ប្រទេសឥណ្ឌូនេស៊ី បាននិងកំពុងពិភាក្សាជាមួយអង្គការសុខភាពពិភពលោក (WHO) ក៏ដូចជាក្រុមហ៊ុនឱសថចំនួន៦ ដើម្បីក្លាយជាមជ្ឈមណ្ឌលសកលមួយសម្រាប់ផលិតវ៉ាក់សាំងការពារជំងឺកូវីដ-១៩។ នេះបើតាមការឱ្យដឹងពីរដ្ឋមន្ត្រីសុខាភិបាលរបស់ប្រទេសនេះ ដែលបានថ្លែងប្រាប់ទីភ្នាក់ងារសារព័ត៌មាន Reuters។
ទាក់ទិនទៅនឹងគោលបំណងនេះ រដ្ឋមន្ត្រីសុខាភិបាលឥណ្ឌូនេស៊ី លោក Budi Gunadi Sadikin បានថ្លែងនៅក្នុងបទសម្ភាសមួយថា ប្រទេសឥណ្ឌូនេស៊ីនឹងចាប់ផ្តើមគំនិតផ្តួចផ្តើមនេះ ដោយផ្តល់អាទិភាពដល់ការទិញវ៉ាក់សាំងការពារជំងឺកូវីដ-១៩ ពីក្រុមហ៊ុនដែលបានចែករំលែកបច្ចេកវិទ្យានិងបង្កើតទីតាំងផលិតនៅឥណ្ឌូនេស៊ី។
លោកថា៖ «យើងកំពុងតែធ្វើការជាមួយអង្គការសុខភាពពិភពលោក ដើម្បីក្លាយជាមជ្ឈមណ្ឌលផលិតវ៉ាក់សាំងប្រភេទ mRNA ជាសកលមួយ»។
ជាមួយគ្នានេះដែរ លោកបន្ថែមថា គម្រោងនេះត្រូវបានលើកឡើងនិងពិភាក្សាដោយផ្ទាល់ទៅកាន់លោក Tedros Adhanom Ghebreyesus អគ្គនាយកអង្គការសុខភាពពិភពលោក កាលពីដើមខែនេះ។
លោកបន្តថា៖ «អង្គការសុខភាពពិភពលោក បានលើកឡើងពីប្រទេសអាហ្វ្រិកខាងត្បូងថាជាទីតាំងទីមួយ ខណៈដែលខ្ញុំបានថ្លែងថា ឥណ្ឌូនេស៊ីគួរតែជាប្រទេសទី២»។
គួរបញ្ជាក់ថា មជ្ឈមណ្ឌលផ្ទេរបច្ចេកវិទ្យាថ្មី គឺជាផ្នែកមួយនៃយុទ្ធសាស្ត្ររបស់អង្គការសុខភាពពិភពលោក ក្នុងការចែកចាយការផលិតវ៉ាក់សាំងនៅទូទាំងពិភពលោកឱ្យកាន់តែទូលំទូលាយបន្ថែមទៀត និងបង្កើតសមត្ថភាពនៅក្នុងប្រទេសកំពុងអភិវឌ្ឍន៍ ដើម្បីផលិតវ៉ាក់សាំងជំនាន់ថ្មីនានា ដូចជា Moderna (MRNA.O) និង Pfizer (PFE.N) ក្នុងការទប់ស្កាត់វីរុសកូវីដ-១៩ បំប្លែងខ្លួនថ្មី។
ជាមួយនឹងតួលេខឆ្លងសរុបជាង៤លានករណី និងស្លាប់ជាង១៣ម៉ឺននាក់ ឥណ្ឌូនេស៊ីត្រូវបានចាត់ទុកថាជាប្រទេសមួយ ក្នុងតំបន់អាស៊ីដែលរងផលប៉ះពាល់ធ្ងន់ធ្ងរដោយសារជំងឺរាតត្បាត ខណៈចំណោមប្រជាជនរបស់ខ្លួនចំនួន២០៨លាននាក់ មានតែ២៥ភាគរយប៉ុណ្ណោះដែលបានចាក់វ៉ាក់សាំងគ្រប់ដូស គិតរហូតមកដល់ពេលនេះ៕