រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានអះអាងថា ក្រសួងគ្រោងរៀបចំអនុក្រឹត្យស្តីពីការគ្រប់គ្រងសត្វនិងពិឃាដសត្វ ដោយឈរលើគោលការណ៍បច្ចេកទេសនិងច្បាប់ ដើម្បីធានានិងគិតគូរអំពីបញ្ហាអនាម័យ សុខភាពសត្វ និងសុខភាពសាធារណៈ ជំងឺឆ្លងសត្វ ការធ្វើចរាចរសត្វនិងផលិផលមានដើមកំណើតពីសត្វ។
គម្រោងរៀបចំអនុក្រឹត្យនេះ ក្រោយពេលមានវិវាទរវាងអាជីវករកាប់ពពែលក់និងមន្ត្រីជំនាញនៅខេត្តកណ្តាលដែលបានចុះទៅចាប់សាច់ពពែដែលពលរដ្ឋកាប់ មិនឱ្យលក់ដូរ ដោយថាខុសច្បាប់។ វិវាទនេះបានធ្វើឱ្យលោកនាយករដ្ឋមន្ត្រី ហ៊ុន សែន ចេញមុខអន្តរាគមន៍និងបញ្ជាភ្លាមៗទៅរដ្ឋមន្ត្រីក្រសួងកសិកម្មឱ្យពិនិត្យនិងដោះស្រាយបញ្ចប់បញ្ហានេះ។
រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន បានលើកឡើងនៅលើទំព័រហ្វេសប៊ុករបស់លោក នៅថ្ងៃទី២០ ខែកញ្ញា ឆ្នាំ២០២១ ថាលោកបានដឹកនាំកិច្ចប្រជុំ ដើម្បីពិភាក្សារកហេតុផលឬអំណះអំណាងសំខាន់ៗ សម្រាប់ជាយន្តការដោះស្រាយបញ្ហាជាកញ្ចប់ ដោយពិនិត្យមើលក្របខណ្ឌគោលនយោបាយដែលពាក់ព័ន្ធការអនុវត្តច្បាប់កន្លងមក ស្ដីពី «សុខភាពសត្វ និងផលិតផលសត្វ» រួមទាំងលិខិតបទដ្ឋានគតិយុត្តផ្សេងៗ ជាពិសេសធ្វើការពិនិត្យរៀបចំអនុក្រឹត្យស្ដីពីការគ្រប់គ្រងសត្វ និងពិឃាដសត្វ។
លោកបញ្ជាក់ថា ខ្លឹមសារនៃកិច្ចប្រជុំនោះក៏ជំរុញឱ្យកសិករមិនគ្រាន់តែធ្វើការដាំដុះឬចិញ្ចឹមសត្វសម្រាប់ផ្គត់ផ្គង់គ្រួសារប៉ុណ្ណោះទេ ប៉ុន្តែថែមទាំងសម្រាប់ផ្គត់ផ្គង់ទីផ្សារផងដែរ។
ខ្លឹមសារដដែលបន្តថា៖ «រៀបចំគោលនយោបាយការអភិវឌ្ឍវិស័យកសិកម្មទាំងមូល និងអនុក្រឹត្យស្តីពីការគ្រប់គ្រងការចិញ្ចឹមសត្វ សត្តឃាតដ្ឋាន កន្លែងពិឃាដសត្វ ឱ្យបានសមស្របក្នុងដំណាក់កាលដោយត្រូវឈរលើគោលការណ៍បច្ចេកទេសនិងច្បាប់ ដើម្បីធានានិងគិតគូរអំពីបញ្ហាអនាម័យ សុខភាពសត្វ និងសុខភាពសាធារណៈ ជំងឺឆ្លងសត្វ ការធ្វើចរាចរសត្វនិងផលិផលមានដើមកំណើតពីសត្វ»។
តាមរយៈវីដេអូឃ្លីបដែលទំព័រហ្វេសប៊ុករបស់លោកនាយករដ្ឋមន្ត្រី ហ៊ុន សែន បង្ហោះកាលពីថ្ងៃទី១៨ ខែកញ្ញា ឆ្នាំ២០២១ បានបង្ហាញពីសកម្មភាពមន្ត្រីកសិកម្មចុះចាប់សាច់ពពែរបស់ពលរដ្ឋ មិនឱ្យពួកគេធ្វើអាជីវកម្ម ដោយថា គ្មានច្បាប់អនុញ្ញាត។
សកម្មភាពនោះត្រូវបានលោក ហ៊ុន សែន លើកឡើងជាសំណួរមួយចំនួនថា៖ «តើមន្ត្រីយើងធ្វើដល់ថ្នាក់នេះជាមួយប្រជាជនមែនទេ? រដ្ឋមន្ត្រីក្រសួងកសិកម្ម និងអភិបាលខេត្ត ដឹងរឿងនេះឬទេ? តើរាជរដ្ឋាភិបាលមានដែលហាមឃាត់ប្រជាជនមិនឱ្យសម្លាប់ពពែយកសាច់ជាអាហារពីពេលណាមក ទើបបានជាមន្ត្រីយើងធ្វើមកលើប្រជាជនបែបនេះ?»
