លោក ហ៊ុន សែន បានដកតំណែងអភិបាលរងខេត្តកែប លោក ភូ លិ ក្រោយមានការផ្សព្វផ្សាយពីការប្រើអំពើហិង្សាលើស្រ្តីជាមន្ត្រីសាខាពន្ធដារនិងបៀតបៀនលើស្រ្តីម្នាក់ទៀតកាលពីយប់ថ្ងៃទី២៩ ខែធ្នូ ឆ្នាំ២០២២។
ក្នុងអនុក្រឹត្យចុះថ្ងៃទី៣១ ខែធ្នូ ឆ្នាំ២០២២ លោកនាយករដ្ឋមន្ត្រី ហ៊ុន សែន បានដកតំណែងអភិបាលរងខេត្តកែប លោក ភូ លិ ចាប់ពីថ្ងៃចុះហត្ថលេខានេះតទៅ។
ការដកលោក ភូ លិ ចេញពីតំណែង បន្ទាប់ពីមានការផ្សព្វផ្សាយលើបណ្តាញសង្គមថាអភិបាលរងខេត្តកែបរូបនេះ បានប្រើប្រាស់អំពើហិង្សាលើមន្ត្រីសាខាពន្ធដារអ្នកស្រី ខូវ ហ៊ុយឡាំង បណ្ដាលឱ្យបែកក្បាលកាលពីយប់ថ្ងៃទី២៩ ខែធ្នូ ឆ្នាំ២០២២ និងបានបៀតបៀនលើស្រ្តីម្នាក់ទៀតក្នុងពិធីជប់លៀងមួយនៃការឡើងកាន់តំណែងរបស់ប្រធានមន្ទីរបរិស្ថានខេត្តនេះ។
សារព័ត៌មានស្និទ្ធរដ្ឋាភិបាល Fresh News បានចុះផ្សាយនៅថ្ងៃទី៣១ ធ្នូនេះថា កាលពីយប់ថ្ងៃទី២៩ ខែធ្នូ ឆ្នាំ២០២២ លោក ភូ លិ និងស្រ្តីរងអំពើហិង្សាឈ្មោះ ខូវ ហ៊ុយឡាំង បានទៅចូលរួមកម្មវិធីពិសារអាហារសាមគ្គីអបអរសាទរការចូលកាន់មុខតំណែងប្រធានមន្ទីរបរិស្ថានខេត្ត។
ក្រោយមក លោក ភូ លិ បានថើបក្បាលនារីម្នាក់ ជាសាច់ញាតិរបស់អ្នកស្រី ខូវ ហ៊ុយឡាំង និងបានយកកែវគប់ទៅលើអ្នកស្រី ហ៊ុយឡាំង ថែមទៀតផង។
ប្រភពបន្តថា ក្រោយពេលកើតហេតុហិង្សា និងការបៀតបៀននេះ លោក ភូ លិ មិនត្រូវបានសមត្ថកិច្ចឃាត់ខ្លួននោះឡើយ។
វីអូឌីមិនអាចសុំការឆ្លើយបំភ្លឺពីអភិបាលរងខេត្តកែប លោក ភូ លិ បានទេ ខណៈអ្នកនាំពាក្យសាលាខេត្តកែបលោកស្រី អ៊ុល ភីរុណ និងលោក ឈុន ច័ន្ទវ៉ាន់ថុល មិនឆ្លើយតបឡើយដោយថា ជាប់រវល់។
វីអូឌីក៏មិនអាចសុំការបំភ្លឺពីអ្នកនាំពាក្យក្រសួងមហាផ្ទៃ លោក ខៀវ សុភ័គ និងអ្នកនាំពាក្យអគ្គស្នងការនគរបាលជាតិ លោក ឆាយ គឹមខឿន ជុំវិញវិធានការច្បាប់លើអភិបាលរងខេត្តកែប លោក ភូ លិ ករណីប្រើប្រាស់អំពើហិង្សានេះ បាននៅឡើយទេ ដោយទូរសព្ទចូលគ្មានអ្នកទទួល។
