មន្ត្រីខេត្តព្រះសីហនុ បានឲ្យដឹងនៅព្រឹកថ្ងៃនេះថា ក្រុមជួយសង្គ្រោះ បានទាញយកសពបានចំនួន ១៧នាក់ហើយគិតត្រឹមព្រឹកថ្ងៃអាទិត្យនេះ មួយថ្ងៃក្រោយពីអគារមួយកម្ពស់ ៧ជាន់ បានរំលំបាក់ ដែលបណ្ដាលឲ្យមនុស្សរាប់សិបនាក់ជាប់នៅក្រោមគំនរបាក់បែក។
អ្នកនាំពាក្យសាលាខេត្តព្រះសីហនុ លោក ឃាង ភារម្យ ប្រាប់វីអូឌីថា គិតមកដល់ព្រឹកថ្ងៃអាទិត្យនេះ ក្រុមការងារជួយសង្គ្រោះបានរកឃើញសពចំនួន ១៧នាក់ ក្នុងនោះមានស្រី ៤នាក់ និងអ្នករងរបួសកើនដល់ ២៤នាក់ នៅក្នុងករណីបាក់សំណង់អគារ ៧ជាន់ កាលពីព្រឹកថ្ងៃសៅរិ៍ម្សិលមិញ។
យ៉ាងណាក៏ដោយ លោកអះអាងថា ក្រុមការងារជួយសង្គ្រោះកំពុងបន្ដប្រតិការជួយសង្គ្រោះបន្ដទៀត ដើម្បីរុករកអ្នកស្លាប់ និងអ្នកនៅរស់រានមានជីវិតផ្សេងទៀត។
លោក ឃាង ភារម្យ មានប្រសាសន៍ថា៖ «យើងនៅបន្ដការរុករកទាល់តែយើងយកចេញអស់ ហើយសម្អាតទីតាំង។ យើងអត់អាចវាយតម្លៃបានទេ ព្រោះបើគិតពីកម្ទេចកម្ទីសំណង់បាន ៤០ភាគរយ វានៅ ៦០ភាគរយទៀត។ យើងបានសម្របសម្រួលជាមួយខាងក្រុមគ្រួសារបញ្ជូនទៅស្រុកកំណើតបាន ៩សពហើយ ហើយយើងមានរថយន្ដជូនគាត់ដល់ស្រុកកំណើត»។
ករណីបាក់អគារ៧ជាន់នេះ សមត្ថកិច្ចបានឃាត់ខ្លួនជនជាតិចិន ៣នាក់ ដោយថា សំណង់អគារនេះ គឺមានពុំច្បាប់អនុញ្ញាតនោះទេ ហើយអាជ្ញាធរបានចុះហាមឃាត់ចំនួន ២ដងរួចហើយ ប៉ុន្ដែ ម្ចាស់ការដ្ឋានមិនអនុវត្តតាមការណែនាំ។
ជនជាតិ៣នាក់នោះរួមមានឈ្មោះ Chen Kun ជាម្ចាស់ការដ្ឋានសំណង់ ឈ្មោះ Deng Xing Gul ជាម្ចាស់ក្រុមហ៊ុនទទួលសាងសង់ និង ឈ្មោះ Gao Yu ជាអ្នកម៉ៅការបូកជញ្ជាំងអគារ។
ក្រៅពីជនជាតិចិនទាំង៣នាក់នេះ សមត្ថកិច្ចក៏បានឃាត់ខ្លួនជនជាតិខ្មែរម្នាក់ផងដែរ ដែលមានឈ្មោះ ញឹក ហ៊ុយ បន្ទាប់ពីបានជួលដីឱ្យជនជាតិចិនសាងសង់អគារសម្រាប់ធ្វើសណ្ឋាគារនេះ៕