លោកនាយករដ្ឋមន្ត្រី ហ៊ុន សែន សរសេរទៀតថា កន្លងមក រដ្ឋាភិបាលលើកទឹកចិត្តឱ្យប្រជាជនចិញ្ចឹមសត្វមិនមែនទុកសម្រាប់ទុកតាំងពិព័រណ៍ទេ គឺសម្រាប់ជាចំណីអាហារ ហើយហេតុអីបានប្រជាជនចិញ្ចឹមសត្វគ្មានសិទ្ធិសម្លាប់សត្វយកសាច់ទទួលទាន ហើយតម្រូវឱ្យសុំច្បាប់។ លោកបន្តថា បើមានក្នុងច្បាប់ គឺត្រូវធ្វើវិសោធនកម្មច្បាប់។
បញ្ហានេះ លោកស្នើទៅរដ្ឋមន្ត្រីក្រសួងកសិកម្ម និងអភិបាលខេត្ត ស្រាវជ្រាវ ហើយចូលមកបំភ្លឺឱ្យលោកវិញតាមហ្វេសប៊ុកនេះ ដើម្បីឱ្យប្រជាជនបានដឹងជាទូទៅ។
ភ្លាមៗ រដ្ឋមន្ត្រីក្រសួងកសិកម្ម លោក វេង សាខុន បានឆ្លើយតបទៅក្នុងប្រអប់សារ ឬផ្តល់យោបល់លើហ្វេសប៊ុកនាយករដ្ឋមន្ត្រីថា ក្រសួងសូមទទួលយកនូវរាល់សំណូមពរ ក៏ដូចជាមតិយោបល់ដែលបានលើកឡើងរបស់ប្រជាពលរដ្ឋ ជាពិសេសប្រជាកសិករដែលចិញ្ចឹមសត្វ យកទៅពិនិត្យនិងពិចារណាក្នុងការកែលម្អនិងបំពេញបន្ថែមជាបទដ្ឋានគតិយុត្តក្រោមច្បាប់ ឬការធ្វើវិសោធនកម្មច្បាប់ស្តីពីសុខភាពសត្វនិងផលិតកម្មសត្វក្នុងករណីចាំបាច់ ជាមួយនឹងអន្តរក្រសួងនាពេលដ៏ខ្លីខាងមុខនេះ។
លោកបន្តថា កិច្ចអន្តរាគមន៍នេះ ដើម្បីបង្កលក្ខណៈគ្រប់គ្រាន់សម្រាប់ប្រជាជនក្នុងការលើកទឹកចិត្តចិញ្ចឹម និងមានលទ្ធភាពគ្រប់គ្រាន់ក្នុងការសម្លាប់សត្វនិងលក់ដូរបាន សម្រាប់លើកស្ទួយជីវភាពក្នុងគ្រួសារ៕