ក្រសួងធនធានទឹក និងឧតុនិយមកម្ពុជា បានអំពាវនាវឱ្យប្រជាពលរដ្ឋទាំងនៅក្នុងតំបន់ទំនាបកណ្តាល តំបន់ខ្ពង់រាប និងតំបន់មាត់សមុទ្រ ប្រុងប្រយ័ត្នចំពោះបញ្ហាអាកាសធាតុចាប់ពីថ្ងៃទី១៧ ដល់ថ្ងៃទី២១ ខែកញ្ញា ខណៈគណៈកម្មការទន្លេមេគង្គ (MRC) ក៏បានព្រមានអំពីបញ្ហាគ្រោះជំនន់ទឹកភ្លៀងនៅប៉ុន្មានថ្ងៃខាងមុខនេះ។
យោងតាមសេចក្តីប្រកាសរបស់ក្រសួងធនធានទឹក និងឧតុនិយម កាលពីថ្ងៃអង្គារ បានឱ្យដឹងថា ប្រទេសកម្ពុជានឹងទទួលឥទ្ធិពលប្រព័ន្ធសម្ពាធទាប ITCZ ដែលអូសបន្លាយកាត់លើប្រទេសចំនួន៤ រួមមាន ប្រទេសភូមា ថៃ ឡាវ និងវៀតណាម ចាប់ពីថ្ងៃទី១៧ ដល់ថ្ងៃទី២១ ខែកញ្ញា។ បន្ថែមលើនេះ ក្រសួងថា កម្ពុជាក៏នឹងទទួលឥទ្ធិពលពីជ្រលងសម្ពាធទាបមួយទៀតពីប្រទេសឥណ្ឌា និងខ្យល់មូសុងនិរតីខ្សោយផងដែរ។
បើតាមក្រសួងធនធានទឹក និងឧតុនិយម ស្ថានភាពបែបនេះនឹងធ្វើឱ្យបណ្ដាខេត្តមួយចំនួននៅតំបន់វាលទំនាបកណ្ដាល មានភ្លៀងធ្លាក់ពីកម្រិតមធ្យមទៅបង្គួរ លាយឡំដោយផ្គរ រន្ទះ និងខ្យល់កន្រ្តាក់ ចំណែកនៅតំបន់ជួរភ្នំដងរែក និងខ្ពង់រាបឦសាន និងតំបន់មាត់សមុទ្រ អាចនឹងមានភ្លៀងធ្លាក់ពីខ្សោយទៅមធ្យម។
ការអំពាវនាវនេះបានធ្វើឡើងស្របពេលដែលគណៈកម្មការទន្លេមេគង្គ ក៏បានព្រមានអំពីបញ្ហាគ្រោះជំនន់ទឹកភ្លៀង ការបាក់ដី និងបាក់ច្រាំងទន្លេ នៅប៉ុន្មានថ្ងៃខាងមុខ ខណៈព្យុះត្រូពិកឈ្មោះ ខន់សិន (Conson) នឹងមានឥទ្ធិពលមកលើបណ្តាប្រទេសនៅអាងទន្លេមេគង្គក្រោម ដែលបង្កឱ្យមានភ្លៀងធ្លាក់ខ្លាំងនិងខ្យល់បក់បោកខ្លាំង។
បើតាមរបាយការណ៍របស់គណៈកម្មការនេះ ផ្លូវលាតសន្ធឹងនៃព្យុះនេះ គឺចាប់ពីខេត្តភាគខាងជើងដល់ភាគកណ្តាលនៃប្រទេសវៀតណាម ដែលនឹងត្រូវរងផលប៉ះពាល់ក្នុងរយៈពេល៥ថ្ងៃខាងមុខនេះ។ ចំណែកនៅកន្លែងផ្សេងទៀតនៃខេត្តភាគខាងជើង និងភាគពាយព្យនៃប្រទេសថៃ និងប្រទេសឡាវ នឹងរងផលប៉ះពាល់ ខណៈតំបន់ភាគខាងជើងនិងភាគពាយព្យរបស់កម្ពុជាវិញ ក៏នឹងរងផលប៉ះពាល់ផងដែរ។
លោកបណ្ឌិត ឡាំ ហុងសឺន (Lam Hung Son) ប្រធានមជ្ឈមណ្ឌលគ្រប់គ្រងគ្រោះទឹកជំនន់និងគ្រោះរាំងស្ងួតប្រចាំតំបន់នៃ MRC មានប្រសាសន៍ថា៖ «យើងបានជូនដំណឹងដល់ទីភ្នាក់ងារជាតិនៅកម្ពុជា ឡាវ ថៃ និងវៀតណាម អំពីការមកដល់នៃខុនសុន ហើយផលប៉ះពាល់ដែលអាចកើតមានដោយសារព្យុះនេះ អាចនាំមកនូវទឹកភ្លៀងនិងខ្យល់បក់ខ្លាំង»។
វីអូឌី នៅមិនទាន់អាចទាក់ទងសុំការបញ្ជាក់បន្ថែមពីលោក ចាន់ យុត្ថា អ្នកនាំពាក្យក្រសួងធនធានទឹក និងឧតុនិយម បានឡើយទេ នៅថ្ងៃពុធម្សិលមិញនេះ។
ប៉ុន្តែលោក ឃុន សុខា អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានប្រាប់ វីអូឌី ថាបច្ចុប្បន្នស្ថានភាពទឹកជំនន់នៅកម្ពុជាមិនមានច្រើនកន្លែងនៅឡើយទេ។
បើតាមលោក ឃុន សុខា បច្ចុប្បន្ននេះ គឺមានទឹកជំនន់តែនៅខេត្តបន្ទាយមានជ័យមួយប៉ុណ្ណោះដែលកំពុងធ្វើឱ្យប៉ះពាល់ដល់ប្រជាពលរដ្ឋប្រមាណជាង២០០គ្រួសារ។ ប៉ុន្តែលោកមិនទាន់ចាត់ទុកថា ជាគ្រោះមហន្តរាយនៅឡើយទេ។
លោក ឃុន សុខា មានប្រសាសន៍ថា៖ «វាមានតិចតួច ប៉ុន្តែយើងមិនគិតថាវាធ្ងន់ធ្ងរទេ អ៊ីចឹងយើងមិនចាត់ចូលជាគ្រោះមហន្តរាយទេអាហ្នឹងនោះ។ ហើយវាស្រកទៅវិញនៅមួយថ្ងៃឬមួយថ្ងៃកន្លះ ស្រកទៅវិញហើយ»។
គ្រោះទឹកជំនន់ឆ្នាំមុន ដែលបង្កឡើងដោយព្យុះទីហ្វុងឈ្មោះ MOLAVE បានបណ្តាលឱ្យពលរដ្ឋកម្ពុជាចំនួន៤២នាក់ ស្លាប់ និងពលរដ្ឋប្រមាណជាង២លាននាក់បានរងផលប៉ះពាល់ ខណៈពលរដ្ឋប្រមាណជាង៨០០ ០០០នាក់ ស្ថិតនៅក្នុងខេត្តចំនួន២០បានរងផលប៉ះពាល់ដោយផ្ទាល់៕