គណបក្សប្រជាធិបតេយ្យមូលដ្ឋាន (GDP) ហៅការដែលរដ្ឋាភិបាលផ្តល់ភារកិច្ចថ្មី ដល់មន្ត្រីជាប់ពាក់ព័ន្ធទៅនឹងព្រឹត្តិការណ៍រលំអគារសម្លាប់មនុស្សនៅខេត្តព្រះសីហនុថា ជាការរក្សាទុកមន្ត្រីអសមត្ថភាពក្នុងក្រមខណ្ឌរដ្ឋ បង្កើតជាមន្ទិលសង្ស័យដល់ការស្វែងរកយុត្តិធម៌ជូនជនរងគ្រោះ។
គណបក្សនេះ បានលើកឡើងលើហ្វេសប៊ុករបស់ខ្លួន នៅថ្ងៃអង្គារម្សិលមិញថា ឆ្លងតាមព្រឹត្តិការណ៍នៃការរលំអគារ អាចធ្វើការឆ្លុះបញ្ចាំងថា រដ្ឋបាលខេត្តអសមត្ថភាពក្នុងការគ្រប់គ្រងដែនសមត្ថកិច្ចរបស់ខ្លួន ពាក់ព័ន្ធនឹងការទប់ស្កាត់សំណង់ខុសច្បាប់ ទើបបង្កឱ្យមានអគារបាក់សម្លាប់មនុស្ស។
គណបក្សប្រជាធិបតេយ្យមូលដ្ឋាន លើកឡើងទៀតថា ក្រោយព្រឹត្តិការណ៍នេះ អភិបាលខេត្តព្រះសីហនុ លោក យន្ត មីន ត្រូវបានរដ្ឋាភិបាលតែងតាំងឱ្យមកកាន់ភារកិច្ចថ្មីនៅក្រសួងមហាផ្ទៃ ក្រោយពីថា លោកទទួលកំហុស ហើយសុំលាលែងតំណែង។
ចំណែកអនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ លោក ញឹម វណ្ណដា ត្រូវនាយករដ្ឋមន្ត្រីប្រកាសដកតំណែង តែតែងតាំងវិញឱ្យធ្វើជាទីប្រឹក្សារដ្ឋាភិបាលតំណែងស្មើទេសរដ្ឋមន្ត្រីដដែល។
គណបក្សនេះ ចាត់ទុកថា៖ «រដ្ឋាភិបាលនៅតែរក្សាមន្ត្រី អសមត្ថភាព ឬមិនទទួលខុសត្រូវក្នុងក្របខណ្ឌការងាររដ្ឋបាល ឬក្នុងដែនសមត្ថកិច្ចរបស់ខ្លួន»។
គណបក្សប្រជាធិបតេយ្យមូលដ្ឋាន ផ្តល់ជាយោបល់ថា ដើម្បីដោះស្រាយបញ្ហានេះ ត្រូវជំរុញឱ្យមានពិន័យរដ្ឋបាល និងបង្កើតតុលាការរដ្ឋបាលដោះស្រាយបញ្ហានេះ។
អ្នកនាំពាក្យគណបក្សនេះ លោក ឡឹក សុធា ឱ្យដឹងបន្ថែមថា ការដែលរដ្ឋាភិបាលរក្សាទុកមន្ត្រីអសមត្ថភាពជិតខ្លួន វាបង្កើតជាសំណួរថា តើសោកនាដកម្មប៉ុន្មានករណីទៀត នឹងអាចកើតឡើង ហើយមន្ត្រីពាក់ព័ន្ធណាខ្លះ ត្រូវនាំខ្លួនមកផ្តន្ទាទោស ដើម្បីផ្តល់យុត្តិធម៌ដល់ជនរងគ្រោះ។
លោកថា៖ «អាចធៀបទៅអ៊ីចឹងថា សម្តេចនាយក គាត់ជាមេទ័ពដ៏ពូកែដ៏ឈ្លាសវៃ ប៉ុន្តែបើគាត់មានកូនទាហានអសមត្ថភាព អាហ្នឹងធ្វើឱ្យសមរភូមិរបស់គាត់ មិនប្រាកដថា ជោគជ័យមួយរយភាគរយដែរ។ តែបើគាត់ជាមេទ័ពដ៏ពូកែ ហើយមានកូនទ័ពដ៏មុតស្រួច ដ៏ក្លាហានវាងវៃ ពេលហ្នឹងវាយ១០០សមរភូមិ ឈ្នះ១០០សមរភូមិ»។
សោកនាដកម្មនៃការដួលរលំអគារកម្ពស់៧ជាន់ កាលពីថ្ងៃទី២២ ខែមិថុនានេះ បានសម្លាប់កម្មករ២៨នាក់ និង២៦នាក់ទៀតរងរបួស។ ពីរថ្ងៃបន្ទាប់ បេសកកម្មសង្គ្រោះរុករកអ្នកកប់ក្នុងគំនរអគារ ត្រូវបិទបញ្ចប់។
