មន្ត្រីជាន់ខ្ពស់ក្រសួងសង្គមកិច្ច អះអាងថា មន្ត្រីជំនាញគ្រោងនឹងចុះទៅស្រាវជ្រាវនៅមណ្ឌលព្រៃស្ពឺ នាសប្ដាហ៍ក្រោយនេះ ក្រោយពីអង្គការសង្គមស៊ីវិលមួយរកឃើញអ្នកជាប់ឃុំនៅក្នុងមណ្ឌលនេះបានស្លាប់ជាច្រើននាក់ ដោយសារការឃុំខ្លួនមិនត្រឹមត្រូវ និងភាពមិនប្រក្រតីមួយចំនួន។
ការអះអាងនេះធ្វើឡើងក្រោយពីអង្គការការពារសិទ្ធិមនុស្សលីកាដូ (LICADHO) បានចេញសេចក្ដីថ្លែងការណ៍មួយ កាលពីថ្ងៃទី៧ ខែធ្នូ ឆ្នាំ២០២២ ដោយទាមទារឱ្យបិទមណ្ឌលព្រៃស្ពឺ ស្ថិតនៅសង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ក្រោយរកឃើញអ្នកជាប់ឃុំនៅក្នុងមណ្ឌលនេះជាង ១០នាក់បានស្លាប់ នៅចន្លោះខែកក្កដា និងខែសីហា ឆ្នាំ២០២២ ក្នុងនោះអ្នកជាប់ឃុំខ្លះត្រូវបានរកឃើញថាស្លាប់ដោយសារជំងឺ ហើយមិនទទួលបានការផ្តល់សេវាព្យាបាលឱ្យបានគ្រប់គ្រាន់។
រដ្ឋលេខាធិការ និងជាអ្នកនាំពាក្យក្រសួងសង្គមកិច្ច អតីតយុទ្ធជន និងយុវនីតិសម្បទា លោក តូច ចាន់នី មានប្រសាសន៍ប្រាប់វីអូឌីនៅថ្ងៃទី២១ ខែធ្នូ ថា ករណីនៅមណ្ឌលព្រៃស្ពឺជារឿងមួយដែលក្រសួងត្រូវតែដោះស្រាយ កែសម្រួល និងកែលម្អ បើសិនមានករណីមិនប្រក្រតីដូចការលើកឡើងរបស់សង្គមស៊ីវិលមែននោះ។ លោកបន្តថា រដ្ឋមន្ត្រីក្រសួងសង្គមកិច្ច បានអនុញ្ញាតឱ្យបង្កើតក្រុមការងារចុះសិក្សាលើរឿងនេះ ដោយមានការចូលរួមពីមន្ត្រីរាជធានីភ្នំពេញ មន្ទីរសុខាភិបាល និងមន្ទីរពាក់ព័ន្ធផ្សេងទៀត។
លោកថា៖ «ក្រសួងនឹងរៀបចំក្រុមការងារមួយ នឹងចុះទៅសិក្សាស្រាវជ្រាវមើលថាតើកន្លែងហ្នឹងវាមានបញ្ហាចឹងមែនឬអត់? ហើយបើមែនហើយតើយើងត្រូវកែលម្អយ៉ាងម៉េច? ធ្វើយ៉ាងម៉េចឱ្យវាល្អជាងនេះ? កុំឱ្យមានការស្តីបន្ទោសពីសង្គមស៊ីវិលអីជាដើម។ ហ្នឹងហើយ ខ្ញុំគ្រាន់តែនិយាយព្រាងសិន តែឥលូវយើងមិនទាន់បានទៅទេ យើងរង់ចាំពេលវេលា យើងចាំបានព័ត៌មានពីក្រុងមក។ យើងមិនទុកបណ្តែតបណ្តោយឱ្យយូរទេ អាចថាក្នុងសប្តាហ៍ហ្នឹង ឬចុងសប្តាហ៍ហ្នឹង ឬយ៉ាងយូរដើមសប្តាហ៍ក្រោយ»។
លោក តូច ចាន់នី សុំមិនអត្ថាធិប្បាយពីបញ្ហាប្រឈមកន្លងមកនៅក្នុងមណ្ឌលព្រៃស្ពឺ បើទោះរងការរិះគន់ពីសំណាក់អង្គការសង្គមស៊ីវិលក៏ដោយ។ លោកថា ទាំងមនុស្សចាស់ និងកូនក្មេងដែលរស់នៅមណ្ឌលនោះ ម្នាក់ៗទទួលបានរបបអាហារពីរដ្ឋចំនួន ៥ ០០០រៀលក្នុងមួយថ្ងៃ។
លោកបន្ថែមថា៖ «ប៉ុន្តែខ្ញុំគិតថា បើសិនរកឃើញថារបបនេះពិតជាខ្វះខាត ពិតជានៅមិនទាន់គ្រប់គ្រាន់ទេ យើងនឹងសុំគោលការណ៍ពីរាជរដ្ឋាភិបាល អាចនឹងសុំដំឡើងលើសពី៥ ០០០រៀល ថាតើរដ្ឋាភិបាលអាចមានលទ្ធភាពដោះស្រាយបាន ឬអត់អ៊ីចឹង»។
ប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទា រាជធានីភ្នំពេញ និងជាអ្នកគ្រប់គ្រងនៅមណ្ឌលព្រៃស្ពឺ អ្នកស្រី មុំ ចាន់ដានី បានលើកឡើងយ៉ាងខ្លីថា មន្ត្រីនៅក្នុងមណ្ឌលព្រៃស្ពឺ បានមើលថែទាំងជនអនាថាយ៉ាងយកចិត្តទុកដាក់ ដើម្បីឱ្យពួកគេអាចរស់នៅបានប្រសើរ។
