ប្រធានាធិបតីអាមេរិក លោក ចូ បៃដិន បានឱ្យដឹងនៅថ្ងៃចន្ទម្សិលមិញថា អាមេរិកមិនបានពិភាក្សាអំពីសមយុទ្ធនុយក្លេអ៊ែររួមគ្នាជាមួយកូរ៉េខាងត្បូងនោះទេ ខណៈករណីនេះហាក់ផ្ទុយពីការលើកឡើងដោយសមភាគីកូរ៉េខាងត្បូង។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ការថ្លែងបញ្ជាក់ដោយប្រធានាធិបតីអាមេរិក បានធ្វើឡើងបន្ទាប់ពីប្រធានាធិបតីកូរ៉េខាងត្បូង លោក Yoon Suk-yeol បានលើកឡើងថា ប្រទេសរបស់ខ្លួន និងអាមេរិក បច្ចុប្បន្នកំពុងតែពិភាក្សាគ្នាអំពីការធ្វើសមយុទ្ធរួមគ្នាដែលអាចធ្វើទៅបានដោយប្រើប្រាស់នុយក្លេអ៊ែររបស់សហរដ្ឋអាមេរិក។
ទោះជាយ៉ាងណា ទាក់ទិននឹងសំណួររបស់អ្នកយកព័ត៌មាននៅឯសេតវិមាន ថាតើលោកកំពុងតែពិភាក្សាអំពីសមយុទ្ធនុយក្លេអ៊ែររួមជាមួយកូរ៉េខាងត្បូងឬយ៉ាងណានោះ លោកប្រធានាធិបតី ចូ បៃដិន បានឆ្លើយយ៉ាងខ្លីថា៖ «គ្មាននោះទេ»។
ថ្លែងក្នុងបទសម្ភាសកាសែតក្នុងស្រុកមួយដែលបានចេញផ្សាយកាលពីថ្ងៃចន្ទ លោក Yoon Suk-yeol បានលើកឡើងថា៖ «អាវុធនុយក្លេអ៊ែរជាកម្មសិទ្ធិរបស់សហរដ្ឋអាមេរិក ប៉ុន្តែការរៀបចំផែនការ ការចែករំលែកព័ត៌មាន សមយុទ្ធ និងការហ្វឹកហាត់ គួរតែធ្វើឡើងរួមគ្នាដោយកូរ៉េខាងត្បូង និងសហរដ្ឋអាមេរិក»។
កាសែតដដែលបានបន្តដកស្រង់សម្តីប្រធានាធិបតីកូរ៉េខាងត្បូងថា ការរៀបចំផែនការ និងសមយុទ្ធរួមគ្នានេះ នឹងមានគោលបំណងក្នុងការអនុវត្តឱ្យកាន់តែមានប្រសិទ្ធភាពនៃសមត្ថភាពរបស់យោធាអាមេរិក ជាពិសេសកងកម្លាំងនុយក្លេអ៊ែររបស់ខ្លួន ក្នុងការទប់ស្កាត់ការវាយប្រហារលើសម្ពន្ធមិត្តអាមេរិកទាំងឡាយ ដោយលោកថា អាមេរិកក៏បានបង្ហាញភាពវិជ្ជមានអំពីគំនិតនេះផងដែរ។
ការលើកឡើងដោយលោក Yoon Suk-yeol នេះធ្វើឡើងមួយថ្ងៃ បន្ទាប់ពីប្រព័ន្ធផ្សព្វផ្សាយរដ្ឋរបស់កូរ៉េខាងជើង បានរាយការណ៍ថា មេដឹកនាំរបស់ខ្លួន លោក គីម ជុងអ៊ុន បានដាក់បទបញ្ជាឱ្យមានការអភិវឌ្ឍមីស៊ីលបាលិស្ទីកអន្តរទ្វីប (ICBM) ថ្មីៗបន្ថែមទៀត ព្រមទាំងបង្កើនចំនួនអាវុធនុយក្លេអ៊ែរឱ្យកាន់តែច្រើនជាងមុន៕
