យុវជនបងបង្អូនភ្លោះដែលធ្វើសកម្មភាពស្និទនឹងលោក កែម ឡី បានភៀសខ្លួនទៅក្រៅប្រទេសនៅថ្ងៃនេះ ដោយថាបារម្ភពីសុវត្ថិភាពផ្ទាល់ខ្លួន បន្ទាប់ពីការបាញ់សម្លាប់អ្នកវិភាគល្បីឈ្មោះដែលពួកគេធ្លាប់ធ្វើការជាមួយ។
ក្នុងហ្វេសប៊ុករបស់ Chum Hout Chum Hour បានបង្ហាញរូបភាពយុវជនកោរសក់ទាំងពីរនាក់នៅលើយន្តហោះ ដោយសរសេរពាក្យ “មានតែខោ អាវមួយកំភ្លេពាក់ជាប់នឹងខ្លួន ត្រូវបង្ខំចិត្តចាកចេញទៅទាំងអារម្មណ៍ក្ដុកក្ដួលក្រៃលែង។ លាហើយកម្ពុជាអើយ“។
មុនពេលចាកចេញពីកម្ពុជា យុវជន ជុំ ហួត និង ជុំ ហួរ បានសរសេរលើហ្វេសប៊ុកថា “ពេលនេះពួកខ្ញុំអត់មានសុវត្ថិភាពទេ ហើយកំពុងតែនៅកន្លែងមួយ”។
ភ្លាមៗក្រោយការបាញ់សម្លាប់លោក កែម ឡី យុវជនបងប្អូនភ្លោះនេះបាននិយាយទៅកាន់អ្នកសារព័ត៌មានទាក់ទងនឹងអំពើឃាតកម្មនេះ។ បុរសទាំងពីរនាក់នេះបានប្តេជ្ញាថានឹងបន្តបេសកម្មពីលោក កែម ឡី ដោយពួកគេបានចាត់ទុកឃាតកម្មនេះថាជាការធ្វេសប្រហែសរបស់រដ្ឋាភិបាលក្នុងការការពារសុវត្ថិភាពឲ្យអ្នកវិភាគល្បីឈ្មោះរូបនេះ៕