មន្ត្រីនគរបាលចរាចរណ៍ខេត្តកំពង់ស្ពឺ ចំនួន១០រូប ត្រូវបានដកបញ្ឈរជើងបណ្ដោះអាសន្ន បន្ទាប់ពីមន្ត្រីម្នាក់ក្នុងចំណោមមន្ត្រីទាំងនេះបានផាកពិន័យអ្នកបើកបរដោយមិនចេញវិក្កយបត្រ និងបានឱ្យអ្នកបើកបរផ្ទេរប្រាក់ចូលក្នុងគណនីធនាគារផ្ទាល់ខ្លួន។
ហេតុការណ៍នេះបានកើតឡើងកាលពីថ្ងៃទី១៤ ខែមករា ឆ្នាំ២០២៣ នៅពេលដែលអ្នកបើកបរម្នាក់ឈ្មោះ ឡុក គា និងមនុស្សម្នាក់ទៀតកំពុងបើកបររថយន្តដឹកទំនិញ ពីខេត្តកណ្តាល ទៅខេត្តព្រះសីហនុ តាមផ្លូវជាតិលេខ៤។ លោក ឡុក គា បាននិយាយថា រថយន្តរបស់ពួកគាត់ត្រូវបានឃាត់នៅក្នុងខេត្តកំពង់ស្ពឺ ដោយសារដឹកទំនិញសំពីងសំពោង ប៉ុន្តែភ្លាមៗនោះសមត្ថកិច្ចបានរកឃើញថា អ្នកបើកបរមិនមានបណ្ណបើកបរ។
លោក ឡុក គា បាននិយាយថា៖ «ខ្ញុំមានបណ្ណបើកបរ ប៉ុន្តែនៅពេលនោះ ខ្ញុំដេកលក់។ ដូច្នេះ ខ្ញុំបានឱ្យបុគ្គលិកខ្ញុំបើកជំនួស។ ហើយពេលនោះ នគរបាលឃាត់យើង»។
លោកបន្ថែមថា នគរបាលបានឱ្យគាត់បង់ប្រាក់ផាកពិន័យចំនួន៣០០ដុល្លារ ប៉ុន្តែដោយសារតែគាត់មិនមានប្រាក់ គាត់ក៏បានចរចាសុំបញ្ចុះតម្លៃមកត្រឹម២០០ដុល្លារ ហើយបានសុំឱ្យភរិយារបស់គាត់ផ្ទេរប្រាក់ទៅកាន់គណនីធនាគារ ABA របស់មន្ត្រីនគរបាលម្នាក់ដោយផ្ទាល់ឈ្មោះ ខែម សុធារិទ្ធ។
ទោះយ៉ាងណា លោក ឡុក គា បាននិយាយថា គាត់មានការសង្ស័យ នៅពេលដែលនគរបាលបានត្រឹមតែថតរូបពេលប្រគល់សំបុត្រសម្រាប់ការផាកពិន័យ ប៉ុន្តែមិនបានចេញបង្កាន់ដៃឱ្យគាត់។ គាត់បានបង្ហោះនៅលើបណ្តាញសង្គមហ្វេសប៊ុក កាលពីថ្ងៃទី១៦ ខែមករា ឆ្នាំ២០២៣ ហើយចាប់តាំងពីពេលនោះមក ការបង្ហោះនោះទទួលបានការចែកចាយ (share) ប្រហែល៥ ០០០ និងការបញ្ចេញមតិយោបល់ (comments) ៥០០។
អ្នកបញ្ចេញមតិយោបល់ភាគច្រើនបានរិះគន់នគរបាលចំពោះទង្វើរបស់ពួកគេ ប៉ុន្តែក៏បានទម្លាក់កំហុសលើអ្នកបើកបរ ដែលបើកបររថយន្តដោយគ្មានបណ្ណបើកបរ។
លោក ឡុក គា បន្ថែមថា គាត់បានថតរូបនគរបាលនិយាយជាមួយអ្នកបើកបរ ដើម្បីផ្ញើទៅឱ្យភរិយារបស់គាត់មើល ប៉ុន្តែនគរបាលឱ្យលុបចេញវិញ។
លោកថា៖ «ខ្ញុំខកចិត្តយ៉ាងខ្លាំងចំពោះទង្វើដ៏គឃ្លើនរបស់គាត់ [នគរបាល]។ ខ្ញុំមិនបានធ្វើអ្វីខុសទេ ដោយគ្រាន់តែថតរូបផ្ញើទៅប្រពន្ធខ្ញុំ»។
លោក ញឹម សៅ ស្នងការរងនគរបាលខេត្តកំពង់ស្ពឺ បានឃើញការបង្ហោះនេះមួយម៉ោងក្រោយការបង្ហោះ ហើយបានអញ្ជើញលោក ឡុក គា មកជួបនៅថ្ងៃទី១៧ ខែមករា ឆ្នាំ២០២៣។ លោកថា មន្ត្រីនគរបាលដែលបំពេញភារកិច្ចមានកំហុសដោយសារពួកគេយល់ព្រមបញ្ចុះតម្លៃផាកពិន័យតាមច្បាប់កំណត់៣០០ដុល្លារ ហើយមន្ត្រីនគរបាលចរាចរណ៍ទាំង១០នាក់នោះត្រូវបានដកបញ្ឈរជើងបណ្តោះអាសន្ន។
លោក ញឹម សៅ បានមានប្រសាសន៍ថា៖ «នេះមិនតំណាងឱ្យនគរបាលចរាចរណ៍ទាំងអស់ទេ។ វាគ្រាន់តែជាសកម្មភាពបុគ្គល ឬក្រុមតូចមួយប៉ុណ្ណោះ។ យើងសង្កេតមើលដោយប្រុងប្រយ័ត្ននូវអាកប្បកិរិយា និងទង្វើមិនសមរម្យរបស់នគរបាលចរាចរណ៍»។
លោកបន្ថែមថា ពួកគេបានប្រគល់ប្រាក់ទៅឱ្យលោក ឡុក គា វិញ ហើយបានសុំទោសគាត់ ទោះបីជាគាត់មានកំហុសដោយឱ្យមនុស្សដែលគ្មានបណ្ណបើកបរបើករថយន្តក៏ដោយ។
លោកបន្ថែមថា មិនមានវិធីបង់ប្រាក់ពិន័យតាមប្រព័ន្ធឌីជីថលជាផ្លូវការនោះទេ ប៉ុន្តែប្រសិនបើមន្ត្រីនគរបាលទទួលប្រាក់ផាកពិន័យតាមឌីជីថលដោយប្រើគណនីផ្ទាល់ខ្លួន បន្ទាប់មកផ្ទេរទៅកាន់រដ្ឋបាលខេត្ត គឺអាចធ្វើទៅបាន៕
បកប្រែនិងសម្រួលចេញពីអត្ថបទដើមភាសាអង់គ្លេស៖ Kampong Speu Police Officer Pockets Traffic Fines, Gets Entire Team Suspended
