ឯកអគ្គរដ្ឋទូតរុស្ស៊ីប្រចាំនៅសហរដ្ឋអាមេរិក លោក Anatoly Antonov បានឱ្យដឹងនៅថ្ងៃអង្គារម្សិលមិញថា ការដែលអាមេរិកគ្រោងនឹងបណ្តុះបណ្តាលដល់ទាហានអ៊ុយក្រែន ក្នុងការប្រើប្រាស់ប្រព័ន្ធមីស៊ីល Patriot គឺបង្ហាញឱ្យឃើញកាន់តែច្បាស់បន្ថែមទៀតនៃការចូលរួមរបស់ប្រទេសនេះនៅក្នុងជម្លោះក្នុងប្រទេសអ៊ុយក្រែន។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters នៅថ្ងៃទី១១ ខែមករា ឆ្នាំ២០២៣។
ថ្លែងក្នុងសេចក្តីថ្លែងការណ៍មួយដែលត្រូវបានបង្ហោះដោយស្ថានទូតរបស់ខ្លួន លោក Anatoly Antonov បន្តថា៖ «ការសម្រេចចិត្តរបស់ក្រសួងការពារជាតិសហរដ្ឋអាមេរិក ក្នុងការរៀបចំវគ្គបណ្តុះបណ្តាលនៅមូលដ្ឋានយោធា Fort Sill ក្នុងរដ្ឋ Oklahoma គឺជាការបញ្ជាក់ឱ្យឃើញមួយផ្សេងទៀតនៃការចូលរួមជាក់ស្ដែងរបស់ទីក្រុងវ៉ាស៊ីនតោន នៅក្នុងជម្លោះអ៊ុយក្រែន ដោយឈរនៅខាងទីក្រុងកៀវ»។
លោកបន្ថែមថា គោលបំណងពិតប្រាកដរបស់អាមេរិក គឺការធ្វើឱ្យមានការខូចខាតឱ្យបានច្រើនតាមដែលអាចធ្វើទៅបានលើប្រទេសរុស្ស៊ី នៅលើសមរភូមិ តាមរយៈការប្រើប្រាស់ដៃរបស់អ៊ុយក្រែន។
យោងតាមមន្ត្រីសហរដ្ឋអាមេរិកមួយរូបដែលសុំមិនបញ្ចេញឈ្មោះ បានបញ្ជាក់ឱ្យដឹងថា ការបណ្តុះបណ្តាលនេះនឹងធ្វើឡើងនៅឯមូលដ្ឋានយោធា Fort Sill ក្នុងរយៈពេលប៉ុន្មានសប្តាហ៍ខាងមុខនេះ។
ភាពតានតឹងរវាងរុស្ស៊ី និងអ៊ុយក្រែន ក្នុងរយៈពេលចុងក្រោយនេះ បានចាប់ផ្ដើមកើនឡើងខ្លាំងបន្ទាប់ពីរុស្ស៊ីបានបើកការឈ្លានពានទ្រង់ទ្រាយធំទៅលើប្រទេសក្បែរខាងរបស់ខ្លួនមួយនេះ ដែលធ្វើឡើងបន្ទាប់ពីការប្រកាសសង្គ្រាមមួយដោយប្រធានាធិបតី លោក វ្លាឌីមៀរ ពូទីន។
ជាការឆ្លើយតប សហរដ្ឋអាមេរិក និងសម្ពន្ធមិត្តរបស់ខ្លួន បានសម្រេចដាក់ទណ្ឌកម្មយ៉ាងធ្ងន់ធ្ងរជាបន្តបន្ទាប់លើរុស្ស៊ី ខណៈខ្លួនក៏បានផ្គត់ផ្គង់អាវុធ និងជំនួយជាបន្តបន្ទាប់ក្នុងទំហំទឹកប្រាក់រាប់ពាន់លានដុល្លារសម្រាប់ជួយគាំទ្រដល់វិស័យការពារជាតិអ៊ុយក្រែនផងដែរ៕
