវេជ្ជបណ្ឌិត គីមសួរ ភីរុណ ថ្លែងថា ការបរិច្ចាគឈាមនេះមិនត្រឹមតែជួយផ្តល់ផលប្រយោជន៍ជាច្រើនសម្រាប់សុខភាពរបស់មនុស្សប៉ុណ្ណោះទេ ប៉ុន្តែវាក៏នឹងមិនធ្វើឱ្យមនុស្សមានជំងឺបេះដូង ជាពិសេសការផ្ដល់ឈាមនេះ វាក៏នឹងជួយរក្សាតុល្យភាពទម្ងន់បានល្អថែមទៀតផង។
លោកបន្តថា៖ «អ្នករងគ្រោះ ក៏ដូចជាពិសេស ស្រ្តីសម្រាលកូន ដែលមានតម្រូវការឈាមនៅពេលសម្រាលកូន អ៊ីចឹងអត្ថប្រយោជន៍នៃការបរិច្ចាគឈាម គឺមាន២សំខាន់ ទី១ គាត់បានជួយសង្គ្រោះអាយុជីវិតអ្នកដែលត្រូវការឈាម ទី២ ធ្វើឱ្យសុខភាពរបស់ក្រុមធាក់កង់ហ្នឹងកាន់តែល្អប្រសើរ»។
ឆ្លើយតបរឿងនេះ អភិបាលរងខេត្តកំពង់ចាម លោក ហាន កុសល គាំទ្រនិងលើកទឹកចិត្តចំពោះក្រុមយុវជនជិះកង់ ដែលបានលះបង់ពេលវេលា និងស្ម័គ្រចិត្តមកបរិច្ចាគឈាមនៅមន្ទីរពេទ្យបង្អែក ដោយលោកមើលឃើញថាជាទង្វើសប្បុរសធម៌មួយនៅក្នុងសង្គម។ លោកអំពាវនាវដល់ប្រជាពលរដ្ឋ និងជាពិសេសក្រុមយុវជន ត្រូវរួមគ្នាបរិច្ចាគឈាមជូនមន្ទីរពេទ្យឱ្យបានគ្រប់គ្នា ដើម្បីសង្គ្រោះមនុស្សដែលកំពុងត្រូវការឈាម។
លោកបន្តថា៖ «សកម្មភាពការផ្ដល់ឈាមនេះ គឺមានសារៈសំខាន់ណាស់សម្រាប់ជួយសង្គ្រោះអាយុជីវិត។ ដូច្នេះហើយ ក្នុងនាមខ្ញុំជាយុវជនម្នាក់ ជាប្រជាពលរដ្ឋម្នាក់ ជាប្រធានសហភាពសហព័ន្ធយុវជនខេត្តកំពង់ចាម ហើយក៏ជាអភិបាលរងខេត្តកំពង់ចាម ក៏សូមអំពាវនាវដល់ពុកម្តាយ បងប្អូនប្រជាពលរដ្ឋ យុវជនទាំងអស់ សុំឱ្យជ្រះថ្លា ដើម្បីចូលរួមបរិច្ចាគឈាមខ្លួនឯង ដើម្បីជួយសង្គ្រោះអាយុជីវិតរបស់អ្នកដទៃ»។
សម្រាប់នាយកប្រតិបត្តិ នៃអង្គការសកម្មភាពសម្រាប់ការអប់រំ ខេត្តកំពង់ចាម លោក សៅ វណ្ណា យល់ឃើញថា ការងារសប្បុរសធម៌របស់ក្រុមជិះកង់ ទៅបរិច្ចាគឈាមនេះ គឺជាកាយវិការមួយដែលគួរឱ្យកោតសរសើរ និងលើកទឹកចិត្តឱ្យបន្តការធ្វើបែបនេះជាបន្តទៅទៀត។ លោកបន្តថា យុវជនអាចជួយសង្គមបានច្រើនទៀត ដូចជា ជួសជុលផ្លូវខូចក្នុងភូមិ ដាំដើមឈើ ជួយមនុស្សចាស់ និងមនុស្សងាយរងគ្រោះ ជាដើម។
លោកបន្តថា៖ «ប្រសិនបើយុវជនយើងគិតដូចគ្នា ការជួយដល់សង្គម[ថា]វាមានសារៈបែបហ្នឹង។ សម្រាប់ពូ ក្នុងនាមជាអង្គការក្រៅរដ្ឋាភិបាលដែរ គិតថាវាល្អប្រសើរ ដែលយុវជនទាំងនោះគួរតែបន្ត ហើយអាជ្ញាធរពាក់ព័ន្ធត្រូវតែបន្តការគំាទ្រ»។
គេសង្កេតឃើញថា ក្នុងរយៈពេលប៉ុន្មានឆ្នាំចុងក្រោយនេះ យុវជន សិល្បករ និងអ្នកនយោបាយមួយចំនួនចេញធ្វើសកម្មភាពមនុស្សធម៌ជាហូរហែ។ កាលពីខែតុលា ឆ្នាំ២០២២ កន្លងទៅនេះ តារាចម្រៀង លោក អ៊ួន បឋម ហៅ សាយ ក៏ទើបបញ្ចប់ការរត់ចម្ងាយ ៣០៣គីឡូម៉ែត្រ ពីរាជធានីភ្នំពេញ ទៅសៀមរាប ក្នុងរយៈពេល៩ថ្ងៃ។ ការរត់រយៈចម្ងាយឆ្ងាយនេះ ក្នុងគោលបំណងដើម្បីស្វែងរកថវិកាក្នុងការទ្រទ្រង់មន្ទីរពេទ្យកុមារអង្គរ និងព្យាបាលកុមារដែលមានជំងឺមហារីក។ តាមរយៈសកម្មភាពនេះ លោក អ៊ួន បឋម ហៅ សាយ រកប្រាក់បានជិត ៧ម៉ឺនដុល្លារអាមេរិក (៦៦ ៤៧០) ហើយថវិកាទាំងនោះ លោកបានបរិច្ចាគដើម្បីមន្ទីរពេទ្យកុមារអង្គរទាំងអស់៕
អត្ថបទដោយលោក សុខ ហេង