ក្រសួងសង្គមកិច្ច អតីតយុទ្ធជន និងយុវនីតិសម្បទា មិនអាចបញ្ជាក់ពីចំនួនមនុស្សស្លាប់ជាក់លាក់នៅមណ្ឌលព្រៃស្ពឺ បន្ទាប់ពីអង្គការសិទ្ធិមនុស្សក្នុងស្រុកមួយបានចោទប្រកាន់ថា មានការស្លាប់ និងការថែទាំមិនដិតដល់ ប៉ុន្តែអ្នកនាំពាក្យក្រសួងសង្គមកិច្ច បានបដិសេធចំពោះការថាមិនយកចិត្តទុកដាក់ ឬការចោទដែលថាមានការរំលោភបំពានណាមួយ។
អង្គការសិទ្ធិមនុស្សលីកាដូ បានចោទប្រកាន់កាលពីដើមខែធ្នូ ថាមនុស្សយ៉ាងតិច១០នាក់បានស្លាប់ក្នុងខែកក្កដា និងសីហា នៅមណ្ឌលព្រៃស្ពឺ ក្នុងសង្កាត់ចោមចៅទី២ រាជធានីភ្នំពេញ ដែលត្រូវបានគេអះអាងថាជាមណ្ឌលបណ្ដុះបណ្ដាលវិជ្ជាជីវៈ ប៉ុន្តែត្រូវបានប្រើប្រាស់សម្រាប់ឃុំឃាំងជនអនាថា និងក្រុមមនុស្សផ្សេងទៀត។ អង្គការលីកាដូ បានចោទសួរជាពិសេសជុំវិញការស្លាប់មនុស្ស២នាក់កាលពីខែសីហា ដែលម្នាក់ជាបុរស និងម្នាក់ទៀតជាស្ត្រី ដែលខ្លួននិយាយថា មិនទទួលបានការថែទាំដិតដល់បន្ទាប់ពីធ្លាក់ខ្លួនឈឺ ហើយអង្គការនេះបានទាមទារឱ្យបិទមណ្ឌលនេះ។
អ្នកនាំពាក្យក្រសួងសង្គមកិច្ច លោក តូច ចាន់នី បានមានប្រសាសន៍ថា ក្រសួងបានបញ្ជូនក្រុមការងារដើម្បីស៊ើបអង្កេតការអះអាងនេះ ធ្វើឡើងនៅថ្ងៃទី២៤ ខែធ្នូ ក្នុងនោះរួមមាន អ្នកនាំពាក្យក្រសួងសង្គមកិច្ចម្នាក់ អភិបាលរងរាជធានីភ្នំពេញ២នាក់ និងមន្ត្រីនៃមន្ទីរសុខាភិបាលរាជធានីភ្នំពេញ។
លោក ចាន់នី បាននិយាយកាលពីសប្ដាហ៍មុនថា ចំណុចមួយចំនួននៃការចោទប្រកាន់របស់អង្គការលីកាដូ គឺជាការពិត ពីព្រោះមានមនុស្សស្លាប់នៅមណ្ឌលនេះ ក្នុងខែកក្កដា និងសីហា។ ទោះយ៉ាងណា អ្នកនាំពាក្យរូបនេះមិនបញ្ជាក់ថាមានអ្នកស្លាប់ប៉ុន្មាននាក់ ឬមូលហេតុដែលនាំឱ្យមានការស្លាប់ទាំងនោះឡើយ។
លោកមានប្រសាសន៍ថា៖ «អ្វីដែលអង្គការលីកាដូបានលើកឡើងក្នុងរបាយការណ៍របស់ខ្លួន ដែលថាមានមនុស្សស្លាប់នៅចន្លោះខែកក្កដា ដល់ខែសីហា គឺជាការពិត។ ប៉ុន្តែការដែលថាមណ្ឌលទុកឱ្យពួកគេ [អ្នកស្លាប់] ឈឺដោយមិនមានការព្យាបាល មិនសមហេតុផលឡើយ ខណៈមានក្រុមគ្រូពេទ្យនៅក្នុងមណ្ឌលនោះ»។
