ក្រសួងផ្នែកឧត្ដមសិក្សារបស់ប្រទេសអាហ្វហ្កានីស្ថាន ដែលគ្រប់គ្រងដោយពួកតាលីបង់ នៅថ្ងៃអង្គារម្សិលមិញ បានហាមស្រ្តីមិនឱ្យចូលសិក្សានៅសាកលវិទ្យាល័យទាំងឡាយ រហូតដល់មានការជូនដំណឹងបន្ថែម ខណៈសកម្មភាពនេះទទួលបានការថ្កោលទោសយ៉ាងខ្លាំងពីសហរដ្ឋអាមេរិក ចក្រភពអង់គ្លេស និងអង្គការសហប្រជាជាតិ។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
យោងតាមលិខិតមួយដែលត្រូវបានបញ្ជាក់ដោយអ្នកនាំពាក្យរបស់ក្រសួងនេះ បានណែនាំដល់សាកលវិទ្យាល័យសាធារណៈ និងឯកជនទាំងឡាយ នៅក្នុងប្រទេសអាហ្វហ្កានីស្ថាន ឱ្យផ្អាកទទួលការចូលសិក្សារបស់និស្សិតស្ត្រីជាបន្ទាន់ ស្របតាមសេចក្តីសម្រេចរបស់គណៈរដ្ឋមន្ត្រី។
ការប្រកាសរបស់រដ្ឋបាលដែលមិនត្រូវបានទទួលស្គាល់ជាអន្តរជាតិនេះ ក៏បានកើតឡើងស្របពេលដែលក្រុមប្រឹក្សាសន្តិសុខអង្គការសហប្រជាជាតិ (UN) បានជួបប្រជុំគ្នានៅទីក្នុងក្រុងញូវយ៉ក ស្តីពីប្រទេសអាហ្វហ្កានីស្ថានផងដែរ។
គួរបញ្ជាក់ថា រដ្ឋាភិបាលបរទេស រួមទាំងសហរដ្ឋអាមេរិក បានលើកឡើងថា ការផ្លាស់ប្តូរគោលនយោបាយស្តីពីការអប់រំរបស់ស្ត្រី គឺជារឿងដែលចាំបាច់បំផុត មុនពេលដែលខ្លួនអាចពិចារណាទទួលស្គាល់ជាផ្លូវការនូវរដ្ឋបាលដែលគ្រប់គ្រងដោយពួកតាលីបង់។
ថ្លែងទៅកាន់ក្រុមប្រឹក្សា ឯកអគ្គរដ្ឋទូតរងរបស់អាមេរិកប្រចាំអង្គការសហប្រជាជាតិ លោក Robert Wood បានឱ្យដឹងថា៖ «ពួកតាលីបង់មិនអាចរំពឹងថានឹងក្លាយជាសមាជិកស្របច្បាប់នៃសហគមន៍អន្តរជាតិនោះទេ រហូតដល់ពួកគេមានការគោរពសិទ្ធិដល់ជនជាតិអាហ្វហ្កានីស្ថានទាំងអស់ ជាពិសេសសិទ្ធិមនុស្ស និងសេរីភាពជាមូលដ្ឋានរបស់ស្ត្រី និងកុមារី»។
ជាមួយគ្នានេះ ឯកអគ្គរដ្ឋទូតចក្រភពអង់គ្លេសប្រចាំអង្គការសហប្រជាជាតិ លោកស្រី Barbara Woodward ក៏បានលើកឡើងដែរថា ការហាមនេះ គឺជាការបិទសិទ្ធិស្ត្រីដ៏ធ្ងន់ធ្ងរមួយផ្សេងទៀត និងជាការខកចិត្តមួយដ៏ធំសម្រាប់និស្សិតស្រីគ្រប់រូប។
លោកស្រីបន្តប្រាប់ក្រុមប្រឹក្សាថា៖ «វាក៏ជាជំហានមួយទៀតរបស់ពួកតាលីបង់ ដែលព្យាយាមដាក់ប្រទេសអាហ្វហ្កានីស្ថានឱ្យនៅឆ្ងាយពីការរីកចម្រើន»។
ទាក់ទិននឹងករណីនេះ អ្នកនាំពាក្យអង្គការសហប្រជាជាតិ លោក Stephane Dujarric ក៏បានចាត់ទុកការសម្រេច [ហាមស្រ្តីមិនឱ្យចូលសាកលវិទ្យាល័យ] នេះ ថាជាការមិនធ្វើតាមសន្យាមួយផ្សេងទៀតដោយពួកតាលីបង់ផងដែរ។
ថ្លែងប្រាប់អ្នកយកព័ត៌មាននៅទីក្រុងញូវយ៉ក លោកថា៖ «វាជាសកម្មភាពដ៏លំបាកមួយផ្សេងទៀត ខណៈវាពិតជាលំបាកណាស់ក្នុងការស្រមៃពីរបៀបដែលប្រទេសនេះអាចអភិវឌ្ឍទៅមុខ និងដោះស្រាយរាល់បញ្ហាប្រឈមដែលខ្លួនមាន ដោយគ្មានការចូលរួមយ៉ាងសកម្មពីស្ត្រី និងការអប់រំរបស់ស្ត្រី»៕