វិភាគ៖ តើច្បាប់អនុញ្ញាតឲ្យមានបាតុកម្មពីរក្រុមធ្វើឡើងក្នុងពេលតែមួយឬទេ?

នៅដើមខែកុម្ភៈកន្លងទៅនេះមានបាតុកម្មពីរក្រុមដែលមានគោលបំណងផ្ទុយគ្នារវាងក្រុមអតីតអ្នកបើករថយន្តឲ្យក្រុមហ៊ុន​កាពីតូលនិងសមាគមអ្នករត់ម៉ូតូនិងរ៉ឺម៉កង់បីបានប៉ះទង្គិចគ្នានៅមុខក្រុមហ៊ុន​កាពីតូលដឹកអ្នកដំណើរ ហើយបានបណ្តាលឲ្យភាគីទាំងសងខាងមានរបួស។​

បាតុកម្មគឺជាសកម្មភាពរបស់មនុស្សមួយក្រុម​​ដែលតវ៉ាតាមរយៈការលើកបដានៅមួយកន្លែងឬដើរជាក្បួនជាដើម​ដើម្បីបង្ហាញ​ជំហររបស់ពួកគេលើបញ្ហាអ្វីមួយឬដើម្បីការពារផលប្រយោជន៍ណាមួយ។​

ចុះបើមានបាតុកម្មលើសពីមួយក្រុមធ្វើឡើងក្នុងពេលនិង​ទីកន្លែងតែមួយតើច្បាប់អនុញ្ញាតឬទេ?

អនុប្រធានផ្នែកស៊ើបអង្កេតនៃសមាគមការពារសិទ្ធិមនុស្សអាដហុកលោក ណៃ វ៉ង់ដា លើកឡើងថាច្បាប់​មិនអនុញ្ញាតឲ្យបាតុកម្មពីរក្រុមធ្វើឡើងក្នុងពេលតែមួយនិងកន្លែងតែមួយទេដោយលោកបញ្ជាក់ថាគោលបំណងនៃច្បាប់កុំឲ្យមានការប៉ះទង្គិចគ្នាកើតឡើង។​

លោក ណៃ វ៉ង់ដា លើកឡើងថាករណីបាតុកម្មពីរអាចនឹងមានការប៉ះទង្គិចគ្នានោះគឺសមត្ថកិច្ចមានតួនាទីសំខាន់ក្នុងទប់ស្កាត់ឲ្យបានទាន់ពេលវេលា។​ លោកបន្តថាបើករណីនៅមុខក្រុមហ៊ុន​កាពីតូលគឺអតីតអ្នកបើករថយន្តឲ្យក្រុមហ៊ុន​កាពីតូល និង​ក្រុមអ្នកបើកម៉ូតូកង់បីមកពីសមាគមរួមគ្នាដើម្បីអភិវឌ្ឍកម្ពុជាអាចធ្វើបាតុកម្មដោយសន្តិវិធីនៅពីកន្លែងផ្សេងគ្នាបាន។ លោកបន្ថែមថា៖ “បើក្រុមអ្នករត់តុតុហ្នឹងចង់ធ្វើការតវ៉ាបាតុកម្មគាត់អាចលើកបដាមួយផ្នែកទៅថាក្រុមហ៊ុនហ្នឹងចិត្តល្អចេះចិត្ត​ល្អចុះធ្វើឲ្យគាត់រស់នៅបានដឹកភ្ញៀវដឹកអីបានក្រុមហ៊ុន​ចិត្តល្អថៅកែ​មាន Tip មាន bonus អីចឹងទៅ។ អាហ្នឹងជាសិទ្ធិរបស់គាត់មិនមែនទៅវាយអ្នកតវ៉ាផ្សេងថាខ្លាចប៉ះពាល់ឆ្នាំងបាយរបស់ពួកគាត់ទេ”។​

មាត្រា១៤នៃច្បាប់ស្តីពីការធ្វើបាតុកម្មដោយសន្តិវិធីលើកឡើងថាក្នុងករណីដែលចំនួនក្រុមនៃការធ្វើបាតុកម្មដោយសន្តិវិធីលើស​ពីពីរក្រុមផ្សេងគ្នាហើយចង់ធ្វើនៅកន្លែងតែមួយនិងពេលតែមួយនោះអាជ្ញាធរដែនដីរាជធានីនិងខេត្តមានសត្ថកិច្ចត្រូវសម្រេចឲ្យក្រុមដែលបានដាក់លិខិតជូនដំណឹងមុន​ទទួលបានសិទ្ធិធ្វើមុនឬ​អាចអនុញ្ញាតឲ្យធ្វើការនៅកន្លែងមួយផ្សេងទៀតដែលមានចម្ងាយយ៉ាងតិច៥០០ម៉ែត្រ។​