លោក ចាន់នី បានបន្តថា អ្នកដែលបានស្លាប់ គឺពួកគាត់មានជំងឺពីមុនមកស្រាប់ ហើយនៅពេលដែលគាត់មកកាន់មណ្ឌល គាត់បានទទួលការព្យាបាល។ លោកបានបដិសេធការចោទប្រកាន់របស់អង្គការលីកាដូ ដែលថាមណ្ឌលមិនអើពើនឹងសុខភាព ឬមិនបានផ្តល់ការថែទាំគ្រប់គ្រាន់ដល់អ្នកទាំងនោះ រួមទាំងករណីនៃការស្លាប់របស់បុរសម្នាក់និងស្ត្រីម្នាក់ផងដែរ។
លោកបន្ថែមថា៖ «យើងបានសួរនាយក និងបុគ្គលិកដែលធ្វើការនៅទីនោះ [មណ្ឌលព្រៃស្ពឺ] ប៉ុន្តែពួកគេបាននិយាយថា មិនមានមនុស្សស្លាប់ [មនុស្សស្រីម្នាក់ និងប្រុសម្នាក់] ទេ កាលពីពេលថ្មីៗនេះ។ យើងបានសួរពួកគេម្តងហើយម្តងទៀត ប៉ុន្តែពួកគេនៅតែឆ្លើយថាមិនមានអ្នកស្លាប់ទេ»។
អង្គការលីកាដូ បាននិយាយថា ការចោទប្រកាន់របស់ខ្លួន គឺផ្អែកលើសាក្សីដែលឃើញហេតុការណ៍ផ្ទាល់ភ្នែក។ នៅពេលដែលវីអូឌីបានចុះទៅដល់មណ្ឌលដោយផ្ទាល់កាលពីខែធ្នូ បុរស៣នាក់នៅក្នុងមណ្ឌលដែលសុំមិនបង្ហាញអត្តសញ្ញាណ បានបដិសេធចំពោះករណីស្លាប់ណាមួយនៅក្នុងខែកក្កដា និងសីហា ហើយបានបដិសេធអនុញ្ញាតឱ្យអ្នករាយការណ៍ព័ត៌មានចូលក្នុងបរិវេណនោះ។
លោក អំ សំអាត នាយកទទួលបន្ទុកចាត់ការទូទៅ នៃអង្គការការពារសិទ្ធិមនុស្សលីកាដូ មានប្រសាសន៍ថា អង្គការមានភស្តុតាងគ្រប់គ្រាន់ ដើម្បីគាំទ្រការចោទប្រកាន់របស់ខ្លួន ហើយបានបញ្ជាក់ជាថ្មីនូវការទាមទាររបស់អង្គការនេះ ដែលទាមទារឱ្យបិទមណ្ឌលជាបន្ទាន់។
លោកថា៖ «ប្រសិនបើគ្មានការកែប្រែទេ ហើយប្រសិនបើវា [មណ្ឌល] នៅតែត្រូវបានប្រើប្រាស់ដើម្បីឃុំខ្លួន និងរំលោភបំពានរាងកាយដោយខុសច្បាប់ នោះរដ្ឋាភិបាលត្រូវតែបិទមណ្ឌលនេះ»។
មណ្ឌលព្រៃស្ពឺ ត្រូវបានបិទនៅឆ្នាំ២០១២ បន្ទាប់ពីមានការចោទប្រកាន់ថាមានករណីរំលោភបំពាននៅក្នុងមណ្ឌល ហើយបានបើកឡើងវិញមួយឆ្នាំបន្ទាប់ ដែលបានប្តូរឈ្មោះទៅជា មជ្ឈមណ្ឌលបណ្ដុះបណ្ដាលវិជ្ជាជីវៈពោធិ៍សែនជ័យ។ មណ្ឌលនេះ ជារឿយៗ ត្រូវបានប្រើប្រាស់សម្រាប់ការឃុំខ្លួនក្រៅប្រព័ន្ធតុលាការ នៃក្រុមដែលងាយរងគ្រោះ ដូចជា អ្នកប្រើប្រាស់គ្រឿងញៀន អ្នករកស៊ីផ្លូវភេទ និងជនអនាថា ជាដើម៕
បកប្រែនិងសម្រួលចេញពីអត្ថបទដើមភាសាអង់គ្លេស៖ Ministry: Deaths at Prey Speu Center, but No Negligence
