ខួប៥ឆ្នាំនៃការបាញ់សម្លាប់លោកបណ្ឌិតកែម ឡី នៅឆ្នាំ២០២១នេះ ត្រូវបានប្រារព្ធឡើងក្នុងស្ថានភាពស្ងប់ស្ងាត់ទាំងការប្រារព្ធនៅគេហដ្ឋានរបស់លោកនៅឯស្រុកកំណើតក្នុងភូមិអង្គតាកុប ឃុំលាយបូរ ស្រុកតាំកក់ ខេត្តតាកែវ និង នៅទីតាំងដែលឃាតករបាញ់សម្លាប់លោកនៅហាងស្តារម៉ាត បរិវេណស្ថានីយ៍ប្រេងឥន្ធនៈកាត់តិច ស្តុបបូកគោ រាជធានីភ្នំពេញ។
ម្តាយបង្កើតរបស់លោកបណ្ឌិត កែម ឡី អ្នកស្រី ភោគ សេ មានប្រសាសន៍ប្រាប់វីអូឌីថា ការប្រារព្ធខួប៥ឆ្នាំនៃការបាត់បង់កូននៅឆ្នាំនេះ គ្រួសារមិនបានរៀបចំធំដុំឡើយ ដោយសារបញ្ហាកូវីដ-១៩។ អ្នកស្រីថា ដោយសារពិធីខួបឆ្នាំនេះ មិនបានប្រារព្ធធំដុំ ទើបគ្រួសារគាត់មិនបានសុំច្បាប់ទៅអាជ្ញាធរនោះទេ ទោះបីជាពិធីនេះជាពិធីបែបសាសនាដែលក្នុងច្បាប់មិនតម្រូវឱ្យសុំច្បាប់ក៏ដោយ។
អ្នកស្រីបន្ថែមថា ពិធីខួបឆ្នាំនេះ គ្រួសារគ្រាន់តែនិមន្តព្រះសង្ឃ៥អង្គមកសូត្រមន្តបង្សុកូល និងឆាន់ចង្ហាន់ថ្ងៃត្រង់ ព្រមទាំងដារបង្ហើយបុណ្យតែប៉ុណ្ណោះ។
ងាកមកទិដ្ឋភាពនៅកន្លែងឃាតករបាញ់ប្រហារលើលោកបណ្ឌិតកែម ឡី កាលពី៥ឆ្នាំមុននៅស្តុបបូកគោវិញ គឺមានស្ថានភាពស្ងាត់ជ្រងំផងដែរ ដោយមិនឃើញមានមនុស្សម្នា យកកម្រងផ្កាទៅដាក់ទៅមុខហាងស្តារម៉ាត និងមិនមានការប្រមូលផ្តុំគ្នាច្រើនដូចរាល់ឆ្នាំឡើយ។
អ្នករាយការណ៍ព័ត៌មានរបស់វីអូឌីម្នាក់ ដែលប្រចាំការនៅទីនោះបញ្ជាក់ថា ហាងស្តារម៉ាតដែលជាកន្លែងលក់ដូររាល់ថ្ងៃនោះ បានបិទទ្វាលែងលក់ដូរនៅព្រឹកថ្ងៃទី១០ខែកក្កដានេះ ហើយនៅបរិវេណស្ថានីយ៍ប្រេងឥន្ធនៈកាត់តិច គឺមានកម្លាំងអាជ្ញាធរនិងសមត្ថកិច្ចប្រមាណ៥០នាក់នៅឃ្លាំមើល និងដាក់ពង្រាយនៅទីនោះផងដែរ។
លើសពីនេះ សមត្ថកិច្ច ដែលប្រចាំការនៅបរិវេណស្ថានីយ៍ប្រេងឥន្ធនៈកាល់តិច មិនអនុញ្ញាតឱ្យមានការប្រមូលផ្តុំ ឬ ឈប់នៅបរិវេណមួយនេះឡើយ ដោយសមត្ថកិច្ចដេញពួកគេចេញថែមទៀតផង លើកលែងតែអ្នកឈប់ចាក់ប្រេងតែប៉ុណ្ណោះ។
អ្នកស្រាវជ្រាវការអភិវឌ្ឍន៍សង្គម និងជាអ្នកវិភាគនយោបាយ លោកបណ្ឌិត កែម ឡី ត្រូវបានខ្មាំកាំភ្លើងបាញ់សម្លាប់កាលពីថ្ងៃទី១០ខែកក្កដា ឆ្នាំ២០១៦ នៅក្នុងស្តារម៉ាតស្តុបបូកគោ។
