មេធាវីការពារក្ដីឱ្យមេដឹកនាំសហជីពក្រុមហ៊ុនណាហ្គាវើលដ៍ កញ្ញា ឈឹម ស៊ីថរ ថាកូនក្ដីរបស់ខ្លួនមិនបានទទួលដីកាដែលបញ្ជាក់ថាមិនឱ្យចេញទៅក្រៅប្រទេសនោះទេ មុនពេលកញ្ញា ឈឹម ស៊ីថរ ត្រូវបានសមត្ថកិច្ចចាប់ឃុំខ្លួនជាថ្មី។
ការអះអាងរបស់មេធាវីការពារក្តីរបស់កញ្ញា ឈឹម ស៊ីថរ នេះ គឺជាការឆ្លើយតបទៅនឹងសេចក្តីថ្លែងការណ៍របស់អ្នកនាំពាក្យអយ្យការអមសាលាដំបូងរាជធានីភ្នំពេញចុះកាលពីថ្ងៃទី២៩ ខែធ្នូ ឆ្នាំ២០២២ ប៉ុន្តែទើបត្រូវបានផ្សព្វផ្សាយជាសាធារណៈនៅថ្ងៃនេះ។
សេចក្តីថ្លែងការណ៍របស់អ្នកនាំពាក្យអយ្យការអមសាលាដំបូងរាជធានីភ្នំពេញ លើកឡើងថា ការចាកចេញទៅក្រៅប្រទេសរបស់កញ្ញា ឈឹម ស៊ីថរ ដោយគ្មានការអនុញ្ញាតពីតុលាការ គឺជាការបំពានកាតព្វកិច្ចនៃការត្រួតពិនិត្យតាមផ្លូវតុលាការរបស់មេសហជីពរូបនេះ។
សេចក្ដីថ្លែងការណ៍បញ្ជាក់ថា៖ «ជនត្រូវចោទ ឈ្មោះ ឈឹម ស៊ីថរ បានចាកចេញពីដែនដី នៃព្រះរាជាណាចក្រកម្ពុជា ដោយគ្មានការអនុញ្ញាតពីចៅក្រមស៊ើបសួរ ដែលអំពើនេះគឺបានបំពានលើកាតព្វកិច្ចនៃការត្រួតពិនិត្យតាមផ្លូវតុលាការ។ យោងតាមមាត្រា២៣០ នៃក្រមនីតិវិធីព្រហ្មទណ្ឌ បានចែងថា ប្រសិនបើជនត្រូវចោទបានគេចវេះដោយចេតនាពីកាតព្វកិច្ចត្រួតពិនិត្យតាមផ្លូវតុលាការ ចៅក្រមស៊ើបសួរអាចសម្រេចឱ្យឃុំខ្លួនជនត្រូវចោទបណ្ដោះអាសន្នបាន»។
សេចក្តីថ្លែងការណ៍បន្តថា ការដែលកញ្ញា ឈឹម ស៊ីថរ លើកឡើងថា មិនទទួលដំណឹងពីដីកាសម្រេចដាក់ជនត្រូវចោទឱ្យស្ថិតនៅក្រោមកាតព្វកិច្ចនៃការត្រួតពិនិត្យតាមផ្លូវតុលាការនោះ កាន់តែបង្ហាញយ៉ាងច្បាស់ក្នុងចេតនាមិនទទួលខុសត្រូវចំពោះមុខច្បាប់។ សេចក្តីថ្លែងការណ៍បន្តថា ក្នុងករណីនេះ នៅពេលចៅក្រមស៊ើបសួរសម្រេចដោះលែងជនត្រូវចោទឱ្យនៅក្រៅឃុំនោះ ចៅក្រមស៊ើបសួរ ប្រើប្រាស់វិធានការជំនួសមកវិញនូវដីកាសម្រេចដាក់ជនត្រូវចោទឱ្យស្ថិតនៅក្រោមកាតព្វកិច្ចនៃការត្រួតពិនិត្យតាមផ្លូវតុលាការ ដែលដីកាសម្រេចនេះ ជនត្រូវចោទត្រូវតែគោរពតាម និងអនុវត្តឱ្យបានម៉ឺងម៉ាត់»។
ទោះជាយ៉ាងណា មេធាវីការពារក្ដីឱ្យកញ្ញា ឈឹម ស៊ីថរ គឺលោក សំ ចំរើន បន្តលើកឡើងថាកូនក្ដីរបស់ខ្លួនពិតជាមិនទទួលបានដីកាដែលបញ្ជាក់ថាកញ្ញា ឈឹម ស៊ីថរ មិនអាចចាកចេញពីប្រទេសកម្ពុជាពិតមែន។
