ស្ថានទូតជប៉ុនប្រចាំកម្ពុជាបានផ្ញើសាររំលែកទុក្ខដល់ក្រុមគ្រួសារអ្នកស្លាប់ និងអ្នករងរបួសនៅក្នុងឧបទ្ទវហេតុបាក់រលំអគារចិនមួយកន្លែង ក្នុងខេត្តព្រះសីហនុ កាលពីចុងសប្ដាហ៍កន្លងទៅនេះ។
យោងតាមការចុះផ្សាយលើគេហទំព័រហ្វេសប៊ុកផ្លូវការនៅថ្ងៃនេះ ឯកអគ្គរាជទូតជប៉ុនប្រចាំកម្ពុជា លោក ហូរីណូអ៊ុជិ ហ៊ីដេហ៊ីសា មានប្រសាសន៍ថា លោកមានការសោកស្ដាយជាពន់ពេក នៅពេលទទួលបានព័ត៌មានគ្រោះថ្នាក់បាក់សំណង់អគារចិនកម្ពស់៧ជាន់ កាលពីថ្ងៃទី២២ខែមិថុនាកន្លងទៅថ្មីៗនេះ។
សារលើទំព័រហ្វេសប៊ុកស្ថានទូតជប៉ុនប្រចាំកម្ពុជាបញ្ជាក់ថា៖ «ខ្ញុំមានអារម្មណ៍សោកស្តាយជាពន់ពេកក្រោយពីបានទទួលព័ត៌មានស្តីពីឧបទ្ទវហេតុបាក់អាគារដែលបានកើតឡើងនៅថ្ងៃទី២២ ខែមិថុនា នៅខេត្តព្រះសីហនុ។ ខ្ញុំសូមចូលរួមរំលែកទុក្ខជាមួយក្រុមគ្រួសារជនរងគ្រោះ និងសូមបួងសួងឲ្យវិញ្ញាណក្ខន្ធរបស់ជនរងគ្រោះទៅកាន់សុគតិភព»។
អ្នកនាំពាក្យសាលាខេត្តព្រះសីហនុ លោក ឃាង ភារម្យ ប្រាប់ VOD ថា គិតត្រឹមម៉ោង១០ និង៣០នាទី ព្រឹកថ្ងៃចន្ទនេះ ក្រុមការងារជួយសង្គ្រោះបានរកឃើញសាកសពចំនួន ២៥នាក់ ហើយចំនួនអ្នករងរបួសកើនដល់ ២៤នាក់ នៅក្នុងករណីបាក់សំណង់អគារ ៧ជាន់ កាលពីព្រឹកថ្ងៃសៅរិ៍ ចុងសប្ដាហ៍កន្លងទៅនេះ។
យ៉ាងណាក៏ដោយ លោកថា ក្រុមការងារជួយសង្គ្រោះនៅតែបន្ដប្រតិការជួយសង្គ្រោះបន្ដទៀត ដើម្បីរុករកអ្នកស្លាប់ និងអ្នកនៅរស់រានមានជីវិតផ្សេងទៀត ដែលជាប់នៅក្រោមសំណង់អគារបាក់បែកនេះ។
ចំណែក ស្ថានទូតចិន កាលថ្ងៃទី២៣ ខែមិថុនា ក៏បានសរសេរនៅលើទំព័រហ្វេសប៊ុកថា ស្ថានទូតសោកស្ដាយចំពោះហេតុការណ៍នេះ និងបួងសួងឲ្យវិញ្ញាក្ខន្ធជនរងគ្រោះបានទៅកាន់សុគតិភព។ ស្ថានទូតចិន បានបង្ហាញជំហរគាំទ្រផងដែរទៅដល់វិធានការរបស់អាជ្ញាធរកម្ពុជា ដែលបានចាប់ខ្លួនជនជាតិចិនដែលពាក់ព័ន្ធនឹងគម្រោងសាងសង់នៃអគារកម្ពស់ ៧ជាន់នេះ៕