មេដឹកនាំបក្សប្រឆាំងដែលកំពុងជាប់ឃុំក្នុងផ្ទះ បានជំរុញឲ្យស៊ើបអង្កេតអ្នកពាក់ព័ន្ធនៅក្នុងហេតុការណ៍បាក់អគារចិននៅខេត្តព្រះសីហនុកាលពីថ្ងៃម្សិលមិញនេះ ដែលបានឲ្យមនុស្សរាប់សិបនាក់ស្លាប់ និងរងរបួស។
តួលេខថ្មីចុងក្រោយរបស់អាជ្ញាធរខេត្តព្រះសីហនុ បានឲ្យដឹងថា ក្រុមជួយសង្គ្រោះបានទាញយកសាកសពមនុស្ស ១៨នាក់ហើយមកដល់វេលាថ្ងៃត្រង់ថ្ងៃអាទិត្យនេះ ពីគំនរបាក់បែកនៃសំណង់អគារកម្ពស់ ៧ជាន់ ហើយមនុស្ស ២៤នាក់ទៀតបានរងរបួស។
ខណៈដែលកំពុងជាប់ឃុំនៅក្នុងផ្ទះនោះ លោក កឹម សុខា បានសរសេរបង្ហោះលើទំព័រហ្វេសប៊ុករបស់លោកនៅថ្ងៃនេះថា លោក និងភរិយាមានក្ដីរន្ធត់ចិត្តចំពោះសោដនាកម្ម ដែលបណ្ដាលមកពីការបាក់រំលំអគារសំណង់របស់ចិនកម្ពស់ ៧ជាន់ នៅក្នុងខេត្តព្រះសីហនុ កាលពីព្រឹកថ្ងៃសៅរិ៍ ទី២២ ខែមិថុនា ម្សិលមិញ។
បើតាមហ្វេសប៊ុក លោក កឹម សុខា ជំរុញឲ្យអាជ្ញាធរកម្ពុជារកយុត្តិធម៌ជូនជនរងគ្រោះដោយការផ្ដល់ជាសំណង និងរកមូលហេតុពិតនៃការដួលរំលំអគារនេះ ជាពិសេសស្វែងរកវិធានការទប់ស្កាត់កុំឲ្យហេតុការណ៍បែបនេះកើតមានជាថ្មី។
លោក កឹម សុខា សរសេរលើទំព័រហ្វេសប៊ុករបស់លោកថា៖ «ខ្ញុំក៏សូមអំពាវនាវឲ្យមានការផ្តល់យុត្តិធម៌ជូនជនរងគ្រោះដោយផ្តល់សំណង និងផ្តន្ទាទោសចំពោះអ្នកទទួលខុសត្រូវទាំងឡាយដែលពាក់ពន្ធ័ឲ្យបានសមរម្យ ហើយក៏សូមឲ្យរកមូលហេតុដែលបង្កឲ្យមានគ្រោះថ្នាក់ និងមានវិធានការបង្ការទប់ស្កាត់កុំឲ្យហេតុការណ៍បែបនេះកើតមានដដែលៗតទៅទៀត»។
យ៉ាងណាក៏ដោយ ក្រោយហេតុការណ៍ដួលរំលំអគារនេះ រដ្ឋមន្ដ្រីក្រសួងមហាផ្ទៃ លោក ស ខេង ក៏បានផ្ញើសាររំលែកទុក្ខមួយដល់គ្រួសារនៃជនរងគ្រោះ និងអ្នកស្លាប់នៅក្នុងគ្រោះថ្នាក់នេះផងដែរ។
ក្នុងសាររំលែកទុក្ខនោះ លោក ស ខេង ឲ្យដឹងថា លោកនឹងចាត់វិធានការជាក់ស្ដែងដើម្បីស្រាវជ្រាវ និងរកមូលហេតុនៃការដួលរំលំអគារនេះ ព្រមទាំងចាត់វិធានការច្បាប់ចំពោះអ្នកជាប់ពាក់ព័ន្ធក្នុងករណីនេះ។
