អន្តរជាតិ

នាយករដ្ឋមន្ត្រីជប៉ុនត្រូវបានអញ្ជើញឱ្យទៅបំពេញទស្សនកិច្ចនៅអ៊ុយក្រែន

លោក ភុន ច័ន្ទឧសភា
| ០៦ មករា ២០២៣
ម៉ោង ១៥:០៣

នាយករដ្ឋមន្ត្រីជប៉ុន លោក Fumio Kishida ថ្លែងសុន្ទរកថាក្នុងពិធីមួយនៅឆ្នាំ២០២២ នៅផ្សារហ៊ុនតូក្យូ (Tokyo Stock Exchange – TSE) ក្នុងទីក្រុងតូក្យូ ប្រទេសជប៉ុន ថ្ងៃទី៣០ ខែធ្នូ ឆ្នាំ២០២២។ (REUTERS/Issei Kato)

អ្នកនាំពាក្យរដ្ឋាភិបាលជប៉ុន បានឱ្យដឹងនៅថ្ងៃសុក្រនេះថា លោកនាយករដ្ឋមន្ត្រី ហ្វូមីអូ គីស៊ីដា (Fumio Kishida) បានទទួលការអញ្ជើញឱ្យទៅបំពេញទស្សនកិច្ចនៅប្រទេសអ៊ុយក្រែន ក្នុងពេលឆាប់ៗខាងមុខនេះ។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters នៅថ្ងៃសុក្រ ទី៦ ខែមករា ឆ្នាំ២០២៣។

យោងតាមប្រធានលេខាធិការគណៈរដ្ឋមន្ត្រីជប៉ុន លោក Hirokazu Matsuno ការអញ្ជើញនេះបានធ្វើឡើងតាមរយៈប្រធានខុទ្ទកាល័យប្រធានាធិបតីអ៊ុយក្រែន លោក Andriy Yermak ទៅកាន់ឯកអគ្គរដ្ឋទូតជប៉ុនប្រចាំនៅអ៊ុយក្រែន កាលពីថ្ងៃពុធ។

ទោះជាយ៉ាណា មិនទាន់មានការបញ្ជាក់ផ្លូវការណាមួយ ថាតើទស្សនកិច្ចនេះនឹងត្រូវធ្វើឡើងនៅពេលណានោះទេ។

ទាក់ទិននឹងករណីនេះ លោក Hirokazu Matsuno បន្ថែមថា៖ «ប្រទេសជប៉ុន គឺតែងតែឈរជាមួយនឹងពលរដ្ឋអ៊ុយក្រែនជានិច្ច ខណៈខ្លួនក៏នឹងចាត់វិធានការសមស្របទាំងឡាយ ក្នុងនាមជាប្រធានក្រុមប្រទេសមានសេដ្ឋកិច្ចជឿនលឿនទាំង៧ [G7] នៅឆ្នាំនេះផងដែរ»។

គួរបញ្ជាក់ថា លោកនាយករដ្ឋមន្ត្រី ហ្វូមីអូ គីស៊ីដា នៅសប្តាហ៍ក្រោយនេះ ក៏គ្រោងនឹងធ្វើដំណើរទស្សនកិច្ចទៅកាន់ប្រទេសជាសមាជិក G7 មួយចំនួន ដែលរួមមាន បារាំង អ៊ីតាលី ចក្រភពអង់គ្លេស កាណាដា និងសហរដ្ឋអាមេរិក ផងដែរ ខណៈវាជាដំណើរទស្សនកិច្ចការទូតដ៏សំខាន់មួយ មុនពេលប្រទេសជប៉ុនធ្វើជាម្ចាស់ផ្ទះនៃកិច្ចប្រជុំកំពូល G7 ប្រចាំឆ្នាំ នៅខែឧសភាខាងមុខនេះ នៅទីក្រុងហ៊ីរ៉ូស៊ីម៉ា (Hiroshima)៕

ជប៉ុន, ប្រទេសជប៉ុន, រុស្ស៊ី, អ៊ុយក្រែន

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។