លោកនាយករដ្ឋមន្ត្រី ហ៊ុន សែន ប្រកាសនៅថ្ងៃបិទបញ្ចប់ថា ការប្រកាសលាលែងតំណែងរបស់អភិបាលខេត្តព្រះសីហនុ លោក យន្ត មីន ថាជាការទទួលសុខត្រូវមួយរបស់អាជ្ញាធរដែនដី។
មេដឹកនាំរូបនេះបញ្ជាក់ថា រដ្ឋាភិបាលនឹងបន្តស្រាវជ្រាវរកឱ្យឃើញដើមហេតុនៃការដួលរលំអគារនេះ ដើម្បីទប់ស្កាត់ការបំពានច្បាប់កម្ពុជា។
រដ្ឋមន្ត្រីក្រសួងមហាផ្ទៃលោក ស ខេង ឆ្លើយសំនួរអ្នកសារព័ត៌មាន ក្រោយបិទបញ្ចប់ទិវាគ្រឿងញៀន នៅរាជធាណីភ្នំពេញ នាថ្ងៃនេះថា មន្ត្រីជំនាញកំពុងស្រាវជ្រាវរកអ្នកពាក់ព័ន្ធមកប្រឈមមុខច្បាប់។
លោកថា៖ «កិច្ចការហ្នឹងមានតែចៅហ្វាយខេត្តម្នាក់ធ្វើទេ វាអាចពាក់ព័ន្ធទៅនឹងនរណាម្នាក់ទៀតធ្វើ ប៉ុន្តែខ្ញុំអត់ទាន់ហ៊ានទេ យើងត្រូវការពិនិត្យឯកសារឱ្យចម្ចាស់លាស់ ព្រោះអាហ្នឹងជាបញ្ហាយុត្តិធម៌ ព្រោះកាលណាបើយើងធ្វើលើស វាអយុត្តិធម៌សម្រាប់មន្ត្រីដែលខំធ្វើការ»។
នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្សលោក មឿន តុលា ផ្តល់ជាយោបល់ថា ការរក្សាទុកមន្ត្រីខិលខូចនៅជិតខ្លួនច្រើន អាចក្លាយជាអ្នកទោសប្រវត្តិសាស្ត្រ ប្រសិនបើឫសគល់នៃបញ្ហាមិនត្រូវបានកាត់ផ្តាច់ ហើយបង្កឱ្យមានសោកនាដកម្ម កាន់តែធំទៅថ្ងៃអនាគតនោះ។
លោកថា៖ «បើវិបត្តិនៅថ្ងៃក្រោយកើតឡើង វាអាចនឹងឈានទៅឆក់យកជីវិតមនុស្សច្រើនជាងហ្នឹង ហើយអ្នកណាដែលធ្វើហ្នឹងជាប់ទោសក្នុងប្រវត្តិសាស្ត្រហើយ ព្រោះវាធ្វើឱ្យបាត់បង់ជីវិតមនុស្ស»។
សាលាខេត្តព្រះសីហនុ បានចេញប្រកាសថា អគារកម្ពស់៧ជាន់រលំសង្កត់កម្មករស្លាប់ និងរងរបួសនោះ ម៉ៅការសាងសង់ដោយក្រុមហ៊ុនចិន។ លិខិតដដែលបញ្ចាក់ថា ដំណើរការសាងសង់នោះ គ្មានច្បាប់អនុញ្ញតពីស្ថាប័នជំនាញរបស់កម្ពុជាទេ។
អាជ្ញាធរខេត្តបញ្ជាក់ថា បានចុះទៅហាមឃាត់ ក្រុមហ៊ុនចិននេះចំនួនពីរដង តែថាក្រុមហ៊ុនមិនសហការ រហូតបង្កឱ្យមានព្រឹត្តិការណ៍ដួលរលំ នៅម៉ោង៤ជិតភ្លឺថ្ងៃទី២២មិថុនាឆ្នាំ២០១៩នេះ។
អ្នកនាំពាក្យសាលាដំបូងខេត្តព្រះសីហនុ លោក លឹម ប៊ុនហេង សុំមិនធ្វើអត្ថាធិប្បាយចំពោះដំណើរការផ្លូវច្បាប់លើ អ្នកពាក់ព័ន្ធករណីនេះទេ ដោយអះអាងថាសំណុំរឿងស្ថិតក្នុងដៃចៅក្រមស៊ើបសួរ។ កាលពីថ្ងៃចន្ទម្សិលមិញ តុលាការខេត្តនេះ បានសម្រេចឃុំខ្លួន ជនជាតិចិន៤នាក់ តែចំណោមនេះមិនមានមន្ត្រីពាក់ព័ន្ធរបស់រដ្ឋាភិបាលទេ៕