មន្ត្រីកងទ័ពជើងទឹកឥណ្ឌូនេស៊ីមួយរូបបានឱ្យដឹងនៅថ្ងៃព្រហស្បតិ៍ម្សិលមិញថា កងទ័ពជើងទឹករបស់ប្រទេសនេះបានបង្កើនការល្បាតនៅជុំវិញទីតាំងកោះ Natuna របស់ខ្លួន ក្នុងសមុទ្រចិនខាងត្បូង បន្ទាប់ពីនាវាចិននិងអាមេរិកត្រូវបានប្រទះឃើញចូលមកក្បែរទីតាំងនោះ។
ទីភ្នាក់ងារសារព័ត៌មាន Reuters បានស្រង់សម្ដីមេបញ្ជាការកងនាវាចរណ៍ទី១ លោក Arsyad Abdullah ដែលបានថ្លែងប្រាប់អ្នកយកព័ត៌មានថា នាវាកងទ័ពជើងទឹកចំនួន៥គ្រឿងត្រូវបានដាក់ពង្រាយនៅសមុទ្រ Natuna ខាងជើង ដើម្បីការពារតំបន់នោះ។
លោកបន្តថា៖ «ជំហររបស់កងទ័ពជើងទឹកនៅសមុទ្រ Natuna ខាងជើង គឺមានភាពរឹងមាំក្នុងការការពារផលប្រយោជន៍ជាតិនៅក្នុងដែនសមត្ថកិច្ចរបស់ឥណ្ឌូនេស៊ី ស្របតាមច្បាប់ជាតិនិងច្បាប់អន្តរជាតិដែលបានផ្តល់សច្ចាប័ន ដោយគ្មានការអត់ឱនចំពោះការរំលោភបំពានណាមួយនៅសមុទ្រ Natuna ខាងជើងឡើយ»។
មន្ត្រីកងទ័ពជើងទឹករូបនេះបន្ថែមថា នាវាកងទ័ពជើងទឹកអាមេរិកនិងចិនត្រូវបានប្រទះឃើញចូលមកក្បែរទីតាំងនោះនាពេលថ្មីៗនេះ ប៉ុន្តែមិនបានបង្កជាការរំខានណាមួយនោះទេ ខណៈដែលពួកគេស្ថិតនៅក្នុងដែនទឹកអន្តរជាតិនៅឡើយ។
គួរបញ្ជាក់ថា កាលពីឆ្នាំ២០១៦ ឥណ្ឌូនេស៊ី បានប្រឈមមុខជាបន្តបន្ទាប់ទៅនឹងឧបទ្ទវហេតុដែលបានកើតឡើងនៅក្នុងការតទល់នឹងចិន ក្នុងកិច្ចប្រឹងប្រែងដើម្បីចាប់ខ្លួនមនុស្សនៅលើនាវានេសាទចិន។ ហើយកាលពីខែមករាឆ្នាំនេះ ឥណ្ឌូនេស៊ី ក៏ធ្លាប់បានបញ្ជូនយន្តហោះចម្បាំង ដើម្បីបណ្តេញនាវានេសាទនិងនាវាយាមល្បាតចិនចេញផងដែរ៕