ប្រមុខរដ្ឋាភិបាលអំពាវនាវជាថ្មីទៀតដល់ប្រជាពលរដ្ឋដែលមិនទាន់ចាក់វ៉ាក់សាំងដូសទី៣ ឱ្យទៅទទួលយកវ៉ាក់សាំង ដើម្បីការពារខ្លួនពីការឆ្លងជំងឺកូវីដ-១៩ និងបង្កើនភាពស៊ាំក្នុងសហគមន៍ ខណៈពលរដ្ឋប្រមាណ ៤លាននាក់ នៅមិនទាន់ទៅចាក់វ៉ាក់សាំងដូសទី៣នៅឡើយ។
ក្នុងពិធីបើកការដ្ឋានកែលម្អផ្លូវជាតិលេខ៤១ ភ្ជាប់ពីខេត្តកំពង់ស្ពឺ ទៅខេត្តកំពត នាព្រឹកថ្ងៃចន្ទនេះ លោកនាយករដ្ឋមន្ត្រី ហ៊ុន សែន ថ្លែងថា បច្ចុប្បន្ន នៅសល់ពលរដ្ឋប្រមាណ៤លាននាក់ទៀតដែលនៅមិនទាន់ទៅទទួលយកវ៉ាក់សាំងប្រឆាំងកូវីដ-១៩ ដូសទី៣នៅឡើយ ខណៈវ៉ាក់សាំងនៅសល់ក្នុងស្តុកមានប្រមាណ ៧លាន ៥សែនដូស។
ករណីនេះ លោកបានអំពាវនាវដល់ប្រជាពលរដ្ឋដែលនៅសល់ប្រមាណ៤លាននាក់នោះ ទៅទទួលយកវ៉ាក់សាំងដូសទី៣ ខណៈអាកាសធាតុចុះត្រជាក់ ហើយវីរុសកូវីដ-១៩ បានបំប្លែងខ្លួនថ្មីជាបន្តបន្ទាប់។
លោកថា៖ «ខ្លះចាក់ដល់ដូសទី៥ ប៉ុន្តែដូសទី៣នេះ នៅសល់មនុស្សប្រមាណ ៤លាននាក់ អត់ទាន់ទៅយកៗ ប្រហែលជាគាត់គិតថា ទី១ ពីរដូសគ្រប់គ្រាន់ ទី២ គាត់អត់ឃើញមនុស្សឆ្លង និងមនុស្សស្លាប់តទៅទៀត អ៊ីចឹងបានបញ្ហានេះ បានក្លាយទៅជាចំណោទមួយ ដែលខ្ញុំសូមអំពាវនាវចំពោះប្រជាពលរដ្ឋប្រុងប្រយ័ត្ន មិនដឹងថាជំងឺអីវាកើតឡើងបន្តទៀត។ បើយើងមានភាពស៊ាំសហគមន៍កើតឡើង គឺបើមានជំងឺឆ្លងចូល ដូចខ្ញុំកើត [ឆ្លងជំងឺកូវីដ-១៩] អត់មានអាការអីទាំងអស់ អាហ្នឹងមកពីអី? មកពីវ៉ាក់សាំងដែលយើងបានទទួល»។
បើតាមលោកនាយករដ្ឋមន្ត្រី ហ៊ុន សែន បច្ចុប្បន្ន កម្ពុជាក៏បានស្នើដល់សហរដ្ឋអាមេរិក និងចិន ផ្អាកការដឹកជញ្ជូនជំនួយវ៉ាក់សាំងមួយចំនួនមកកម្ពុជាមួយរយៈសិន ក្រោយប្រទេសទាំងនោះប្រកាសផ្តល់ជំនួយវ៉ាក់សាំងប្រឆាំងកូវីដ-១៩ដល់កម្ពុជា ដោយសារកម្ពុជានៅមានវ៉ាក់សាំងចំនួនច្រើននៅក្នុងស្តុកនៅឡើយ។
លោកថា៖ «ប្រធានាធិបតីចិន ស៊ី ជីនពីង គាត់ប្រកាសឱ្យវ៉ាក់សាំងយើងចំនួន២០លានដូស ដឹកមក៥លានហើយ ឥឡូវ១៥លានទៀតកុំអាលដឹកមកអី ព្រោះយើងប្រើអត់ទាន់អស់។ សហរដ្ឋអាមេរិកប្រកាសឱ្យវ៉ាក់សាំងចំនួន៧លាន៥សែនដូស ដឹកមក២លានហើយ នៅសល់៥លាន៥សែនដូសទៀត គឺផ្អាកសិន! កុំអាលដឹកមក ព្រោះវ៉ាក់សាំងនៅក្នុងឃ្លាំង៧លានដូសទៀត អត់ទាន់មានអ្នកទៅទទួល»។
លោកនាយករដ្ឋមន្ត្រី ហ៊ុន សែន បានឱ្យដឹងដែរថា បច្ចុប្បន្ន រដ្ឋាភិបាលបាននិងកំពុងរៀបចំមន្ទីរពេទ្យថ្មីមួយដែលមានសមត្ថភាពដាក់គ្រែសម្រាប់ព្យាបាលអ្នកជំងឺកូវីដ-១៩ ដល់ទៅ១ម៉ឺនគ្រែ ហើយរូបលោក និងមន្ត្រីពាក់ព័ន្ធ គ្រោងនឹងទៅពិនិត្យមន្ទីរពេទ្យថ្មីនោះនៅថ្ងៃពុធសប្តាហ៍នេះ។
លោកថា៖ «កូវីដ! វាអត់ទាន់ទៅណាឆ្ងាយទេ វានៅ […] អ៊ីចឹងបានត្រូវធ្វើអានោះ [មន្ទីរពេទ្យថ្មី] ត្រៀមទុក។ ឥឡូវវាអត់មានអ្នកជំងឺកូវីដ យើងត្រូវដាក់ការព្យាបាលទូទៅមួយ ដែលមានសមត្ថភាពទទួលទៅដល់១ម៉ឺនគ្រែឯណោះ នេះជារឿងដែលយើងត្រូវប្រឹង»។
ក្រៅពីនោះ លោកនាយករដ្ឋមន្ត្រី ហ៊ុន សែន ក៏បានអំពាវនាវដល់ប្រជាពលរដ្ឋបន្តប្រុងប្រយ័ត្ន និងបន្តការការពារខ្លួនពីការឆ្លងជំងឺកូវីដ-១៩ ដោយអនុវត្តនូវវិធានការ «៣កុំ ៣ការពារ» ឱ្យបានខ្ជាប់ខ្ជួន។
របាយការណ៍ប្រចាំថ្ងៃរបស់ក្រសួងសុខាភិបាល ឱ្យដឹងថា គិតត្រឹមថ្ងៃទី២៥ ខែធ្នូ ឆ្នាំ២០២២នេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន១៣៨ ៥២៥នាក់ ក្នុងនោះជាសះស្បើយចំនួន១៣៥ ៣៦៤នាក់ និងស្លាប់ចំនួន៣ ០៥៦នាក់។
បើតាមប្រភពដដែល កាលពីថ្ងៃម្សិលមិញ ក្រសួងបានរកឃើញអ្នកឆ្លងជំងឺកូវីដ-១៩ថ្មី ចំនួន១៥នាក់ និងមានអ្នកជាសះស្បើយ១០នាក់ ខណៈមិនមានករណីស្លាប់ថ្មីដោយសារជំងឺនេះទេ៕