ការបាញ់សម្លាប់លោកបណ្ឌិត កែម ឡី កើតឡើងតែ២ថ្ងៃប៉ុណ្ណោះ ក្រោយពេលលោកបានធ្វើអត្ថាធិប្បាយរបាយការណ៍មួយរបស់អង្គការអន្តរជាតិ Global Witness ដែលមានឈ្មោះថា អាណាចក្រអាជីវកម្មត្រកូលហ៊ុននៅកម្ពុជា។
របាយការណ៍នោះ បានលាតត្រដាងពីការក្តោបក្តាប់អាជីវកម្មរបស់ក្រុមគ្រួសារលោកនាយករដ្ឋមន្ត្រីហ៊ុន សែន យ៉ាងច្រើននៅកម្ពុជា ដែលមានតម្លៃរាប់រយលានដុល្លារអាមេរិក ដែលបញ្ហានេះលោកបណ្ឌិតយល់ឃើញពេលនោះថា នឹងធ្វើឱ្យមានទំនាស់ផលប្រយោជន៍រវាងជំនួញ និងការដឹកនាំឬ កាន់អំណាច។
អស់រយៈពេល៥ឆ្នាំកន្លងមកនេះ ព្រឹត្តិការណ៍សម្លាប់លោកបណ្ឌិត កែម ឡី គឺ មានតែឃាតករម្នាក់ប៉ុណ្ណោះ ឈ្មោះ អឿត អាង ហៅខ្លួនឯង ជួប សម្លាប់ ដែលត្រូវបានចាប់ខ្លួន ហើយតុលាការបានផ្តន្ទាទោសឱ្យជាប់គុកអស់មួយជីវិត។
យ៉ាងណាមន្ត្រីតុលាការ និងមន្ត្រីជាន់ខ្ពស់ក្រសួងយុត្តិធម៌ធ្លាប់អះអាងថា សំណុំរឿងនេះ ត្រូវបានបែងចែកជាពីរ ដោយទីមួយករណីជួប សម្លាប់ ដែលតុលាការកាត់ទោសឱ្យជាប់គុកអស់មួយជីវិតនោះត្រូវបានបិទបញ្ចប់ និងករណីមួយទៀត គឺរកអ្នកពាក់ព័ន្ធជាមួយ ឃាតករ ជួប សម្លាប់។
យ៉ាងនេះក្តី អ្នកស្រី ភោគ សេ នៅតែមិនទាន់ស្ងប់ចំពោះយុត្តិធម៌បែបនេះឡើយ ប៉ុន្តែអ្នកស្រីមិនដឹងត្រូវធ្វើអ្វីបាន និង ធ្វើដោយរបៀបណា ដោយទុកឱ្យអ្នកដទៃជួយរកយុត្តិធម៌នេះផងទៅចុះ។
ចំណែក ភរិយាលោកបណ្ឌិត កែម ឡី គឺ អ្នកស្រី បូ រចនា ប្រាប់វីអូឌីថា អ្នកស្រីហៅយុត្តិធម៌ និងចំណាត់ការច្បាប់ពីសំណាក់តុលាការកម្ពុជាកន្លងមក ជាចំណាត់ការខ្យល់តែប៉ុណ្ណោះ ដោយថាយុត្តិធម៌សម្រាប់ស្វាមីអ្នកស្រីមកទល់ពេលនេះ គ្មានសោះឡើយ។ លើសពីនេះ ឃាតករម្នាក់ឈ្មោះ អឿត អាង នោះ អ្នកស្រីថាជាឃាតករក្លែងក្លាយ ឬ សម្បនិមិត្តតែប៉ុណ្ណោះ។
តែយ៉ាងណា អ្នកស្រី នៅតែចង់បានយុត្តិធម៌ពិត ប៉ុន្តែអ្នកស្រីមិនមានសង្ឃឹមទទួលបានយុត្តិធម៌ក្នុងសម័យកាលដឹកនាំដោយរដ្ឋាភិបាលលោក ហ៊ុន សែន បច្ចុប្បន្ននោះឡើយ៕