នាយកទទួលបន្ទុកចាត់ការទូទៅ នៃអង្គការការពារសិទ្ធិមនុស្សលីកាដូ លោក អំ សំអាត ចាត់ទុកការប្រើប្រាស់អំពើហិង្សា និងការបៀតបៀនលើស្ត្រីនេះថាជាគំរូអាក្រក់ សម្រាប់ប្រជាពលរដ្ឋ និងសង្គម ដោយសារ អភិបាលរងខេត្តរូបនេះ ជាអ្នកអនុវត្តច្បាប់ ប៉ុន្តែបែរជាបំពានច្បាប់ទៅវិញ។
លោកសាទរចំពោះការដកតំណែងអភិបាលរងខេត្តកែប ក៏ប៉ុន្តែលោកជំរុញឱ្យចាត់វិធានការច្បាប់ទៅលើមន្ត្រីរូបនេះដែរ ដោយថា ការប្រើប្រាស់អំពើហិង្សាលើស្ត្រីជាការប៉ះពាល់ធ្ងន់ធ្ងរដល់សង្គមផងដែរ។
លោកថា៖«ហើយនេះជាគំរូល្អសម្រាប់អ្នកដឹកនាំផ្សេងទៀត ឬមន្ត្រីរាជការផ្សេងទៀត ត្រូវតែប្រកាន់នូវឥរិយាបថជាអ្នកដឹកនាំ ជាអ្នកបម្រើពលរដ្ឋ មិនអាចបំពារបំពានឬរំលោភបំពានប្រជាពលរដ្ឋជាពិសេសគឺការបំពានទៅលើស្ត្រីភេទ ឬក៏ប្រើប្រាស់អំពើហិង្សា ដែលកម្ពុជាយើងបានផ្ដល់សច្ចាប័នទៅលើអនុសញ្ញាប្រឆាំងការរើសអើងទៅលើស្ត្រីភេទ ឬយេន័ឌហ្នឹង។ នេះ គ្រាន់តែជារឿងអនុវត្តតាមវិធានការរដ្ឋបាល ប៉ុន្តែនៅមួយទៀតគឺការប្រើប្រាស់អំពើហិង្សា អាហ្នឹង សូមឱ្យតុលាការចាត់វិធានការតាមផ្លូវច្បាប់ ដើម្បីស៊ើបអង្កេត និងអនុវត្តទៅតាមផ្លូវច្បាប់»។
បើតាមអង្គការសហប្រជាជាតិ (UN) ប្រចាំនៅកម្ពុជា កាលពីថ្ងៃទី២៥ ខែវិច្ឆិកា ឆ្នាំ២០២១ បានលើកឡើងថា អំពើហិង្សាលើស្ត្រីបានបង្កប៉ះពាល់ដល់គ្រប់ផ្នែកនៃជីវិតរបស់មនុស្ស ហើយជះឥទ្ធិពលអវិជ្ជមានដល់ស្ត្រី និងក្មេងស្រី ព្រមទាំងប៉ះពាល់អាក្រក់ទៅលើសុខភាពសាធារណៈ ការអភិវឌ្ឍសេដ្ឋកិច្ច និងសង្គមផងដែរ។
យោងតាមការសិក្សារបស់អង្គការ ActionAid ទៅលើស្ត្រីកម្ពុជា ចំនួន៣៨០នាក់ បានរកឃើញថា ស្ត្រីម្នាក់ ក្នុងចំណោម ៥នាក់ (ឬ ២២ ភាគរយ) ត្រូវបានបៀតបៀនផ្លូវភេទ ឬបៀតបៀនរាងកាយនៅកន្លែងសាធារណៈ ជាមធ្យម៥ដង នៅក្នុងឆ្នាំ២០១៤។ ក្នុងនោះ បុរសប្តូរភេទទៅជាស្រី្ត បានរងគ្រោះច្រើនជាងគេ។ ជាង៩០ភាគរយនៃពួកគេបានជួបប្រទះការយាយីនៅកន្លែងសាធារណៈជាច្រើនដង៕
