រដ្ឋាភិបាលកម្ពុជានឹងប្រគល់រថយន្តដឹងវ៉ាក់សាំងប្រឆាំងកូវីដ-១៩ ចំនួន១០គ្រឿងទៅឱ្យប្រទេសឡាវដែលជាមិត្តជិតខាង ដោយថា ដើម្បីពង្រឹងនូវកិច្ចសហប្រតិបត្តិការទ្វេភាគី និងជាកាយវិការមនុស្សធម៌ផងដែរ។
ក្រសួងសុខាភិបាលបានចេញសេចក្ដីជូនព័ត៌មានកាលពីម្សិលមិញ ស្ដីពីពិធីប្រគល់-ទទួលរថយន្តដឹកវ៉ាក់សាំងចំនួន១០គ្រឿងដែលជាអំណោយសប្បុរសធម៌របស់កម្ពុជាប្រគល់ជូនសាធារណរដ្ឋប្រជាធិបតេយ្យប្រជាមានិតឡាវ។
លិខិតបន្តថា ពិធីនេះនឹងប្រព្រឹត្តឡើងនៅថ្ងៃទី១២ ខែមីនា ឆ្នាំ២០២២ ក្រោមអធិបតីភាពរដ្ឋលេខាធិការក្រសួងសុខាភិបាល លោកស្រី ឱ វណ្ណឌីន ដែលនឹងនាំយកជំនួយរថយន្តដឹកវ៉ាក់សាំងរបស់រាជរដ្ឋាភិបាលនិងប្រជាជនកម្ពុជាទាំងនេះ ទៅប្រគល់ជូនរដ្ឋាភិបាលនិងប្រជាជនឡាវ នៅច្រកព្រំដែនអន្តរជាតិត្រពាំងក្រៀល ស្ថិតនៅក្នុងខេត្តស្ទឹងត្រែង ជាប់ព្រំដែនខេត្តចម្ប៉ាស័កប្រទេសឡាវ។
ក្រសួងបានបញ្ជាក់ថា៖ «ការសម្រេចផ្ដល់រថយន្តដឹកវ៉ាក់សាំងរបស់រាជរដ្ឋាភិបាលនិងប្រជាជនកម្ពុជាជូនរដ្ឋាភិបាលនិងប្រជាជននៃប្រទេសឡាវនាពេលនេះ គឺជាការបង្ហាញនូវការយកចិត្តទុកដាក់ខ្ពស់បំផុតរបស់សម្ដេចតេជោនាយករដ្ឋមន្ត្រី ចំពោះសុខភាពនិងសុខុមាលភាពរបស់ប្រជាជនឡាវ»។
ក្នុងលិខិតនោះបន្ថែមថា ជំនួយទាំងនេះក៏ធ្វើឡើងក្នុងនាមជាប្រទេសជិតខាងភូមិផងរបងជាមួយគ្នា ក៏ដូចជាការពង្រឹងនូវកិច្ចសហប្រតិបត្តិការទ្វេភាគី និងជាកាយវិការមនុស្សធម៌ប្រកបដោយបេះដូងដ៏ល្អប្រពៃពិតប្រាកដ ក្នុងន័យដូចអ្វីដែលលោក ហ៊ុន សែន ធ្លាប់លើកឡើងថា “កម្ពុជាជាប្រទេសតូចតាច តែមានបេះដូងធំទូលាយ”។
កម្ពុជាជឿជាក់ថា ជំនួយមនុស្សធម៌ដ៏ថ្លៃថ្លានេះនឹងរួមចំណែកបន្ថែមទៀតជូនដល់ប្រទេសឡាវនៅក្នុងការឆ្លើយតបទៅនឹងវិបត្តិជំងឺកូវីដ-១៩ ជាពិសេសលើកិច្ចការចាក់វ៉ាក់សាំងកូវីដ-១៩ ជូនដល់ប្រជាជនឡាវឱ្យកាន់តែមានភាពល្អប្រសើរឡើងជាលំដាប់។
កន្លងមក កម្ពុជាក៏ធ្លាប់ផ្ដល់ជំនួយសប្បុរសធម៌ជូនប្រទេសឡាវ ដូចជា ថវិកា ម៉ាស់ វែនតាសុវត្ថិភាព សម្លៀកបំពាក់សុវត្ថិភាពសម្រាប់មន្ត្រីសុខាភិបាល ម៉ាស៊ីនវាស់កម្ដៅ របាំងមុខ ឧបករណ៍ជំនួយការដកដង្ហើម ជាដើម៕