កាលពីថ្ងៃទី២៦ខែតុលាឆ្នាំ២០១៥អ្នកគាំទ្រគណបក្សប្រជាជនកម្ពុជាបានធ្វើបាតុកម្មប្រឆាំងថ្នាក់ដឹកនាំគណបក្សសង្គ្រោះជាតិនៅរាជធានីភ្នំពេញបន្ទាប់ពីលោកនាយករដ្ឋមន្ត្រី ហ៊ុន ​សែន ចោទថាគណបក្សសង្គ្រោះជាតិ​ថាជាអ្នករៀបចំឲ្យពលរដ្ឋធ្វើបាតុកម្មប្រឆាំងរូបលោកនៅសហរដ្ឋអាមេរិក​និង​បារាំង។​  នៅថ្ងៃដដែល​នោះអ្នកចូលរួមធ្វើបាតុកម្ម​បានវាយតំណាងរាស្ត្រគណបក្សសង្គ្រោះជាតិ​ពីររូបឲ្យរងរបួសធ្ងន់នៅក្បែររបងរដ្ឋសភា។​​ ​

លោក ណៃ វ៉ង់ដា លើកឡើងថាបាតុកម្មប្រឆាំងបាតុកម្ម​មិនមានផលប្រយោជន៍ល្អសម្រាប់សង្គមទេលោក​បញ្ជាក់ថាផ្ទុយទៅវិញ​វានឹងបង្កជាអំពើហិង្សាធ្វើឲ្យប៉ះពាល់ដល់ប្រទេសជាតិទៅវិញ។​ លោកសរសើរឥរិយាបថលោកនាយករដ្ឋមន្ត្រី ហ៊ុន សែន ពេលជួបការតវ៉ានៅសហរដ្ឋអាមេរិក​នៅថ្ងៃទី១៥ខែកុម្ភៈមិនមាន​ប្រតិកម្មតបហើយប្តូរបរិយាកាសទៅជួបអ្នកគាំទ្រទៅវិញ។ លោកបន្ថែមថា៖ “សម្តេចនាយករដ្ឋមន្ត្រីទៅអាមេរិក​ហើយជួបការតវ៉ាប្រឆាំងការដឹកនាំរបស់គាត់នៅទីនោះហើយគាត់ក៏ឆ្លៀតជួបអ្នកគាំទ្ររបស់គាត់រាប់រយនាក់នៅក្នុងសណ្ឋាគារដែលបង្ហាញពីការគាំទ្រមិនមែនយកបាតុកម្មទៅទប់ជាមួយ បាតុ​កម្មមិនមែនសងសឹកដោយបាតុកម្មហើយក៏មិនមែនយកបន្លាជួសបន្លាដែរ។​ នេះជាគំរូមួយល្អគួរឲ្យកោតសរសើរ”។​

មាត្រា២០នៃច្បាប់ស្តីពីការធ្វើបាតុកម្មដោយសន្តិវិធីចែងថាករណីបាតុកម្មដោយសន្តិវិធីបាន​ក្លាយ​​ទៅជាហិង្សាអាជ្ញាធរមានសមត្ថកិច្ចត្រូវចាត់វិធានការ​សមស្របដើម្បីទប់ស្កាត់និង​បញ្ឈប់បាតុកម្មនេះ​ជាបន្ទាន់។​

តាមរបាយការណ៍ក្រសួងមហាផ្ទៃបង្ហាញថានៅឆ្នាំ​២០១៣ចំនួនបាតុកម្ម-កូដកម្មកើតមានចំនួន៨៤២លើក។ ដែលបាតុកម្ម-កូដកម្មនោះធ្វើឡើងដោយប្រជាពលរដ្ឋ៤២៤លើកនិងកម្មករ​ចំនួន​៤១៨លើក ហើយបានធ្វើឲ្យខាតបង់ថវិកាអស់ជាច្រើន​៕