ក្នុងសាររំលែកទុក្ខនោះ លោក ស ខេង សរសរថា៖ «តាមរយៈយន្ដការអន្ដរក្រសួង ខ្ញុំនឹងចាត់វិធានការជាក់ស្ដែងចំពោះមុខដទៃទៀត ដោយត្រូវបន្ដជំរុញស្រាវជ្រាវ និងស្វែងរកឲ្យឃើញនូវមូលហេតុដើម ដែលនាំឲ្យកើតមានសោដនាដកម្មដ៏អាណោចអាធម្មនេះ ព្រមទាំងចាត់វិធានការលើបុគ្គលពាក់ព័ន្ធ ដើម្បីទទួលខុសត្រូវតាមច្បាប់»។
ក្រោយទទួលបានដំណឹងនេះផងដែរ លោកនាយករដ្ឋមន្ដ្រី ហ៊ុន សែន ក៏បានបញ្ជាពីក្រៅប្រទេសឲ្យបញ្ចេញថវិកាជាតិជួយឧបត្ដម្ភដល់ក្រុមគ្រួសារអ្នកស្លាប់ផងដែរ ដោយថា ក្នុងមួយគ្រួសារទទួលបានប្រាក់ ៤០លានរៀល ឬ ១ម៉ឺនដុល្លារអាមរិក។ ចំណែកឯអ្នករងរបួសក៏នឹងទទួលបានប្រាក់ចំនួន ៥លានរៀល និងការព្យាបាលដោយឥតគិតថ្លៃនៅតាមមន្ទីរពេទ្យរដ្ឋនានា។
អ្នកនាំពាក្យសាលាខេត្តព្រះសីហនុ លោក ឃាង ភារម្យ ប្រាប់ វី.អូ.ឌី ថា គិតមកដល់ព្រឹកថ្ងៃអាទិត្យនេះ ក្រុមការងារជួយសង្គ្រោះបានរកឃើញសាកសពចំនួន ១៧នាក់ ក្នុងនោះមានស្រី៤នាក់ និងអ្នករងរបួសកើនដល់ ២៤នាក់ នៅក្នុងករណីបាក់សំណង់អគារ៧ជាន់ កាលពីព្រឹកថ្ងៃសៅរិ៍ម្សិលមិញនេះ។
យ៉ាងណាក៏ដោយ លោកថា ក្រុមការងារជួយសង្គ្រោះកំពុងបន្ដស្វែងរកអ្នកស្លាប់ និងរបួសផ្សេងទៀត ដែលនៅរស់រានមានជីវិត។
ករណីបាក់អគារ៧ជាន់នេះ សមត្ថកិច្ចបានឃាត់ខ្លួនជនជាតិចិន៣នាក់ ដោយថា សំណង់អគារនេះ គឺមានច្បាប់អនុញ្ញាតនោះទេ ហើយអាជ្ញាធរបានចុះហាមឃាត់ចំនួន២ដងរួចហើយ ប៉ុន្ដែ ម្ចាស់ការដ្ឋានមិនស្ដាប់។
ជនជាតិ៣នាក់នោះរួមមានឈ្មោះ Chen Kun ជាម្ចាស់ការដ្ឋានសំណង់ ឈ្មោះ Deng Xing Gul ជាម្ចាស់ក្រុមហ៊ុនទទួលសាងសង់ និង ឈ្មោះ Gao Yu ជាអ្នកម៉ៅការបូកជញ្ជាំងអគារ។
ក្រៅពីជនជាតិចិនទាំង៣នាក់នេះ សមត្ថកិច្ចក៏បានឃាត់ខ្លួនជនជាតិខ្មែរម្នាក់ផងដែរ ដែលមានឈ្មោះ ញឹក ហ៊ុយ បន្ទាប់ពីបានជួលដីឱ្យជនជាតិចិនសាងសង់អគារសម្រាប់ធ្វើសណ្ឋាគារនេះ៕
