សាច់ញាតិរបស់ទាហានជើងទឹកថៃដែលបាត់ខ្លួនបន្ទាប់ពីនាវាចម្បាំងមួយគ្រឿងបានលិចចូលទៅក្នុងឈូងសមុទ្រថៃ ហាក់បង្ហាញជាក្ដីអស់សង្ឃឹមនៅថ្ងៃពុធនេះ បើទោះបីជាក្រុមជួយសង្គ្រោះបានពង្រីកប្រតិបត្តិការស្វែងរកក្នុងតំបន់ផ្សេងទៀតក៏ដោយ។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters នៅថ្ងៃទី២១ ខែធ្នូ ឆ្នាំ២០២២។
ហេតុការណ៍លិចនាវានេះកើតឡើងបន្ទាប់ពីមានខ្យល់បក់ខ្លាំង ដោយទឹករលកបានបោកចូលនាវា ដែលបណ្តាលឱ្យខូចដល់ប្រព័ន្ធអគ្គិសនី និងថាមពលសំខាន់ៗ។
ទាក់ទិននឹងករណីនេះ នាវាកងទ័ពជើងទឹកចំនួន៤គ្រឿង និងឧទ្ធម្ភាគចក្រ ៦គ្រឿង ក៏ត្រូវបានបញ្ជូនដើម្បីស្វែងរកអ្នកបាត់ខ្លួននៅខេត្តប្រាជួបគិរីខ័ន (Prachuap Khiri Khan) ភាគខាងត្បូងនៃទីក្រុងបាងកក ផងដែរ។
ទោះជាយ៉ាងណា គិតរហូតមកដល់ពេលនេះ ក្នុងចំណោមអ្នកដែលបាត់ខ្លួនចំនួន ៣០នាក់ ក្នុងនោះមានតែម្នាក់ប៉ុណ្ណោះដែលត្រូវបានរកឃើញនៅមានជីវិត ខណៈ៦នាក់ផ្សេងទៀតត្រូវបានប្រទះឃើញស្លាប់។
ថ្លែងប្រាប់ទូរទស្សន៍ក្នុងស្រុកមួយ អ្នកនាំពាក្យកងទ័ពជើងទឹក លោក Pogkrong Monthardpalin បានឱ្យដឹងថា៖ «យើងរំពឹងថានឹងអាចរកឃើញ [អ្នកដែលបាត់ខ្លួន] ប៉ុន្តែយើងមិនអាចទស្សន៍ទាយបានថាតើអ្នកទាំងនោះនឹងនៅរស់រានមានជីវិត ឬយ៉ាងណានោះទេ»។
គួរបញ្ជាក់ថា នាវាចម្បាំង HTMS Sukhothai បានលិចកាលពីយប់រំលងអធ្រាត្រឈានចូលថ្ងៃចន្ទដើមសប្តាហ៍នេះ ដែលមានចម្ងាយជាង៣០គីឡូម៉ែត្រពីឆ្នេរសមុទ្រ ដែលបណ្ដាលឱ្យមនុស្ស ៣០នាក់ ក្នុងចំណោម ១០៥នាក់នៅលើនាវា បាត់ខ្លួន៕