វិមានក្រឹមឡាំង (Kremlin) បានឱ្យដឹងថា ដំណើរចាកចេញទៅក្រៅប្រទេសរបស់ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី ទៅកាន់សហរដ្ឋអាមេរិក នៅថ្ងៃពុធម្សិលមិញនេះ នឹងមិនផ្ដល់ជាលទ្ធផលល្អអ្វីឡើយ ខណៈរុស្ស៊ីក៏មើលមិនឃើញពីឱកាសនៃកិច្ចចរចាសន្តិភាពណាមួយជាមួយអ៊ុយក្រែនផងដែរ។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ថ្លែងប្រាប់អ្នកសារព័ត៌មាន អ្នកនាំពាក្យវិមានក្រឹមឡាំង លោក ឌីមីទ្រី ប៉េស្កូវ (Dmitry Peskov) បានអះអាងថា ការបន្តផ្គត់ផ្គង់សព្វាវុធរបស់លោកខាងលិចដល់អ៊ុយក្រែន នឹងមានតែធ្វើឱ្យសង្គ្រាមកាន់តែធ្ងន់ធ្ងរបន្ថែមទៀតប៉ុណ្ណោះ ហើយជាអ្វីដែលនឹងផ្ដល់ផលអាក្រក់ដល់អ៊ុយក្រែន។
លោកបន្តថា៖ «ការផ្គត់ផ្គង់អាវុធនៅតែបន្តធ្វើឡើង ហើយកញ្ចប់នៃអាវុធដែលនឹងត្រូវផ្គត់ផ្គង់ក៏កំពុងតែពង្រីកផងដែរ។ ករណីទាំងអស់នេះនឹងធ្វើឱ្យសង្គ្រាមកាន់តែធ្លាក់ចូលទៅក្នុងសភាពធ្ងន់ធ្ងរបន្ថែមទៀត។ វាមិនមានផលល្អសម្រាប់អ៊ុយក្រែននោះទេ»។
គួរបញ្ជាក់ថា លោក វ៉ូឡូឌីមៀ ហ្សេលេនស្គី បានធ្វើដំណើរទៅកាន់សហរដ្ឋអាមេរិក ដើម្បីជួបជាមួយលោកប្រធានាធិបតី ចូ បៃដិន និងសភាអាមេរិក កាលពីថ្ងៃពុធម្សិលមិញ ដែលជាដំណើរចាកចេញទៅក្រៅប្រទេសជាលើកដំបូងរបស់លោក គិតចាប់តាំងពីរុស្ស៊ីបើកការឈ្លានពានទៅលើអ៊ុយក្រែនកាលពីខែកុម្ភៈ។
ក្នុងអំឡុងដំណើរទស្សនកិច្ចរបស់ប្រធានាធិបតីអ៊ុយក្រែននេះ សហរដ្ឋអាមេរិកក៏គ្រោងនឹងអនុម័តក្នុងការបញ្ជូនកាំជ្រួច Patriot ទៅកាន់រដ្ឋាភិបាលអ៊ុយក្រែន ដើម្បីការពារប្រទេសនេះពីការទម្លាក់គ្រាប់បែកដ៏ខ្លាំងក្លារបស់រុស្ស៊ីផងដែរ។
ទោះជាយ៉ាងណា ទាក់ទងនឹងសំណួរថាតើរុស្ស៊ីមានការរំពឹងទុកពីលទ្ធផលវិជ្ជមានដែលអាចកើតចេញពីដំណើររបស់លោក ហ្សេលេនស្គី ឬយ៉ាងណានោះ លោក ឌីមីទ្រី ប៉េស្កូវ បានឆ្លើយតបយ៉ាងខ្លីថា៖ «វាមិនផ្ដល់អ្វីនោះទេ»៕