អ្នកស្រីថា៖ «បុគ្គលិកមន្ត្រីគ្នាខំធ្វើការ ជួយបងប្អូនជនងាយរងគ្រោះយើង បញ្ចៀសគាត់ពីហានិភ័យផ្សេងៗនៅតាមដងផ្លូវ ផ្តល់ការថែទាំងមួយគំនរ។ សំខាន់ការពិតយើងធ្វើការងារ មិនមែនតាមថា យើងធ្វើតាមគោលនយោបាយរបស់រាជរដ្ឋាភិបាលយើង ជាពិសេសការចង្អុលបង្ហាញជាប់ជាប្រចាំរបស់ថ្នាក់ដឹកនាំ ឱ្យមើលថែបងប្អូនយើងគ្រប់ជាន់ថ្នាក់»។
នាយកទទួលបន្ទុកកិច្ចការទូទៅ នៃអង្គការការពារសិទ្ធិមនុស្សលីកាដូ លោក អំ សំអាត សាទរចំពោះការស្រាវជ្រាវនេះ ខណៈសង្គមស៊ីវិលមិនចង់ឃើញមានការរំលោភសិទ្ធិមនុស្សនៅក្នុងមណ្ឌលនេះបន្តទៀតនោះទេ។
លោកថា៖ «យើងជាអង្គការសង្គមស៊ីវិល យើងស្វាគមន៍ហើយចំពោះការស្រាវជ្រាវ ការស៊ើបអង្កេត ពីព្រោះយើងក៏មិនចង់ឃើញនូវទិដ្ឋភាពនៃការរំលោភសិទ្ធិមនុស្សនៅមណ្ឌលនេះតទៅទៀតដែរ។ ការរំលោភសិទ្ធមនុស្សនៅក្នុងរូបភាពនេះ ទី១ គឺការឃុំខ្លួនដោយមិនត្រឹមត្រូវតាមច្បាប់ ពីព្រោះកន្លែងឃុំខ្លួនមានតែពន្ធនាគារទេដែលមានដីកាឃុំខ្លួនពីតុលាការ អាហ្នឹងបានស្របច្បាប់។ តែមណ្ឌលសុំចត មន្ទីរសង្គមកិច្ចរាជធានីភ្នំពេញ មិនមែនជាកន្លែងឃុំខ្លួនទេ ជាកន្លែងបណ្តុះបណ្តាលវិជ្ជាជីវៈ ហើយជាកន្លែងសុំចតរបស់អ្នកដែលគ្មានទីជម្រេកអី ដើម្បីស្វែងរកការរៀននូវវិជ្ជាជីវៈ»។
ក្រៅពីនេះ លោកថា នៅមណ្ឌលព្រៃស្ពឺ ក៏មានបញ្ហាប្រឈមរឿងរបបអាហារហូបចុក ការស្នាក់នៅមានរងនូវអំពើហិង្សា មានមនុស្សស្លាប់ដោយជំងឺ ខណៈមនុស្សឈឺមិនទទួលបានសេវាព្យាបាលត្រឹមត្រូវ។
បើតាមសេចក្តីថ្លែងការណ៍របស់អង្គការលីកាដូ មនុស្សដែលត្រូវបានឃុំខ្លួននៅមណ្ឌលព្រៃស្ពឺ ភាគច្រើនគឺជាក្រុមមនុស្សដែលមិនត្រូវបានគេអើពើ ដូចជា ជនអនាថា អ្នកសុំទាន អ្នកប្រើប្រាស់គ្រឿងញៀន និងអ្នកប្រកបរបរផ្លូវភេទ ជាដើម ហើយពួកគេមិនត្រូវបានចោទប្រកាន់ពីបទល្មើសណាមួយទេ ប៉ុន្តែត្រូវបានឃុំខ្លួនដោយមិនច្បាស់លាស់ និងត្រូវបានហាមឃាត់មិនឱ្យចាកចេញ។
អង្គការនេះបានលើកឡើងថា មណ្ឌលព្រៃស្ពឺ បានដំណើរការជាមណ្ឌលឃុំខ្លួនដោយមិនត្រឹមត្រូវ ដើម្បីលាក់បាំងរូបភាពពីប្រជាពលរដ្ឋដែលមិនត្រូវបានគេអើពើ និងអ្នកដែលប្រឈមនឹងហានិភ័យ នៅរាជធានីភ្នំពេញ ខណៈដែលពួកគេត្រូវបានបដិសេធសិទ្ធិទទួលបានការការពារផ្លូវច្បាប់ និងតម្រូវការចាំបាច់ ដូចជា អាហារបរិភោគ និងការថែទាំឬព្យាបាលជំងឺឱ្យបានគ្រប់គ្រាន់។
បើតាមអង្គការលីកាដូ គិតត្រឹមខែសីហា ឆ្នាំ២០២២ មានមនុស្សប្រមាណ៤០០នាក់ ត្រូវបានឃុំខ្លួននៅមណ្ឌលព្រៃស្ពឺ ដែលមានស្ថានភាពដូចនរក រួមមាន បន្ទប់ឃុំឃាំងចង្អៀតណែនខ្លាំង កង្វះចំណីអាហារ ការវាយដំដោយសារមិនស្ដាប់តាមការណែនាំ ខណៈដែលការថែទាំសុខភាព គឺទទួលបានតែថ្នាំប៉ារ៉ាសេតាម៉ុល តែប៉ុណ្ណោះ ទោះបីជាមានជំងឺធ្ងន់ធ្ងរក៏ដោយ៕