លោកថា៖ «បើពិនិត្យក្នុងឯកសារក្នុងសំណុំរឿង អត់មានឯកសារណាបញ្ជាក់ថាកូនក្ដីស្រីៗទាំងប៉ុន្មានហ្នឹងទទួលបានដីកាហ្នឹងទេ ការដែលមិនបានទទួលដីកា បើអត់បានទទួល ឱ្យគេគោរពម៉េច? យល់ដឹងពីខ្លឹមសារយ៉ាងម៉េច? អ្នកខ្លះទៀតបានទទួលក្នុងសំណុំរឿងដដែលហ្នឹង អ្នកខ្លះមានទទួល ដោយគេមានស្នាមមេដៃនៅលើហ្នឹងតែម្ដង តែស្រី និងស៊ីថរអត់បានទទួល»។
ប្រធានសមាគមការពារសិទ្ធិមនុស្សអាដហុក លោក នី សុខា បានលើកឡើងថា ទាំងមេធាវី និងកញ្ញា ឈឹម ស៊ីថរ មិនទទួលបានដីកាដែលបញ្ជាក់មិនឱ្យប្រធានសហជីពរូបនេះចាកចេញទៅក្រៅប្រទេសនោះទេ ម្យ៉ាងទៀតលោកចោទសួរថា អំឡុងពេលដែលកញ្ញាកំពុងរៀបចាកចេញពីប្រទេស ហេតុអ្វីសមត្ថកិច្ចមិនចាប់ខ្លួន?
លោកថា៖ «វាជារឿងមួយនៃកំហុសផ្លូវច្បាប់របស់សមត្ថកិច្ច ជាពិសេសតុលាការ និងសមត្ថកិច្ច បើយើងបានចេញដីកាហ្នឹងពិតប្រាកដមែន ហេតុអ្វីបានជាយើងមិនបានជូនដំណឹងហ្នឹងដល់មេធាវី ឬជនជាប់ចោទផ្ទាល់ ដែលនេះជារឿងអនុវត្តមិនបានត្រឹមត្រូវ»។
មន្រ្តីសង្គមស៊ីវិលរូបនេះនៅតែចាត់ទុកករណីនេះថា ជាកំហុសនីតិវិធីនៃស្ថាប័នតុលាការ និងនៅតែស្នើឱ្យតុលាការដោះលែងកញ្ញា ឈឹម ស៊ីថរ មានសេរីភាពឡើងវិញ។
ប្រធានសហជីពប្រចាំក្រុមហ៊ុនកាស៊ីណូណាហ្គាវើលដ៍ កញ្ញា ឈឹម ស៊ីថរ ត្រូវបានសមត្ថកិច្ចចាប់ខ្លួននៅព្រឹកថ្ងៃទី២៦ ខែវិច្ឆិកា ឆ្នាំ២០២២ នៅអាកាសយានដ្ឋានអន្តរជាតិភ្នំពេញ ក្រោយពេលកញ្ញាបានធ្វើដំណើរត្រលប់មកពីប្រជុំនៅប្រទេសអូស្ត្រាលីវិញ។ កញ្ញាត្រូវបានសមត្ថកិច្ចបញ្ជូនទៅឃុំខ្លួននៅពន្ធនាគារព្រៃស នៅរសៀលថ្ងៃដដែលនោះ ដោយចោទថា កញ្ញាបានល្មើសបម្រាមរបស់តុលាការ ឬគេចវេះពីការត្រួតពិនិត្យរបស់តុលាការ។
នេះគឺជាលើកទី២ហើយដែលកញ្ញា ឈឹម ស៊ីថរ ត្រូវបានសមត្ថកិច្ចចាប់ឃុំខ្លួននៅក្នុងពន្ធនាគារ ខណៈសំណុំរឿងចោទប្រកាន់ទៅលើកញ្ញា និងសមាជិកសហជីពផ្សេងទៀត ត្រូវបានតុលាការអះអាងថាកំពុងបញ្ជូនទៅជំនុំជម្រះ។
ជុំវិញការចាប់ឃុំខ្លួនកញ្ញា ឈឹម ស៊ីថរ ជាថ្មីនេះ មេធាវីការពារក្តីកញ្ញា ឈឹម ស៊ីថរ លោក សំ ចំរើន បានឱ្យដឹងថា លោកបានដាក់បណ្ដឹងសាទុក្ខទៅកាន់តុលាការកំពូលរួចហើយ កាលពីថ្ងៃទី៤ ខែមករា ឆ្នាំ២០២៣ ដើម្បីទាមទារឱ្យតុលាការដោះលែងកញ្ញា ឈឹម ស៊ីថរ ឱ្យបាននៅក្រៅឃុំ៕