រដ្ឋាភិបាលបានចាត់តាំងមន្ត្រីជាន់ខ្ពស់ ១៥រូប ឲ្យត្រួតពិនិត្យឡើងវិញនូវគុណភាពសំណង់នៅក្នុងខេត្តជាប់ឆ្នេរសមុទ្រកម្ពុជា បន្ទាប់ពីសំណង់អគាររបស់ជនជាតិចិនមួយកន្លែង បានបាក់រលំ ដែលបណ្ដាលឲ្យមនុស្សស្លាប់ និងរបួសរាប់សិបនាក់។
ក្នុងសេចក្ដីសម្រេចចេញនៅល្ងាចថ្ងៃអាទិត្យនេះ លោកនាយករដ្ឋមន្ត្រី ហ៊ុន សែន បានចាត់តាំងមន្ត្រីជាន់ខ្ពស់ ១៥រូប មកពីស្ថាប័នចម្រុះ ឲ្យត្រួតពិនិត្យលើគុណភាពសំណង់នៅខេត្តព្រះសីហនុ។
ក្នុងសេចក្ដីសម្រេចដដែល គណៈកម្មការថ្មីមួយនេះ ដឹកនាំដោយរដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ លោក ឡៅ ទិព្វសីហា ជាប្រធាន និងរដ្ឋលេខាធិការក្រសួងមហាផ្ទៃ លោក អ៊ុក គឹមលេខ ជាអនុប្រធាន។
បើតាមខ្លឹមសារនៃសេចក្ដីសម្រេចដដែលនេះ គណៈកម្មការថ្មីនេះ ត្រូវបានបំពាក់នូវភារកិច្ចឲ្យត្រួតពិនិត្យបទដ្ឋានបច្ចេកទេស ផ្លូវច្បាប់ ស្តង់ដារសំណង់ ស្តង់ដារសុវត្ថិភាព និងគុណភាពសំណង់នៅតាមការដ្ឋានសំណង់នៅខេត្តព្រះសីហនុ។
ជាងនេះទៅទៀត ក្រុមមន្ត្រីចម្រុះទាំងនេះ ក៏នឹងត្រួតពិនិត្យផងដែរលើក្រុមហ៊ុនម៉ៅការសំណង់នៅតាមការដ្ឋានសាងសង់នានា មុននឹងធ្វើរបាយការណ៍បញ្ជូនទៅលោកនាយករដ្ឋមន្ត្រី ហ៊ុន សែន។
លោកនាយករដ្ឋមន្ត្រី ហ៊ុន សែន បានចាត់តាំងក្រុមចម្រុះនេះឡើង តែមួយថ្ងៃប៉ុណ្ណោះបន្ទាប់ពីសំណង់អគារកម្ពស់ ៧ជាន់ ដែលជាគម្រោងសាងសង់របស់ជនជាតិចិន បានបាក់រលំកាលពីទៀបភ្លឺថ្ងៃសៅរ៍ម្សិលមិញ។
កម្មករសំណង់រាប់សិបនាក់ ដែលស្នាក់នៅក្នុងការដ្ឋានសំណង់នោះ ត្រូវបានគេជឿថា កប់នៅក្រោមគំនរបាក់បែកនៃសំណង់នោះ។
តួលេខថ្មីបំផុតនៅត្រឹមល្ងាចថ្ងៃអាទិត្យនេះ បង្ហាញថា សាកសព ២០នាក់ហើយ ត្រូវបានក្រុមជួយសង្គ្រោះទាញចេញពីគំនរបាក់បែកនៃសំណង់អគារនោះ ហើយមនុស្ស ២៤នាក់ទៀត បានរងរបួស៕
