រដ្ឋាភិបាលសម្រេចបង្កើតគណៈកម្មការមួយ ដើម្បីរៀបចំចាត់ចែងគម្រោងសាងសង់ព្រលានយន្ដហោះថ្មី ដែលត្រូវបានប្រកាសឲ្យដឹងកាលពីឆ្នាំមុនថា មានតម្លៃដល់ទៅ ១.៥ពាន់លានដុល្លារ។
ក្នុងសេចក្ដីសម្រេចមួយកាលពីថ្ងៃទី១៨ ខែកុម្ភៈ ឆ្នាំ២០១៩ ដែលវីអូឌីទើបតែទទួលបាននៅថ្ងៃនេះ រដ្ឋាភិបាលបានសម្រេចបង្កើតគណៈកម្មការមួយ មានសមាជិកចំនួន ២៣រូប ដែលដឹកនាំដោយរដ្ឋមន្ដ្រីក្រសួងរៀបចំដែនដី លោក ជា សុផារ៉ា ដើម្បីរៀបចំទីតាំងគ្រោងសាងសង់អាកាសយានដ្ឋានអន្ដរជាតិភ្នំពេញថ្មី។
បើតាមសេចក្ដីសម្រេច គណៈកម្មការនេះមានភារកិច្ចពិនិត្យ និងកំណត់ទីតាំងសម្រាប់គម្រោងសាងសង់អាកាសយានដ្ឋានអន្ដរជាតិភ្នំពេញថ្មី សិក្សាវាយតម្លៃថ្លៃដី សម្របសម្រួលជាមួយក្រសួង-ស្ថាប័នពាក់ព័ន្ធផ្សេងទៀត ពិនិត្យ និងផ្ដល់យោបល់លើផែនការមេរបស់គម្រោង និងធ្វើរបាយការណ៍ជូនទៅនាយករដ្ឋមន្ដ្រី ដើម្បីពិនិត្យនិងសម្រេច។
គម្រោងសាងសង់ព្រលានយន្ដហោះថ្មីនេះ ត្រូវបានគេមើលឃើញថា ធ្វើឡើងស្របពេលកម្ពុជាកំពុងមានទំនាក់ទំនងកាន់តែជិតស្និតជាមួយប្រទេសចិន និងការប្ដេជ្ញារបស់រដ្ឋាភិបាលក្នុងកៀងគររកក្រុមអ្នកវិនិយោគ និងពង្រីកកំណើនភ្ញៀវទេសចរចិនមកកម្ពុជា៕